ព័ត៌មានអន្ដរជាតិ

កូរ៉េខាងត្បូង គំរាមកម្ទេច កូរ៉េខាងជើង ឲ្យហិនហោច

បានផុស

១ year មុន

នៅ

ថ្ងៃព្រហស្បតិ៍ ១៤ ធ្នូ ២០២៣

ដោយ

ក្នុងកិច្ចប្រជុំនៃមេបញ្ជាការយោធាកំពូលកាលពីថ្ងៃពុធ ទី១៣ ខែធ្នូ រដ្ឋមន្ត្រីការពារជាតិកូរ៉េខាងត្បូងលោក Shin Won-sik បានគំរាមកម្ទេចប្រទេសកូរ៉េខាងជើងឲ្យហិនហោច ជាការសងសឹកចំពោះសកម្មភាពដែលមិនប្រុងប្រយ័ត្នណាមួយ។

រដ្ឋមន្ត្រីការពារជាតិកូរ៉េខាងត្បូងលោក Shin Won-sik (រូបថត៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តីព្រមានធ្ងន់ៗនេះកើតឡើង បន្ទាប់ពីកូរ៉េខាងជើងនិយាយកាលពីខែមុនថា ខ្លួននឹងលែងគោរពតាមកតិកាសញ្ញាយោធារវាងប្រទេសជិតខាងទាំងពីរឆ្នាំ២០១៨ ដែលមានគោលបំណងកាត់បន្ថយភាពតានតឹង ទៀតហើយ។

ការបញ្ជាក់របស់ទីក្រុងព្យុងយ៉ាង គឺក្រោយពេលកូរ៉េខាងត្បូងអះអាងថា ខ្លួននឹងផ្អាកមួយផ្នែកនៃកិច្ចព្រមព្រៀងនេះ បន្ទាប់ពីការបាញ់បង្ហោះផ្កាយរណបចារកម្មដោយកូរ៉េខាងជើង។

តាមសេចក្តីថ្លែងការណ៍របស់ក្រសួងការពារជាតិកូរ៉េខាងត្បូង ដែលដកស្រង់សម្តីរដ្ឋមន្ត្រីបានឲ្យដឹងថា “កូរ៉េខាងជើង មានជម្រើសតែ ២ ប៉ុណ្ណោះគឺសន្តិភាព ឬការបំផ្លិចបំផ្លាញ ។ ប្រសិនបើកូរ៉េខាងជើង ធ្វើសកម្មភាពដោយមិនប្រុងប្រយ័ត្ន ដែលបង្កគ្រោះថ្នាក់ដល់សន្តិភាពនោះ គឺមានតែការបំផ្លិចបំផ្លាញហិនហោចប៉ុណ្ណោះ ដែលកំពុងរង់ចាំពួកគេ”។

ប្រទេសកូរ៉េខាងជើង តែងតែនិយាយការពារ ការអភិវឌ្ឍមីស៊ីលនិងអាវុធនុយក្លេអ៊ែររបស់ខ្លួនថា ជាសិទ្ធិអធិបតេយ្យចាំបាច់ ដើម្បីទប់ទល់នឹងទង្វើរបស់សហរដ្ឋអាមេរិកនិងសម្ព័ន្ធមិត្តរបស់ពួកគេ។

កាលពីថ្ងៃអង្គារ កាសែត Rodong Sinmun ចុះផ្សាយថា “ការលុកលុយរបស់សហរដ្ឋអាមេរិក និងទង្វើពង្រឹងសម្ព័ន្ធភាព គឺជាដើមចមនៃភាពតានតឹងក្នុងតំបន់”។

សប្តាហ៍មុន ទីប្រឹក្សាសន្តិសុខជាតិអាមេរិក កូរ៉េខាងត្បូង និងជប៉ុន ដែលជួបប្រជុំគ្នានៅទីក្រុងសេអ៊ូល បានយល់ព្រមលើគំនិតផ្តួចផ្តើមថ្មី ដើម្បីឆ្លើយតបទៅនឹងការគំរាមកំហែងរបស់កូរ៉េខាងជើង រាប់ចាប់ពីការរំលោភបំពានរូបិយប័ណ្ណគ្រីបតូ រហូតដល់ការបាញ់បង្ហោះផ្កាយរណបក្នុងលំហ។

លើសពីនេះ កូរ៉េខាងត្បូងនិងសហរដ្ឋអាមេរិក នឹងបើកកិច្ចពិភាក្សាស្តីពីការទប់ស្កាត់នុយក្លេអ៊ែរនៅថ្ងៃសុក្រ ដែលជាផ្នែកមួយនៃការប្តេជ្ញាចិត្តរបស់ទីក្រុងវ៉ាស៊ីនតោន ជួយទីក្រុងសេអ៊ូលឲ្យយល់ដឹងបន្ថែមទៀតអំពីផែនការរបស់ខ្លួន ក្នុងករណីមានជម្លោះជាមួយកូរ៉េខាងជើង។

សូមបញ្ជាក់ថា សង្រ្គាមឆ្នាំ១៩៥០ ដល់ឆ្នាំ១៩៥៣ បានបញ្ចប់ទៅដោយបទឈប់បាញ់ មិនមែនសន្ធិសញ្ញាសន្តិភាពឡើយ ដូចនេះមានន័យថា បើតាមបច្ចេកទេស កូរ៉េទាំង ២ នៅតែស្ថិតក្នុងស្ថានភាពសង្រ្គាមជាមួយគ្នាដដែល ៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើង ផ្អាកកិច្ចព្រមព្រៀងយោធាជាមួយកូរ៉េខាងត្បូង ទាំងស្រុង