ព័ត៌មានអន្ដរជាតិ

លោក Netanyahu ថា អ៊ីស្រាអែល នឹងបោសសម្អាតវិហារឥស្លាមដែលបំពាក់បំប៉នមនោគមវិជ្ជាបែបបំពុល

បានផុស

១ year មុន

នៅ

ថ្ងៃពុធ ២៩ វិច្ឆិកា ២០២៣

ដោយ

នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់មេបណ្ដាញសង្គម X លោក Elon Musk ក្នុងបទសម្ភាសន៍មួយថា អ៊ីស្រាអែលនឹងបោសសម្អាតវិហារឥស្លាម និងសាលារៀនដែលបំពាក់បំប៉នមនោគមវិជ្ជាបែបបំពុលក្នុងតំបន់ហ្គាហ្សា នៅពេលដែលសង្រ្គាមរបស់ខ្លួនជាមួយក្រុមហាម៉ាសបានបញ្ចប់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់មហាសេដ្ឋី Elon Musk ក្នុងបទសម្ភាសន៍មួយដែលផ្សាយបន្តផ្ទាល់នៅលើបណ្ដាញ X, លោក Netanyahu បាននិយាយថា ការបំផ្លិចបំផ្លាញរបស់ក្រុមហាម៉ាសនឹងក្លាយជា “ប្រផ្នូល” នៃការផ្លាស់ប្តូរសាសនាឥស្លាមជាប្រព័ន្ធបន្ថែមទៀតនៅក្នុងតំបន់ហ្គាហ្សា ។

លោក Netanyahu លើកឡើងថា “យើងត្រូវធ្វើឲ្យតំបន់ហ្គាហ្សាគ្មានយោធា បន្ទាប់ពីការបំផ្លិចបំផ្លាញរបស់ក្រុមហាម៉ាស ។ យើងត្រូវលុបបំបាត់រ៉ាឌីកាល់ហ្គាហ្សា ប៉ុន្តែវាក៏នឹងចំណាយពេលមួយរយៈធំផងដែរ ជាពិសេសការងារនៅវិហារឥស្លាម និងនៅតាមសាលារៀន រួមជាមួយកន្លែងផ្សេងៗទៀតដែលកុមារមិនស្គាល់តម្លៃរបស់ពួកគេ ហើយបន្ទាប់មកយើងត្រូវកសាងតំបន់ហ្គាហ្សាឡើងវិញ” ។

នាយករដ្ឋមន្ត្រីអ៊ីស្រាអែលរូបនេះបានប្រាប់លោក Elon Musk ទៀតថា “ដំបូងឡើយអ្នកត្រូវតែកម្ចាត់របបបំពុលសង្គម ដូចដែលអ្នកបានធ្វើនៅប្រទេសអាល្លឺម៉ង់ ក៏ដូចដែលអ្នកបានធ្វើនៅប្រទេសជប៉ុន ក្នុងអំឡុងសង្គ្រាមលោកលើកទីពីរ” ។

ពេញមួយយុទ្ធនាការផ្លូវអាកាស និងជើងគោករបស់អ៊ីស្រាអ៊ែលនៅក្នុងតំបន់ប៉ាឡេស្ទីនរយៈពេល ៧ សប្តាហ៍កន្លងមកនេះ លោក Netanyahu បានប្រកាសម្តងហើយម្តងទៀតថា ក្រុមហាម៉ាសត្រូវតែបាត់ស្រមោលចេញពីទឹកដីមួយនេះ បន្ទាប់ពីប្រតិបត្តិការបោសសម្អាតត្រូវបានបញ្ចប់ ។

គួរបញ្ជាក់ថា កាលពីថ្ងៃទី៧ ខែតុលា ក្រុមប្រដាប់អាវុធប៉ាឡេស្ទីនហាម៉ាសបានបើកការវាយប្រហារដោយបាញ់គ្រាប់រ៉ុកកែតយ៉ាងសន្ធាប់ចេញពីតំបន់ហ្គាហ្សាស្ទ្រីបមកលើទឹកដីនៃប្រទេសអ៊ីស្រាអែល ហើយថែមទាំងបានវាយឆ្មក់ចូលតាមព្រំដែនដោយចាប់ពង្រត់ និងសម្លាប់ពលរដ្ឋអ៊ីស្រាអែលប្រហែល ១,២០០ នាក់ ។

ជាការឆ្លើយតប អ៊ីស្រាអែលបានបើកការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃទៅលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ដោយរហូតមកដល់ពេលនេះបណ្ដាលឲ្យជនស៊ីវិលលើស ១៥,០០០ នាក់ រួមទាំងកុមារ និងស្ត្រីសរុប ១០,១៥០ នាក់ត្រូវបានសម្លាប់ ។

ក្រៅពីចំនួនអ្នកស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ៣៦,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕