អង្គការ យូណេស្កូ ប្រកាសដាក់បញ្ចូលពិធីបុណ្យសង្ក្រាន្ត ថៃ ទៅក្នុងបញ្ជី​​បេតិកភណ្ឌពិភពលោកជាផ្លូវការ

អង្គការយូណេស្កូនៅថ្ងៃពុធ ទី៦ ខែធ្នូនេះបានប្រកាសដាក់បញ្ចូលពិធីបុណ្យសង្ក្រាន្តចូលឆ្នាំថ្មីរបស់ប្រទេសថៃ ទៅក្នុងបញ្ជីបេតិកភណ្ឌអរូបីនៃមនុស្សជាតិ ខណៈក្រសួងវប្បធម៌ថៃក៏បានអញ្ជើញពលរដ្ឋទាំងប្រុសទាំងស្រីត្រៀមធ្វើពិធីអបអរសាទរផងដែរ ។

អង្គការយូណេស្គូបានប្រកាសពីការសម្រេចដាក់បញ្ចូលពិធីបុណ្យសង្ក្រាន្តចូលឆ្នាំថ្មីរបស់ថៃ ចេញពីប្រទេសបុតស្វាណាដែលជាប្រទេសស្ថិតនៅតំបន់អាហ្វ្រិកខាងត្បូង បន្ទាប់ពីថៃបានស្នើដាក់បញ្ចូលព្រឹត្តិការណ៍មួយនេះកាលពីឆ្នាំ ២០២០ មកម្ល៉េះ ។

ទន្ទឹមនោះ ក្រោយទទួលដំណឹងនេះហើយ នៅឆ្នាំ ២០២៤ គណៈកម្មាធិការរដ្ឋាភិបាលថៃក៏នឹងប្រារព្ធពិធីបុណ្យសង្ក្រាន្តពេញមួយខែមេសាតែម្តង ពោលគឺមិនរៀបចំត្រឹម ៣ ថ្ងៃដូចប្រពៃណីមុនៗឡើយ ក្នុងគោលបំណងធ្វើឲ្យប្រទេសស្ថិតក្នុងចំណោមគោលដៅទេសចរណ៍ពិភពលោកកំពូលទាំង ១០ ។

គួរបញ្ជាក់ថា ពិធីបុណ្យសង្ក្រាន្តចូលឆ្នាំថ្មីនៅប្រទេសថៃត្រូវបានប្រារព្ធឡើង ចាប់ពីថ្ងៃទី១៣ ដល់ថ្ងៃទី១៥ ខែមេសាជារៀងរាល់ឆ្នាំ ខណៈដែលប្រពៃណីទំនៀមទម្លាប់ដែលគេស្គាល់ច្បាស់ក្នុងពិធីមួយនេះគឺការស្រង់ព្រះ រួមជាមួយនឹងពិធីផ្សេងៗទៀតដូចជា ការគោរពចាស់ទុំ ប្រគេនទេយ្យទានដល់ព្រះសង្ឃ និងការធ្វើម្ហូបអាហារ ក៏ដូចជាការវេចនំតាមបែបប្រពៃណីជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ផ្សារទំនើបម៉ាក្រូរបស់ ថៃ ចេញបកស្រាយពីការចោទប្រកាន់ថា ទិញសាច់​ជ្រូកបង្កកគេចពន្ធ