ព័ត៌មានអន្ដរជាតិ

ប្រធានាធិបតីចិន លោក Xi Jinping នឹងបំពេញទស្សនកិច្ចនៅវៀតណាម ២ថ្ងៃ

បានផុស

៧ ខែ មុន

នៅ

ថ្ងៃព្រហស្បតិ៍ ៧ ធ្នូ ២០២៣

ដោយ

អគ្គលេខាបក្ស និងជាប្រធានាធិបតីចិនលោក Xi Jinping ព្រមទាំងភរិយា Peng Liyuan នឹងធ្វើទស្សនកិច្ចផ្លូវរដ្ឋ រយៈពេលពីរថ្ងៃនៅប្រទេសវៀតណាម ចាប់ពីថ្ងៃទី១២ដល់ថ្ងៃទី១៣ខែធ្នូ។ នេះបើតាមការចុះផ្សាយរបស់សារព័ត៌មាន VN Express នៅថ្ងៃព្រហស្បតិ៍ទី៧ខែធ្នូ។

ប្រធានាធិបតីចិនលោក Xi Jinping និងភរិយា Peng Liyuan (រូបថត៖ Seattle Times)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីប្រកាសព័ត៌មានរបស់គណៈកម្មាធិការមជ្ឈិមបក្សកុម្មុយនិស្តវៀតណាម ផ្នែកទំនាក់ទំនងខាងក្រៅបានឲ្យដឹងថា ដំណើរទស្សនកិច្ចនេះ ធ្វើឡើងតាមការអញ្ជើញរបស់អគ្គលេខាបក្សវៀតណាម Nguyen Phu Trong និងភរិយា ក៏ដូចជាប្រធានរដ្ឋ លោក Vo Van Thuong និងភរិយាផងដែរ។

រឿងនេះកើតឡើងចំពេលវៀតណាមនិងចិន ប្រារព្ធខួបលើកទី១៥ នៃការបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ ហើយនេះ នឹងក្លាយជាដំណើរទស្សនកិច្ចលើកទី៣របស់លោក Xi ទៅកាន់ប្រទេសវៀតណាម ក្នុងនាមជាអគ្គលេខាធិកាបក្ស និងជាប្រធានាធិបតីចិន។

ប្រទេសចិនគឺជាដៃគូពាណិជ្ជកម្មធំបំផុតរបស់វៀតណាម អស់រយៈពេលជាច្រើនឆ្នាំជាប់ៗគ្នា ខណៈវៀតណាមគឺជាដៃគូធំបំផុតរបស់ចិននៅក្នុងតំបន់អាស៊ាន។

ប្រធានាធិបតីចិនលោក Xi Jinping (រូបថត៖ AP)

ពាណិជ្ជកម្មទ្វេភាគីរវាងប្រទេសទាំងពីរបានឈានដល់ ១៧៥.៦ពាន់លានដុល្លារក្នុងឆ្នាំ២០២២ ដែលក្នុងនោះការនាំចេញរបស់វៀតណាមមានចំនួន៥៧.៧ពាន់លានដុល្លារ និងការនាំចូលចំនួន១១៧.៨៧ពាន់លានដុល្លារ។

សរុបមក គិតត្រឹមថ្ងៃទី២០ខែកញ្ញា ប្រទេសចិនបានជាប់ចំណាត់ថ្នាក់ទី៦ក្នុងចំណោមប្រទេស និងដែនដីចំនួន១៤៤ដែលមានការវិនិយោគផ្ទាល់នៅវៀតណាម ដោយមានគម្រោងសកម្មចំនួន៤០២៣ ជាមួយទុនសរុបជាង ២៦ពាន់លានដុល្លារ។

នៅខែតុលាឆ្នាំ២០២២ លោក Trong ក៏បានទៅបំពេញទស្សនកិច្ចនៅប្រទេសចិនដែរ ដោយកាលនោះ លោកបានក្លាយជាមេដឹកនាំបរទេសជាន់ខ្ពស់ដំបូងគេ ដែលបំពេញទស្សនកិច្ចបន្ទាប់ពីសមាជជាតិលើកទី២០នៃបក្សកុម្មុយនិស្តចិន៕

ប្រែសម្រួល៖ Vann Vann

ប្រភព៖ VN Express

ចុចអាន៖ ច្បាស់ការណ៍ពីថ្ងៃដែលលោក ស៊ី ជីនពីង ជួបពិភាក្សាជាមួយលោក បៃដិន នៅទឹកដី អាមេរិក