អ៊ុយក្រែនទទួលបានគ្រាប់ផ្លោង ៣សែនគ្រាប់ពីសហភាពអឺរ៉ុប

រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយនៅថ្ងៃពុធ ទី២៩ ខែវិច្ឆិកា ថា សហភាពអឺរ៉ុប (EU) បានផ្ដល់គ្រាប់ផ្លោងប្រហែល ៣០០,០០០គ្រាប់ទៅឱ្យអ៊ុយក្រែនក្នុងចំណោមគ្រាប់ផ្លោងរាប់លានគ្រាប់ដែល EU ធ្លាប់សន្យា ចាប់តាំងពីផ្ទុះជម្លោះជាមួយរុស្ស៊ីរហូតមកដល់បច្ចុប្បន្ន។

ថ្លែងទៅកាន់អ្នកសារព័ត៌មាន លោក Kuleba បានអំពាវនាវឱ្យមានជំនួយកាន់តែទៅលើឧស្សាហកម្មការពារជាតិរបស់អ៊ុយក្រែន និងអង្គការណាតូ ដើម្បីធានាឱ្យទីក្រុងកៀវ ទទួលបានការផ្គត់ផ្គង់ដែលខ្លួនត្រូវការដើម្បីទប់ទល់នឹងរុស្ស៊ី ដែលបានឈ្លានពានអ៊ុយក្រែន កាលពីខែកុម្ភៈ ឆ្នាំ២០២២។

គួរបញ្ជាក់ថា​ ក្នុង​រយៈពេល​ជាច្រើន​ខែ​ចុងក្រោយ​នេះទីក្រុង កៀវ ​បាន​ចូលរួម​ក្នុង​ការជំរុញ​រួមគ្នា​មួយ​ដើម្បី​ទាក់ទាញ​ក្រុមហ៊ុនផលិត​សព្វាវុធ​ឈានមុខ​គេ​លើ​ពិភពលោក​ឱ្យ​បង្កើត​ប្រតិបត្តិការ​ក្នុង​ប្រទេស​អ៊ុយក្រែន។

យ៉ាងណាមិញ ប្រទេសជាច្រើនបានប្រកាសឈប់ផ្ដល់ជំនួយអាវុធប្រទេសនេះ ខណៈប្រធានាធិបតីទើបជាប់ឆ្នោតថ្មីរបស់ប្រទេសស្លូវ៉ាគី លោក Robert Fico បានសន្យាបញ្ឈប់ជំនួយយោធាដល់អ៊ុយក្រែន ប៉ុន្តែក្រោយមកលោកបានបញ្ជាក់ថាខ្លួនមិនរារាំងការទិញអាវុធពីក្រុមហ៊ុនឯកជនរបស់អ៊ុយក្រែននៅស្លូវ៉ាគីឡើយ៕

ប្រែសម្រួល៖ សន្យា

ប្រភព៖ CNA

ចុចអាន៖ មន្ត្រីអាមេរិក៖ ពូទីន នឹងមិនបង្កើតសន្តិភាពនៅអ៊ុយក្រែន មុនការបោះឆ្នោតឆ្នាំ ២០២៤ ឡើយ