លោក ហ្សេលេនស្គី ស្តីឲ្យអ្នករិះគន់៖ បើខ្លាំង ទៅសមរភូមិទៅ!

ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី បានប្រាប់ឲ្យអ្នករិះគន់គាត់ ទៅប្រយុទ្ធនៅសមរភូមិជួរមុខទៅ ជាជាងនៅស្តីបន្ទោសរដ្ឋាភិបាលរបស់គាត់។ លោកអះអាងថា គូប្រជែងនយោបាយទាំងឡាយ គួរតែគិតពីជម្លោះជាមួយរុស្ស៊ីជាចម្បង មុនគិតរឿងផ្សេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយពិធីករ Bret Baier របស់ទូរទស្សន៍ Fox News កាលពីថ្ងៃពុធទី១៣ខែធ្នូ លោក ហ្សេលេនស្គី ត្រូវបានគេស្នើសុំឲ្យឆ្លើយតប ទៅនឹងការចោទប្រកាន់ដែលថា គាត់ព្យាយាមពង្រឹងអំណាច ព្រោះរដ្ឋបាលរបស់គាត់បានបិទបណ្តាញព័ត៌មានសំខាន់ៗ ចាប់ខ្លួនមេដឹកនាំសាសនា និងប្រែក្លាយអ៊ុយក្រែនទៅជា “រដ្ឋផ្តាច់ការ”។

ស្របពេលជាមួយគ្នានោះដែរ លោក Baier បានលើកឡើងពីកត់សម្គាល់នាពេលថ្មីៗរបស់ អភិបាលក្រុង កៀវ លោក Vitaly Klitschko ដែលនិយាយថា សកម្មភាពរបស់រដ្ឋាភិបាលកាន់តែតឹងរ៉ឹង ហើយអាស្រ័យលើការចង់បានរបស់មនុស្សតែម្នាក់។

ពិធីករ Fox ក៏បានលើកឡើងផងដែរពីករណីរបស់ Metropolitan Pavel ដែលជាអាចារ្យគ្រិស្តអូស្សូដក់នៅវត្ត Kiev-Pechersk Lavra ដែលត្រូវបានគេឃុំខ្លួនក្នុងផ្ទះកាលពីដើមឆ្នាំនេះ ជុំវិញការចោទប្រកាន់ចំពោះសកម្មភាព ពាក់ព័ន្ធយោធារបស់រុស្ស៊ី។

ប្រធានាធិបតីអ៊ុយក្រែន ​បាន​ច្រានចោល​ការចោទប្រកាន់ទាំងនេះ ដោយ​ស្តីឲ្យ​អ្នក​រិះគន់គាត់ថា “ខ្ញុំសូមនិយាយទៅកាន់មនុស្សបែបនេះពីរដ្ឋាភិបាលឬអភិបាលក្រុង។ សូមគិតពីសង្រ្គាម គិតពីរបៀបការពារប្រជាជនរបស់យើង។ កុំ​ធ្វើ​ដំណើរ​ឆ្លង​កាត់​ពិភពលោក​​រាល់​ថ្ងៃ បើខ្លាំងធ្វើដំណើរទៅសមរភូមិជួរមុខទៅ! ហើយ​កុំ​យំ ព្រោះ​អ្នក​ជាមេ​ដឹក​នាំ”។

សូមបញ្ជាក់ បទសម្ភាសរបស់លោក ហ្សេលេនស្គី ជាមួយទូរទស្សន៍ Fox កើតឡើងក្នុងអំឡុងពេលគាត់ធ្វើដំណើរទៅកាន់សហរដ្ឋអាមេរិកក្នុងសប្តាហ៍នេះ ដែលគាត់បានអំពាវនាវសុំឲ្យមានការគាំទ្រផ្នែកយោធាខ្លាំងជាងមុន៕

ប្រែសម្រួល៖ Vann Vann

ប្រភព៖ RT

ចុចអាន៖ អាល្លឺម៉ង់ អាច ប្រកាស អាសន្នក្នុងប្រទេស ដោយសារ អ៊ុយក្រែន