យោធា អ៊ីស្រាអែល ភ្នាត់ស្នៀតសម្លាប់ឈ្លើយសឹកជនជាតិខ្លួនឯងក្នុងការ​ប្រយុទ្ធគ្នាជាមួយក្រុមហាម៉ាស

កងកម្លាំងការពារអ៊ីស្រាអែល (IDF) កាលពីថ្ងៃសុក្របានទទួលស្គាល់ថា យោធាអ៊ីស្រាអែលបានភ្នាត់ស្នៀតសម្លាប់ចំណាប់ខ្មាំងចំនួន ៣ នាក់ អំឡុងការប្រយុទ្ធគ្នាជាមួយក្រុមប្រដាប់អាវុធប៉ាឡេស្ទីនហាម៉ាសនៅក្នុងតំបន់ហ្គាហ្សាស្រ្ទីប ។

អ្នកនាំពាក្យយោធាអ៊ីស្រាអែលលោក Daniel Hagari បាននិយាយថា “ក្នុងអំឡុងពេលប្រយុទ្ធគ្នានោះ យោធាបានច្រឡំកំណត់អត្តសញ្ញាណចំណាប់ខ្មាំងអ៊ីស្រាអែលទាំង ៣ នាក់នោះថាជាការគំរាមកំហែង ហើយជាលទ្ធផលទាហានបានបាញ់សម្លាប់សម្លាប់ពួកគេតែម្ដង” ។

យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា “ហេតុការណ៍នេះគឺជាមេរៀនដែលយោធារបស់យើងត្រូវរៀនសូត្រ ហើយយោធាក៏សូមសម្ដែងនូវវិប្បដិសារី ក៏ដូចជាការសោកស្ដាយចំពោះឧបទ្ទវហេតុដ៏សោកនាដកម្មនេះ ជាពិសេសក៏សូមចូលរួមរំលែកទុក្ខដ៏ក្រៀមក្រំចំពោះក្រុមគ្រួសារនៃសពផងដែរ” ។

យោធាអ៊ីស្រាអែលបានបញ្ជាក់ទៀតថា អ្នកទាំង ៣ នាក់ស្ថិតក្នុងចំណោមចំណាប់ខ្មាំងជិត ២៥០ នាក់ដែលត្រូវបានចាប់ខ្លួនដោយក្រុមប្រដាប់អាវុធប៉ាឡេស្ទីនហាម៉ាសចេញពីតំបន់ Kibbutz Kfar Aza ក្នុងអំឡុងពេលការវាយប្រហារដ៏គួរឲ្យរន្ធត់ និងភ្ញាក់ផ្អើលបំផុតកាលពីថ្ងៃទី៧ ខែតុលា ។

ចាប់តាំងពីព្រឹត្តិការណ៍ ៧ តុលានោះមក ក្រុមប្រដាប់អាវុធប៉ាឡេស្ទីនហាម៉ាស បានសម្លាប់ជនស៊ីវិលរស់នៅលើទឹកដីនៃប្រទេសអ៊ីស្រាអែលប្រមាណ ១,២០០ នាក់ ហើយសង្គ្រាមក៏កាន់តែពុះកញ្ជ្រោលខ្លាំងឡើងៗផងដែរ ពោលចាប់តាំងពីថ្ងៃទី១ ខែធ្នូ ក្រោយការផ្អាកបាញ់មនុស្សធម៌អស់សុពលភាព ខណៈចំណាប់ខ្មាំងប្រមាណ ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាស ។

រហូតមកដល់ពេលនេះ សង្គ្រាមរវាងអ៊ីស្រាអែល និងក្រុមប្រដាប់អាវុធហាម៉ាសបានបន្តអូសបន្លាយពេលជាង ២ ខែមកហើយ ដោយក្នុងនោះទាហានអ៊ីស្រាអែលជាង ១១០ នាក់បានបាត់បង់ជីវិត ខណៈនៅតំបន់ហ្គាហ្សាវិញមានជនស៊ីវិលជាង ១៨,៨០០ នាក់ត្រូវបានសម្លាប់ និង ៥១,០០០ នាក់រងរបួស ក្រោយការវាយប្រហារមិនប្រណីដៃពីសំណាក់កងកម្លាំងរបស់លោក Netanyahu ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ីស្រាអែល ទម្លាក់ខិត្តប័ណ្ណផ្ដល់រង្វាន់ ៤០ ម៉ឺនដុល្លារសម្រាប់ព័ត៌មានឈាន ដល់ការចាប់ខ្លួនមេក្រុមហាម៉ាស