អ៊ីស្រាអែល ចាប់ផ្ដើមរកឃើញសាកសពចំណាប់ខ្មាំង ក្រោយក្រុមហាម៉ាស​ព្រមានគ្មានឈ្លើយសឹកណានៅសល់ជីវិត

កងទ័ពអ៊ីស្រាអែលបានអះអាងរកឃើញសាកសពចំណាប់ខ្មាំង ២ នាក់នៅក្នុងតំបន់ហ្គាហ្សា ខណៈដែលអ្នកទាំងពីរនោះសុទ្ធសឹងតែត្រូវបានចាប់ធ្វើជាឈ្លើយសឹកដោយក្រុមប្រដាប់អាវុធប៉ាឡេស្ទីនហាម៉ាស ក្នុងពិធីបុណ្យតន្ត្រីជិតព្រំដែនតំបន់ហ្គាហ្សាស្ទ្រីប អំឡុងការវាយឆ្មក់ឆ្លងព្រំដែនកាលពីថ្ងៃទី៧ ខែតុលា ។

យោងតាមសេចក្ដីថ្លែងការណ៍របស់យោធាបានឲ្យដឹងថា សាកសពចំណាប់ខ្មាំងទាំងពីរនាក់នោះមានឈ្មោះ Eden Zacharia ភេទស្រី វ័យ ២៨ ឆ្នាំ និងម្នាក់ទៀតឈ្មោះ Sergeant Major Ziv Dado ភេទប្រុស វ័យ ៣៦ ឆ្នាំ ខណៈក្នុងអំឡុងពេលលីសែងសាកសពរបស់ចំណាប់ខ្មាំងនោះ ក៏មានទាហានអ៊ីស្រាអែល ២ រូបបានបាត់បង់ជីវិត និងអ្នកផ្សេងទៀតរងរបួសផងដែរ ។

ទន្ទឹមនោះ ការប្រទះឃើញសាកសពរបស់ចំណាប់ខ្មាំងក្នុងតំបន់ហ្គាហ្សានៅពេលនេះក៏កើតមានឡើង ក្រោយពេលដែលក្រុមហាម៉ាសប្រកាសថា នឹងមិនមានឈ្លើយសឹកណាមួយនៅសល់ជីវិតរស់នៅឡើយ ប្រសិបបើអ៊ីស្រាអែលមិនព្រមធ្វើតាមការដោះដូរអ្នកទោសប៉ាឡេស្ទីន និងសម្រេចការចរចាក្នុងលក្ខខណ្ឌណាមួយនោះ ។

ជាក់ស្ដែង អ៊ីស្រាអែលមិនខ្វល់នឹងពាក្យសម្ដីទាំងនេះឡើយ ដោយនៅតែបន្តបើកការវាយប្រហារទម្លាក់គ្រាប់បែកតាមផ្លូវអាកាស និងការបំផ្ទុះតាមដីគោកយ៉ាងសន្ធាប់មកលើនៅតំបន់ហ្គាហ្សាស្ទ្រីប ក៏ដូចជាធ្វើការបិទតំបន់នោះទាំងស្រុងផងដែរ ហើយថែមទាំងកាត់ផ្តាច់ទឹក អគ្គិសនី ស្បៀងអាហារ ថ្នាំសង្កូវ និងជំនួយមនុស្សធម៌ផ្សេងៗមិនឲ្យទៅដល់ដៃជនស៊ីវិលឡើយ ចាប់តាំងពីព្រឹត្តិការណ៍ ៧ តុលាមក ។

ពាក់ព័ន្ធនឹងបញ្ហាននេះដែរ អាជ្ញាធរសុខាភិបាលរបស់តំបន់ហ្គាហ្សាបានឲ្យដឹងថា ចាប់តាំងពីការវាយប្រហារសងសឹកដ៏ឃោរឃៅពីសំណាក់កងទ័ពអ៊ីស្រាអែលនោះមក ពលរដ្ឋប៉ាឡេស្ទីនជាង ១៨,៦០០ នាក់ត្រូវបានសម្លាប់ និង ៥០,៥០០ នាក់ផ្សេងទៀតរងរបួស ។

ចំណែកខាងអ៊ីស្រាអែលវិញ ក្រោយការវាយឆ្មក់ឆ្លងព្រំដែនពីសំណាក់ក្រុមប្រដាប់អាវុធប៉ាឡេស្ទីនហាម៉ាសបានសម្លាប់ជនស៊ីវិលប្រមាណ ១,២០០ នាក់ ហើយរហូតមកដល់ពេលនេះមានក៏មានទាហានអ៊ីស្រាអែលជាង ១០០ នាក់បាត់បង់ជីវិតផងដែរ ខណៈចំណាប់ខ្មាំងជិត ១៣៩ នាក់នៅតែស្ថិតក្នុងកណ្ដាប់ដៃក្រុមប្រដាប់អាវុធមួយនេះនៅឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ កាសែតអាមេរិក WSJ ៖ អ៊ីស្រាអែល ចាប់ផ្ដើមបូមទឹកសមុទ្រពន្លិចផ្លូវរូងក្រោម ដីរបស់ក្រុមហាម៉ាស