ទីក្រុង Da Nang របស់វៀតណាម គ្រោងជះលុយ ទិញមនុស្សយន្ត ដើម្បីពន្លត់អគ្គិភ័យ

គណៈកម្មាធិការប្រជាជនទីក្រុង Da Nang ភាគកណ្តាលប្រទេសវៀតណាម កាលពីថ្ងៃពុធបានដាក់សំណើទៅក្រុមប្រឹក្សាប្រជាជនក្រុង ដោយស្វែងរកការវិនិយោគប្រាក់ប្រហែល៧០ពាន់លានដុង (២.៩លានដុល្លារអាមេរិក) ដើម្បីទិញមនុស្សយន្តពន្លត់អគ្គិភ័យ និងឧបករណ៍បន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសំណើដែលដាក់ចេញក្នុងសម័យប្រជុំលើកទី១៥ នៃក្រុមប្រឹក្សាប្រជាជនទីក្រុង Da Nang បានបង្ហាញថា នៅទីក្រុងនេះ មានអគារកម្ពស់១០ជាន់ប្រហែល២០០អគារ ដែលភាគច្រើនជាសណ្ឋាគារ អាផាតមិន និងការិយាល័យ ហើយមានអគារជាច្រើនទៀត ដែលមានកម្ពស់ពី៣០ទៅ៤០ជាន់។

ទាំងនោះ គឺជាកន្លែងទាក់ទាញហ្វូងមនុស្សច្រើនកុះករ ជាហេតុបង្កហានិភ័យខ្ពស់នៃអគ្គិភ័យនិងការផ្ទុះនានា ហើយធ្វើឲ្យកិច្ចខិតខំប្រឹងប្រែងជួយសង្គ្រោះមានភាពស្មុគស្មាញ។

បើក្នុងករណីមានអគ្គិភ័យកើតឡើងមែន វាច្បាស់ណាស់ នឹងបង្កជាគ្រោះមហន្តរាយជាក់ជាមិនខាន ហេតុនេះហើយ ទើបទាមទារឲ្យមានការវិនិយោគលើគ្រឿងយន្ត និងឧបករណ៍ពន្លត់អគ្គិភ័យថ្មីៗ។

ដូច្នេះ ទីក្រុង​ បាន​ស្នើ​សុំ​ទិញរថយន្ត​ចំនួន៩គ្រឿង ម៉ាស៊ីន​ពន្លត់​អគ្គិភ័យ៧គ្រឿង ឧបករណ៍​សម្រាប់​ជួយសម្រួលដល់ការ​សង្គ្រោះ​នៅ​ក្នុងកន្លែងចង្អៀត និង​មនុស្សយន្ត​ពន្លត់​អគ្គិភ័យ​មួយ​គ្រឿង។

ការវិនិយោគសរុបសម្រាប់ឧបករណ៍ដែលបានស្នើឡើងទាំងនេះ បើគិតជាទឹកប្រាក់ស្មើប្រហែល៧០ពាន់លានដុង។

សូមបញ្ជាក់ថា ក្រៅពីការលើកកម្ពស់សមត្ថភាពពន្លត់អគ្គិភ័យ សម័យប្រជុំលើកទី១៥របស់ក្រុមប្រឹក្សាប្រជាជនទីក្រុង Da Nang ក៏គ្រោងនឹងពិនិត្យឯកសារចំនួន១៥៦ ទាក់ទងនឹងការអភិវឌ្ឍសេដ្ឋកិច្ចសង្គម និងជីវភាពរស់នៅរបស់ប្រជាជនផងដែរ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ Golden Bridge នៅ Da Nang ជាប់ឈ្មោះក្នុងចំណោមស្ពានល្បីបំផុតទាំង១០ លើពិភពលោក