ថៃ នៅក្រោមកម្ពុជា ក្នុងចំណោមប្រទេស សម្បូរប្រជាជន ជំនាញនិយាយភាសាអង់គ្លេស

ប្រទេសថៃ ជាប់ចំណាត់ថ្នាក់ទី៨ឬ “ទាបខ្លាំង” ក្នុងចំណោមប្រទេសអាស៊ាន និងទី១០១នៅទូទាំងពិភពលោក ក្នុងសន្ទស្សន៍ជំនាញភាសាអង់គ្លេសឆ្នាំ២០២៣ ដែលរៀបចំដោយវិទ្យាស្ថានបង្រៀនភាសាអង់គ្លេសដ៏ល្បីដែលមានបណ្តាញទូទាំងពិភពលោកឈ្មោះ EF។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សន្ទស្សន៍​នេះ​បង្ហាញ​ថា ​​សមត្ថភាព​និយាយ​ភាសា​អង់គ្លេស​របស់ថៃ ​មិនមែនទាបជាង​ត្រឹម​​សិង្ហបុរី ហ្វីលីពីន និង​ម៉ាឡេស៊ី​ប៉ុណ្ណោះ​ទេ ប៉ុន្តែ​ក៏ទាបជាង​វៀតណាម ឥណ្ឌូណេស៊ី មីយ៉ាន់ម៉ា និង​កម្ពុជា​ផងដែរ។

សន្ទស្សន៍ជំនាញភាសាអង់គ្លេសឆ្នាំ២០២៣ គឺផ្អែកលើលទ្ធផលតេស្តរបស់មនុស្សពេញវ័យប្រមាណ២.២លាននាក់ក្នុងប្រទេសនិងតំបន់ចំនួន១១៣។ ​ថៃ​ទទួល​បាន​ពិន្ទុ៤១៦ ហើយ​ស្ថិត​នៅ​ចំណាត់​ថ្នាក់​ទី១០១។

ក្នុង​តំបន់​អាស៊ាន មាន​ប្រទេស​ចំនួន៨ដែលត្រូវ​បាន​បញ្ចូល​ក្នុង​ការ​សាកល្បងនេះ ​លើក​លែង​តែ​ប្រ៊ុយណេ ឡាវ និង​ទីម័រខាងកើត​ប៉ុណ្ណោះ​។

ប្រទេសសិង្ហបុរីដែលមានពិន្ទុ៦៣១ គឺជាប់ចំណាត់ថ្នាក់ទី១ក្នុងតំបន់អាស៊ាន និងទី២ក្នុងចំណោមប្រទេសនិងតំបន់ចំនួន១១៣ ខណៈកម្ពុជាជាប់លេខ៧ក្នុងតំបន់អាស៊ាន និងទី៩៨ទូទាំងពិភពលោក៕

ប្រែសម្រួល៖ Vann Vann

ប្រភព៖ Bangkok Post