អ៊ីស្រាអែល ប្តេជ្ញាបន្តសង្គ្រាមនៅហ្គាហ្សា ទោះមានឬគ្មានការគាំទ្រពីអន្តរជាតិ ក៏ដោយ

កាលពីថ្ងៃពុធទី១៣ខែធ្នូ រដ្ឋមន្ត្រីការបរទេសអ៊ីស្រាអែល លោក Eli Cohen បានប្តេជ្ញាថា ទីក្រុងហ្ស៊េរុយសាឡិម នឹងបន្តសង្រ្គាមនៅតំបន់ហ្គាហ្សា ទោះមានឬគ្មានការគាំទ្រពីអន្តរជាតិក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងជំនួបជាមួយអនុរដ្ឋមន្ត្រីការបរទេសអូស្ត្រាលី Tim Watts នៅទីក្រុងហ្ស៊េរុយសាឡិម លោក Cohen និយាយថា បទឈប់បាញ់នៅតំបន់ហ្គាហ្សា នឹងជាកាដូដល់ក្រុមហាម៉ាស ហើយអនុញ្ញាតឲ្យចលនានេះវិលត្រលប់មកវិញ និងគំរាមកំហែងដល់ប្រជាជនអ៊ីស្រាអែល។

ការបញ្ជាក់ខាងលើកើតឡើងមួយថ្ងៃ បន្ទាប់ពីប្រធានាធិបតីអាមេរិកលោក Joe Biden អះអាងថា អ៊ីស្រាអែលកំពុងបាត់បង់ការគាំទ្រជុំវិញពិភពលោក ហើយនាយករដ្ឋមន្ត្រី Benjamin Netanyahu ត្រូវតែពង្រឹងនិងផ្លាស់ប្តូរ រដ្ឋាភិបាលរបស់គាត់។

លោក Biden និយាយក្នុងកម្មវិធីរៃអង្គាសថវិកានៅទីក្រុងវ៉ាស៊ីនតោនថា “នេះគឺជារដ្ឋាភិបាលអភិរក្សនិយមបំផុតនៅក្នុងប្រវត្តិសាស្ត្រអ៊ីស្រាអែល។ រដ្ឋាភិបាលរបស់លោក Netanyahu មិនចង់បានដំណោះស្រាយរដ្ឋពីរទេ”។

គួររម្លឹកឡើងវិញ អ៊ីស្រាអែលបានទម្លាក់គ្រាប់បែកមិនប្រណីដៃ ដាក់ការឡោមព័ទ្ធ និងបើកការវាយលុកជើងគោកនៅតំបន់ហ្គាហ្សាស្ទ្រីប ជាការសងសឹកចំពោះការវាយប្រហារឆ្លងដែនដោយក្រុមហាម៉ាសកាលពីថ្ងៃទី៧ខែតុលា។

យោងតាមអាជ្ញាធរសុខាភិបាលហ្គាហ្សា, ជនជាតិប៉ាឡេស្ទីន ១៨៦០៨នាក់ត្រូវបានសម្លាប់ និង៥០៥៩៤នាក់រងរបួសក្នុងការវាយលុករបស់អ៊ីស្រាអែល ចាប់តាំងពីពេលនោះមក។

ចំណែកតួលេខមនុស្សស្លាប់នៅអ៊ីស្រាអែល ក្នុងការវាយប្រហាររបស់ក្រុមហាម៉ាស គឺមានចំនួន១២០០នាក់ ខណៈចំណាប់ខ្មាំងប្រហែល១៣៩នាក់នៅតែកំពុងជាប់ឃុំ៕

ប្រែសម្រួល៖ Vann Vann

ប្រភព៖ Anadolu

ចុចអាន៖ លោក បៃដិន៖ អ៊ី ស្រា អែ ល កំពុងបាត់ ការ គាំទ្រ ជា សកល ដោយសារប្រតិបត្តិការ ទម្លាក់ គ្រាប់បែក នៅ ហ្គា ហ្សា