ប្រមុខ UN ថា ត្រឹមការផ្អាកបាញ់មនុស្សធម៌ប៉ុណ្ណឹង មិនអាចដោះស្រាយ​បញ្ហាសំខាន់ៗនៅហ្គាហ្សាបានទេ

ប្រមុខអង្គការសហប្រជាជាតិ (UN) កាលពីថ្ងៃអង្គារបានជំរុញឲ្យអ៊ីស្រាអែល និងក្រុមប្រដាប់អាវុធប៉ាឡេស្ទីនហាម៉ាស មានបទឈប់បាញ់ពេញលេញនៅតំបន់ហ្គាហ្សាស្ទ្រីប ដោយសារត្រឹមតែការផ្អាកបាញ់មនុស្សធម៌ប៉ុណ្ណឹង គឺមិនទាន់អាចដោះស្រាយបញ្ហាសំខាន់ៗបាននោះទេ ។

លោក Antonio Guterres បាននិយាយនៅក្នុងសន្និសីទសារព័ត៌មានជាមួយលោក Moussa Faki ប្រធានគណៈកម្មការសហភាពអាហ្វ្រិកថា “ជាដំបូង ខ្ញុំចង់និយាយថា បទឈប់បាញ់ពេញលេញ គឺជាជំហានមួយក្នុងទិសដៅត្រឹមត្រូវ និងជានិមិត្តរូបនៃក្តីសង្ឃឹម ប៉ុន្តែវាមិនអាចដោះស្រាយបញ្ហាសំខាន់ៗដែលយើងជួបប្រទះនាពេលនេះនោះទេ” ។

លោកបានបន្ថែមថា “នោះហើយជាមូលហេតុដែលយើងបានទទូចលើតម្រូវការបទឈប់បាញ់មនុស្សធម៌ ដែលនាំទៅដល់ការដោះលែងចំណាប់ខ្មាំងដោយគ្មានលក្ខខណ្ឌ និងភ្លាមៗ រួមជាមួយលទ្ធភាពទទួលបានជំនួយមនុស្សធម៌ប្រកបដោយប្រសិទ្ធភាពដល់ប្រជាជនទាំងអស់នៅក្នុងតំបន់ហ្គាហ្សា និងគ្រប់ទីកន្លែងដែលពួកគេរស់នៅ” ។

ទន្ទឹមនោះ នៅពេលអ្នកសារព័ត៌មានសួរនាំអំពីសាររបស់លោកទៅកាន់រដ្ឋាភិបាលអ៊ីស្រាអែល ពាក់ព័ន្ធទៅនឹងពាក្យសម្ដីរបស់លោក Benjamin Netanyahu ដែលលើកឡើងថា អ៊ីស្រាអែលនឹងបន្តប្រយុទ្ធទៀត ក្រោយបញ្ចប់បទឈប់បាញ់, លោក Guterres បានឆ្លើយថា “សាររបស់គាត់គឺច្បាស់ណាស់ យើងត្រូវការបទឈប់បាញ់មនុស្សធម៌ពេញលេញ និងគ្រប់លក្ខណៈ” ។

ការលើកឡើងរបស់ប្រមុខ UN រូបនេះកើតមានឡើង បន្ទាប់ពីមេដឹកនាំអ៊ីស្រាអែល និងក្រុមហាម៉ាសបានឈានដល់កិច្ចព្រមព្រៀងថ្មីក្នុងការបន្តការផ្អាកបាញ់មនុស្សធម៌នៅតំបន់ហ្គាហ្សាស្ទ្រីបរយៈពេល ២ ថ្ងៃទៀត ក្រោយកិច្ចព្រមព្រៀងលើកដំបូងរយៈពេល ៤ ថ្ងៃដែលបានចាប់ផ្តើមកាលពីថ្ងៃសុក្រ ទី២៤ ខែវិច្ឆិកា អស់សុពលភាពកាលពីថ្ងៃចន្ទ ។

គួរបញ្ជាក់ថា ក្នុងអំឡុងពេលកិច្ចព្រមព្រៀងបទឈប់បាញ់រយៈពេល ៦ ថ្ងៃកន្លងមកនេះ ក្រុមប្រដាប់អាវុធប៉ាឡេស្ទីនហាម៉ាស់បានដោះលែងជនជាតិអ៊ីស្រាអែល ៨១ នាក់ និងជនបរទេស ២០ នាក់ ខណៈដែលខាងអ៊ីស្រាអែលវិញបានដោះលែងជនជាតិប៉ាឡេស្ទីនចំនួន ១១៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មេក្រុមហាម៉ាស ប្រាប់ពាក្យប៉ុន្មានម៉ាត់ទៅចំណាប់ខ្មាំង អ៊ីស្រាអែល ដែលចាប់ឃុំខ្លួននៅផ្លូវរូងក្រោមដី