ក្រុមហ៊ុនអាកាសចរណ៍ Thai Airways ផ្ដើមជើងហោះហើរក្នុងស្រុកចំនួន ៩ ឡើងវិញ

ក្រុមហ៊ុនអាកាសចរណ៍ Thai Airways International បានចាប់ផ្ដើមដំណើរការឡើងវិញនូវជើងហោះហើរក្នុងស្រុកចំនួន ៩ សម្រាប់រដូវរងា ខណៈជើងហោះហើរមុនៗគឺដំណើរការដោយអតីតសាខាក្រុមហ៊ុន Thai Smile Airways ។

ការប្រតិបត្តិការជើងហោះហើរឡើងវិញនេះ ធ្វើឡើងរវាងទីក្រុងបាងកកទៅខេត្ត Chiang Mai, ខេត្ត Chiang Rai, ទីក្រុង Hat Yai, ខេត្ត Khon Kaen, ខេត្ត Krabi, ខេត្ត Narathiwat, ខេត្ត Phuket, ខេត្ត Ubon Ratchathani និងខេត្ត Udon Thani ។

ទន្ទឹមនោះ សេវាកម្មហោះហើរនឹងបន្តរហូតដល់ថ្ងៃទី៣០ ខែមីនា ឆ្នាំ២០២៤ ដោយប្រើប្រាស់យន្តហោះ Airbus A320 របស់អតីតក្រុមហ៊ុនបុត្រសម្ព័ន្ធ Thai Smile លើផ្លូវហោះហើរចំនួន ៩ ។

ដោយឡែក ចំពោះខេត្ត Phuket ក្រុមហ៊ុនមានសេវាហោះហើរប្រចាំថ្ងៃចំនួន ៥៦ ជើងក្នុងមួយសប្តាហ៍ ខណៈខេត្ត Chiang Mai ​មាន ៣៥ ជើង និងខេត្ត Khon Kaen មាន ២៨ ជើង ។

ពាក់ព័ន្ធនឹងបញ្ហានេះដែរ នាយកប្រតិបត្តិក្រុមហ៊ុន Thai Airways International លោក Chai Eamsiri បាននិយាយថា ក្រុមហ៊ុនអាកាសចរណ៍កំពុងប្រើប្រាស់យន្តហោះ Airbus A320 ចំនួន ២០ គ្រឿង រួមជាមួយនឹងអាកាសយានិក និងអ្នកបម្រើលើយន្តហោះមកពីក្រុមហ៊ុន Thai Smile Airways ដោយសារតែអាជ្ញាប័ណ្ណប្រតិបត្តិការរបស់ក្រុមហ៊ុនបុត្រសម្ព័ន្ធមួយនេះ នឹងផុតកំណត់នៅខែមករា ៕​

ប្រែសម្រួល៖ នាង រតនៈ

ប្រភព៖ Bangkok Post