វៀតណាម ប្រុងប្រយ័ត្នខ្ពស់ ខណៈជំងឺផ្លូវដង្ហើម កំពុងវាយលុកប្រទេសចិន

តាមការចុះផ្សាយរបស់​ VN Express បានឲ្យដឹងថា ក្រសួង​សុខាភិបាល​វៀតណាមបាន​អំពាវនាវ​ឲ្យ​មាន​ការ​ប្រុង​ប្រយ័ត្ន​ខ្ពស់ចំពោះ​ការ​កើន​ឡើង​នៃ​ជំងឺ​ផ្លូវ​ដង្ហើមដូចជា កូវីដ១៩ ​ផ្ដាសាយ និង​ជំងឺ​ថ្មី​ដែល​កំពុងវាយលុកប្រទេសចិន ជាពិសេសវាយប្រហារក្នុងចំណោមកុមារតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍មួយ ដែលចេញផ្សាយកាលពីថ្ងៃអង្គារ ទី៥ ខែធ្នូ ក្រសួងបញ្ជាក់ថា ប្រទេសជាច្រើននៅក្នុងតំបន់ បានកត់ត្រាការកើនឡើងនៃករណីជំងឺផ្លូវដង្ហើម រួចទៅហើយ។

នៅម៉ាឡេស៊ី ចំនួនករណីកូវីដ១៩ បានកើនឡើង ៥០ ភាគរយ ខណៈសិង្ហបុរីកើនឡើង ១០០ ភាគរយ អំឡុងពេលមួយសប្តាហ៍ បើគិតចាប់ពីថ្ងៃទី១៩ ដល់ថ្ងៃទី២៥ ខែវិច្ឆិកា បើប្រៀបធៀបនឹងសប្តាហ៍មុន ។

ទោះបីជាយ៉ាងណាក៏ដោយ អាជ្ញាធរសុខាភិបាលនៃប្រទេសទាំងពីរធានាថា ស្ថានភាពស្ថិតក្រោមការគ្រប់គ្រង ហើយករណីភាគច្រើនគឺមិនធ្ងន់ធ្ងរទេ ។ ការហក់ឡើងនៃតម្រូវការធ្វើដំណើរចុងឆ្នាំ គឺជាហេតុផលចម្បងមួយក្នុងចំណោមហេតុផលនានា សម្រាប់ការកើនឡើងនេះ ។

សម្រាប់វៀតណាម អាជ្ញាធរបានណែនាំឲ្យប្រជាពលរដ្ឋ ​ត្រូវ​លាងដៃ​ជាមួយ​សាប៊ូ ឬ​ថ្នាំ​សម្លាប់​មេរោគ​ឲ្យបាន​ទៀងទាត់ ព្រមទាំង​លាង​សម្អាត​បំពង់ក និង​ច្រមុះ​ផងដែរ​។

ប្រទេសវៀតណាមបានកត់ត្រាការកើនឡើងនៃអ្នកជំងឺផ្លូវដង្ហើមនៅប៉ុន្មានសប្តាហ៍ថ្មីៗនេះ ហើយភាគច្រើននៃពួកគេគឺជាមនុស្សចាស់ ឬកុមារ។

ងាកទៅប្រទេសចិនឯណោះវិញ មានការកើនឡើងខ្លាំងនៃជំងឺផ្លូវដង្ហើមក្នុងចំណោមកុមារ ចាប់តាំងពីខែតុលាមក ហើយការផ្ទុះឡើងនេះ មិនបានបង្ហាញសញ្ញានៃការធូរស្រាលឡើយ។

អង្គការសុខភាពពិភពលោកបាននិយាយក្នុងរបាយការណ៍កាលពីថ្ងៃទី ២៣ ខែវិច្ឆិកាថា មួយថ្ងៃមុននេះ ខ្លួនបានស្នើសុំព័ត៌មានអំពីជំងឺរាតត្បាត និងការព្យាបាល ក៏ដូចជាលទ្ធផលមន្ទីរពិសោធន៍ពីប្រទេសចិន ទាក់ទិននឹងករណីខាងលើ។

យ៉ាងណាក្តី តាមការបញ្ជាក់ពីគណៈកម្មាធិការសុខភាពជាតិទីក្រុងប៉េកាំង, ជំងឺផ្លូវដង្ហើមកើនឡើងគឺដោយសារតែ ការដកវិធានការរឹតបន្តឹងកូវីដ១៩ និងការចរាចរនៃមេរោគដែលគេស្គាល់ ដូចជាជំងឺគ្រុនផ្តាសាយ និងការឆ្លងមេរោគបាក់តេរីទូទៅដែលប៉ះពាល់ដល់កុមារ៕

ប្រែសម្រួល៖ Vann Vann

ប្រភព៖ VN Express

ចុចអាន៖ ចិន បញ្ជាឲ្យពិនិត្យសុខភាពប្រចាំថ្ងៃ នៅតាមសាលារៀន ខណៈករណីជំងឺផ្លូវដង្ហើម កើនឡើងខ្លាំង