មកដឹងតម្លៃសំបុត្រយន្តហោះក្នុងស្រុកនៅ វៀតណាម ចាប់ពីឆ្នាំក្រោយទៅ

វៀតណាមនឹងដំឡើង​ថ្លៃសំបុត្រហោះហើរក្នុងស្រុក​ដល់ ៤ លានដុង ឬប្រហែល ១៦៥ ដុល្លារក្នុងមួយជើង ដោយកើនឡើង ១០.៣០ ដុល្លារ ឬ ៦.៧ ភាគរយ​ ហើយនឹងចាប់ផ្តើមអនុវត្តន៍ពីថ្ងៃទី១ ខែមីនា​ ឆ្នាំ២០២៤ តទៅ ។

តម្លៃសំបុត្រស្តង់ដាអតិបរិមាសម្រាប់ជើងហោះហើរក្នុងស្រុកក្រោមចម្ងាយ ៥០០ គីឡូម៉ែត្រ នឹងមានតម្លៃ ៧០.០២ ដុល្លារ ហើយសម្រាប់ជើងហោះហើរចម្ងាយពី ៥០០ ទៅ ៨៥០ គីឡូម៉ែត្រ មានតម្លៃ​ ៩២.៦៨ ដុល្លារ ដោយកើនឡើង ២.០៦ ដុល្លារ ខណៈចម្ងាយ ៨៥០ ទៅ ១ ពាន់គីឡូម៉ែត្រ មានតម្លៃ ១១៩.០៤ ដុល្លារ កើនឡើង ៤.១២ ដុល្លារ ។

ដោយឡែក សម្រាប់រយៈចម្ងាយ ១,០០០ ទៅ ១,២៨០ គីឡូម៉ែត្រ​ នឹងមានតម្លៃ ១៤០.០៤ ដុល្លារ កើនឡើង ៨.២៤ ដុល្លារ ហើយចម្ងាយ ១,២៨០ គីឡូម៉ែត្រ មានតម្លៃ ១៦៤.៧៦ ដុល្លារ កើនឡើង ១០.៣០ ដុល្លារ ។

ទោះយ៉ាងណា សម្រាប់តម្លៃនេះមិនរាប់បញ្ចូលពន្ធលើតម្លៃបន្ថែម ឬថ្លៃសេវាផ្សេងទៀតសម្រាប់អាកាសយានដ្ឋាននោះទេ ខណៈចំពោះការកែសម្រួល​តម្លៃនេះ ក្រសួងដឹកជញ្ជូនវៀតណាមបញ្ជាក់ថា គឺដោយសារតែការឡើងថ្លៃប្រេងឥន្ធនៈ និងអត្រាប្តូរប្រាក់ ។

កាលពីខែមិថុនា សមាគមធុរកិច្ចអាកាសចរណ៍វៀតណាមបានស្នើឲ្យលុបបំបាត់ការកំណត់ពិដានតម្លៃសំបុត្រយន្តហោះចេញ ដោយសារតែវាធ្វើឲ្យខូចទំនាក់ទំនងនៃការផ្គត់ផ្គង់-តម្រូវការនៃទីផ្សារអាកាសចរណ៍ និងប៉ះពាល់អវិជ្ជមានដល់សកម្មភាពអាជីវកម្មរបស់ក្រុមហ៊ុនអាកាសចរណ៍ជាដើម ៕

ប្រែសម្រួល៖ នាង​​ រតនៈ

ប្រភព៖ VN Express

ចុចអាន៖ ថៃ បញ្ចេញថវិកាជាង ២២៦ លានដុល្លារជួយដល់កសិករដាំអំពៅ