រយៈពេល ១១ ខែ វៀតណាម កើបលុយជាង ២៦ ពាន់លានដុល្លារពីវិស័យ​ទេសចរណ៍

​​បើយោងតាមការបញ្ជាក់ពីអាជ្ញាធរទេសចរណ៍វៀតណាមបានឲ្យដឹងថា វៀតណាមទទួលចំណូលបានជាង​ ៦២៨.៣ ពាន់ពាន់លានដុង ឬប្រហែល​ ២៦ ពាន់លានដុល្លារពីវិស័យទេសចរណ៍ក្នុងរយៈពេលសរុប ១១ ខែមកនេះ ។

ចំណូលនេះ មានការកើនឡើងខ្ពស់ជាងរយៈពេលសរុបពេញមួយឆ្នាំ​កាលពីឆ្នាំមុន ដោយមានតែ​ ៤៩៥ ពាន់ពាន់ដុង ឬប្រហែលនឹង ២០.៣ ពាន់លានដុល្លារអាមេរិកប៉ុណ្ណោះ ។

សម្រាប់ក្នុងរយៈពេល ១១ ខែមកនេះ ការហោះហើរទេសចរក្នុងស្រុកវៀតណាមមានចំនួន ១០៣.២ ដង ខណៈក្នុងខែមិថុនា​មានអ្នកដំណើរចំនួន ១៣.៥ លាននាក់ ខណៈតួលេខខែវិច្ឆិកា មានដល់ ៤.៥ លាននាក់ ។

ដោយឡែក ភ្ញៀវអន្តរជាតិមានជាង ១១.២ លាននាក់ ខណៈក្នុងខែវិច្ឆិកា ចំនួន​ទេសចរបរទេសមានដល់ទៅជាង ១.២៣ លាននាក់ ដែលជាចំនួនច្រើនជាងគេបំផុតប្រចាំខែ ។

គួរបញ្ជាក់ថា ដំបូងវៀតណាមបានកំណត់គោលដៅទេសចរណ៍បរទេសត្រឹមតែចំនួន ៨ លាននាក់ប៉ុណ្ណោះក្នុងឆ្នាំ ២០២៣ ប៉ុន្តែចំនួននេះបានកើនឡើងប្រហែល ៨.៩ លាននាក់ ក្នុងរយៈពេល ៩ ខែ ស្មើនឹង ១១១ ភាគរយនៃគោលដៅដំបូង ដែលធ្វើឲ្យវៀតណាម​បង្កើន​គោលដៅ​ដល់ទៅជិត ១៣ លាននាក់វិញ​សម្រាប់​ឆ្នាំ​នេះ ៕

ប្រែសម្រួល៖ នាង រតនៈ

ប្រភព៖ VN Express

ចុចអាន៖ ត្រឹមមួយខែវិច្ឆិកា វៀតណាម ទទួលបានភ្ញៀវទេសចរបរទេស ១.២៣ លាននាក់