ទីបំផុត Vietnamtown ដំបូងបង្អស់លើលោក លេចចេញជារូបរាងនៅប្រទេស ថៃ

គេធ្លាប់តែល្បីឈ្មោះ Chinatown ដែលជាទីប្រជុំជនបណ្តុំជនជាតិចិននៅក្រៅប្រទេស ប៉ុន្តែពេលនេះ វៀតណាម ក៏មាន Vietnamtown នៅក្រៅប្រទេសដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសៅរ៍ទី៩ខែធ្នូ ប្រធានរដ្ឋសភាវៀតណាម លោក Vuong Dinh Hue បានកាត់ខ្សែបូ សម្ពោធ Vietnamtown ដំបូងបង្អស់លើលោក ក្នុងខេត្ត Udon Thani ភាគឦសានប្រទេសថៃ។

សមាជិកសភាកំពូលខាងលើ បានហៅ Vietnamtown នេះថាជាទំនាក់ទំនងថ្មីរបស់វៀតណាម នៅក្នុងប្រទេសថៃ។

លោកបានសម្តែងនូវសេចក្តីរីករាយ ដែលតម្លៃវប្បធម៌ និងប្រវត្តិសាស្ត្ររបស់វៀតណាម ត្រូវបានផ្សព្វផ្សាយនៅប្រទេសថៃ។ វត្តអារាមវៀតណាម និងកន្លែងគោរពបូជាចំនួនបី បានរៀបចំដើម្បីឧទ្ទិសដល់លោក ហូ ជីមិញ។

ស្របពេលជាមួយគ្នានោះដែរ លោក​បាន​ថ្លែងអំណរគុណ​ដល់​រដ្ឋបាល​ខេត្ត Udon Thani និង​អ្នក​ឧបត្ថម្ភ​ សម្រាប់​ការ​គាំទ្រ​ដល់​គម្រោង Vietnamtown។

ដោយគូសបញ្ជាក់ថា វាជា Vietnamtown ដំបូងនិងតែមួយគត់លើពិភពលោក, លោក Hue ជឿជាក់ថា ជាមួយការគាំទ្រយ៉ាងខ្លាំងពីរដ្ឋបាលមូលដ្ឋាន, ទីប្រជុំជននេះ នឹងបង្ហាញឲ្យឃើញនូវសកម្មភាពអាជីវកម្ម វប្បធម៌ និងទេសចរណ៍ដ៏មមាញឹក ដូច្នេះហើយ វានឹងក្លាយជាគោលដៅសម្រាប់ជនជាតិវៀតណាមនៅប្រទេសថៃ ក៏ដូចជាភ្ញៀវទេសចរ រួមចំណែកលើកកម្ពស់វប្បធម៌ក្នុងស្រុក និងជំរុញទំនាក់ទំនងមិត្តភាព និងទំនាក់ទំនងរវាងប្រជាជនក្នុងតំបន់ និងប្រជាជនថៃដែលមានដើមកំណើតវៀតណាមនៅទីនេះ។

លើសពីនេះ លោក​បានសង្កត់ធ្ងន់ថា Vietnamtown ​អាចនឹងបង្កើត​នៅ​ក្នុង​តំបន់​សមស្រប​ផ្សេង​ទៀត​នៃ​ប្រទេស​ថៃ ព្រោះសហគមន៍​វៀតណាម ​បាន​ដើរតួនាទី​ជា​កត្តា​សំខាន់​ក្នុងការ​ជំរុញ​ទំនាក់ទំនង​រវាង​ប្រទេស​ទាំងពីរ។ ការបង្កើត Vietnamtown គឺជានិមិត្តរូបនៃសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសនិងប្រជាជនទាំងពីរ។

សូមបញ្ជាក់ យោង​តាម​សមាគម​ជន​ជាតិ​វៀត​ណាម​នៅ​ខេត្ត Udon Thani បានឲ្យដឹងថា ជន​ជាតិ​វៀត​ណាមដែលរស់នៅ​ក្នុង​មូលដ្ឋាននេះ គឺ​មាន​ប្រមាណ​៦​ម៉ឺន​នាក់៕

ប្រែសម្រួល៖ Vann Vann

ប្រភព៖ VN Express

ចុចអាន៖ កម្ពុជា វៀតណាម និងឡាវ ប្តេជ្ញារួមគ្នាប្រយុទ្ធប្រឆាំងនឹងការជួញដូរមនុស្ស និងឧក្រិដ្ឋកម្មឆ្លងដែន