ព័ត៌មានអន្ដរជាតិ

SpaceX ចង់លក់ភាគហ៊ុនខ្លះដើម្បីឲ្យតម្លៃក្រុមហ៊ុនកើនជាង ១៧៥ ពាន់លានដុល្លារ

បានផុស

១០ ខែ មុន

នៅ

ថ្ងៃព្រហស្បតិ៍ ៧ ធ្នូ ២០២៣

ដោយ

ក្រុមហ៊ុន SpaceX របស់មហាសេដ្ឋី Elon Musk បានចាប់ផ្តើមពិភាក្សាគ្នាអំពីការលក់ភាគហ៊ុនក្នុងតម្លៃមួយដែលជំរុញតម្លៃក្រុមហ៊ុនកើនដល់ ១៧៥ ពាន់លានដុល្លារ ឬច្រើនជាងនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

SpaceX កំពុងពិភាក្សាដាក់ចេញតម្លៃដេញថ្លៃដែលអាចមានចាប់ពី ៥០០ លានដុល្លារ ដល់ ៧៥០ លានដុល្លារ និងថ្លឹងថ្លែងលើការចែកចាយភាគហ៊ុនប្រហែល ៩៥ ដុល្លារក្នុងមួយហ៊ុន ខណៈសម្រាប់លក្ខខណ្ឌ និងទំហំនៃសំណើដេញថ្លៃ អាចផ្លាស់ប្តូរ អាស្រ័យលើការចាប់អារម្មណ៍ពីអ្នកលក់ខាងក្នុង និងអ្នកទិញ ។

បច្ចុប្បន្ន ក្រុមហ៊ុន SpaceX មានតម្លៃប្រហែល ១៥០ ពាន់លានដុល្លារ ហើយប្រសិនបើក្រុមហ៊ុនសម្រេចបានការដេញថ្លៃដល់ ១៧៥ ពាន់លានដុល្លារ នោះនឹងធ្វើឲ្យ SpaceX ក្លាយជាក្រុមហ៊ុនធំជាងគេទី ៧៥ របស់ពិភពលោក ដោយមានមូលធនប័ត្រទីផ្សារ ស្មើនឹង T-Mobile USA Inc. មានតម្លៃ ១៧៩ ពាន់លានដុល្លារ, Nike Inc. តម្លៃ ១៧៧ ពាន់លានដុល្លារ និង China Mobile តម្លៃ ១៧៦ ពាន់លានដុល្លារ ។

ជាមួយគ្នានេះ មហាសេដ្ឋី Ron Baron ដែលកាន់កាប់ភាគហ៊ុន ១ ពាន់លានដុល្លាររបស់ក្រុមហ៊ុន SpaceX លើកឡើងថា ក្រុមហ៊ុននឹងមានតម្លៃដល់ ៥០០ ពាន់លានដុល្លារនៅឆ្នាំ ២០៣០ ។ ទោះយ៉ាងណា ចំពោះបញ្ហានេះដែរ តំណាងក្រុមហ៊ុន SpaceX ដែលត្រូវបានគេស្គាល់ជាផ្លូវការថា Space Exploration Technologies Corp. មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ។

គួរបញ្ជាក់ថា ក្រុមហ៊ុន SpaceX ជាក្រុមហ៊ុនឯកជន ដែលស៊ីឈ្នួលបាញ់បង្ហោះគ្រាប់រ៉ុកកែតទៅកាន់ទីអវកាស ។ មិនតែប៉ុណ្ណោះ SpaceX ក៏ដំណើរការសេវាអ៊ីនធឺណិត Starlink ពីលំហអាកាសមកកាន់ផែនដីផងដែរ ខណៈក្រុមហ៊ុនកំពុងឆ្ពោះទៅរកប្រាក់ចំណូលប្រហែល ៩ ពាន់លានដុល្លារពីគម្រោងទាំងពីរនៅឆ្នាំនេះ ហើយរំពឹងនឹងកើនដល់ប្រហែល ១៥ ពាន់លានដុល្លារនៅឆ្នាំ ២០២៤ ៕