Tesla កំពុងរកមើលដីនៅ ថៃ ដើម្បីវិនិយោគរោងចក្រផលិតរថយន្តអគ្គិសនី

នាយករដ្ឋមន្ត្រីថៃលោក សេដ្ឋា ថាវីស៊ីន រួមជាមួយនាយកប្រតិបត្តិក្រុមហ៊ុន​ Tesla បានធ្វើដំណើរជាមួយគ្នាទៅកាន់តំបន់ឧស្សាហកម្មប្រទេសថៃកាលពីសប្តាហ៍មុន ដើម្បីស្វែងរកដីធ្វើការវិនិយោគ​ដ៏មានសក្តានុពលមួយ ។

លោក ថាវីស៊ីន បញ្ជាក់ថា ក្រុមហ៊ុន Tesla កំពុងស្វែងរកដី ៣២០ ហិកតា ដើម្បីវិនិយោគបង្កើតរោងចក្រផលិតឡានអគ្គិសនី ហើយលោកជឿជាក់ថា Tesla ពិតជានឹងធ្វើការវិនិយោគជាក់ជាមិនខាន ។

ខណៈពេលកន្លងទៅ បន្ទាប់ពីបានក្លាយជានាយករដ្ឋមន្ត្រីនៅខែសីហា​ លោក ថាវីស៊ីន បានជួបជាមួយ​ប្រធានក្រុមហ៊ុន Tesla លោកមហាសេដ្ឋី Elon Musk ដើម្បីស្វែងរកការវិនិយោគ ហើយក្រៅពី Tesla លោកនាយករដ្ឋមន្ត្រីក៏បានជួបជាមួយនាយកប្រតិបតិ្តក្រុមហ៊ុនធំៗផ្សេងទៀតផងដែរ​ រួមមាន Microsoft និង Amazon ជាដើម ។

ថៃ ជាប្រទេសដែលផលិត និងនាំចេញរថយន្តធំជាងគេនៅក្នុងតំបន់ ដោយរួមមានក្រុមហ៊ុនផលិតរថយន្តជប៉ុន Toyota Motor Corp, Isuzu Motors និង Honda Motor ដែលគ្រប់គ្រងលើវិស័យរថយន្តថៃអស់ជាច្រើនទសវត្សរ៍មកហើយ ។

គួរបញ្ជាក់ថា ដោយសារតែថៃបានដាក់ចេញការកាត់បន្ថយពន្ធ និងការឧបត្ថម្ភធន ទើបប្រទេសនេះបានទាក់ទាញក្រុមហ៊ុនផលិតរថយន្តចិនរួចទៅហើយ រួមទាំងក្រុមហ៊ុន BYD និង Great Wall Motor ដែលបានប្តេជ្ញាចិត្តក្នុងការវិនិយោគចំនួន ១.៤៤ ពាន់លានដុល្លារ ៕

ប្រែសម្រួល៖ នាង រតនៈ

ប្រភព៖ Bangkok Post

ចុចអាន៖ ថៃ ទំនងជាងបាត់ចំណូលជាង ៨ ពាន់លានដុល្លារពីគោលដៅទេសចរណ៍