អ៊ុយក្រែន ដាក់ប្រមុខព្រះវិហាររុស្ស៊ី ក្នុងបញ្ជីតាមចាប់ខ្លួន

កាលពីថ្ងៃសុក្រទី១៥ខែធ្នូ  ប្រមុខព្រះវិហារសាសនាគ្រិស្ត Orthodox របស់រុស្ស៊ី ដែលជាអ្នកគាំទ្រសង្គ្រាមរយៈពេល២១ខែរបស់ទីក្រុងមូស្គូប្រឆាំងទីក្រុងកៀវ ត្រូវបានក្រសួងមហាផ្ទៃអ៊ុយក្រែន ដាក់ក្នុងបញ្ជីតាមចាប់ខ្លួន បន្ទាប់ពីសេវាសន្តិសុខចោទប្រកាន់សង្ឃអង្គនេះថា ញុះញង់សង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបង្ហាញពីវិធានការចុងក្រោយបំផុត ​ក្នុង​យុទ្ធនាការ​របស់​អ៊ុយក្រែន​ដើម្បីបំបាត់​ឥទ្ធិពល​របស់​បព្វជិត Kirill ​ដែល​ប្រកាន់ចំណងទាក់ទង​ជិតស្និទ្ធ​ជាមួយ​រុស្ស៊ី និង​ធ្វើ​ឲ្យ​សង្គម​អ៊ុយក្រែនខ្ទេចខ្ទាំ។

អ៊ុយក្រែន បានបង្ហាញរូបសង្ឃអង្គនេះច្បាស់ៗក្នុងបញ្ជីតាមចាប់ខ្លួន ហើយហៅសង្ឃអង្គនេះថាជា បុគ្គលដែលរត់គេចខ្លួនពីការស៊ើបអង្កេតមុនពេលកាត់ក្តី។

គ្រិស្តសាសនា Orthodox គឺជាជំនឿលេចធ្លោក្នុងប្រទេសអ៊ុយក្រែន ហើយអាជ្ញាធរក្នុងទីក្រុងកៀវ បានបើកសំណុំរឿងឧក្រិដ្ឋកម្មប្រឆាំងនឹងបព្វជិតទាំងឡាយ ដែលមានទំនាក់ទំនងជាមួយសាខានៃព្រះវិហារគ្រិស្ត Orthodox។

សភានៅទីក្រុងកៀវ ក៏កំពុងពិចារណាលើសេចក្តីព្រាងច្បាប់មួយ ដែលនឹងហាមប្រាមសាខានៃព្រះវិហារនេះផងដែរ បន្ទាប់ពីអ្នកកាន់សាសនារបស់ខ្លួនជាច្រើននាក់ លែងមានជំនឿ ចាប់តាំងពីមេដឹកនាំវិមានក្រឹមឡាំង លោក វ្ល៉ាឌីមៀរ ពូទីន បញ្ជូនកងទ័ពរុស្ស៊ីចូលទៅក្នុងប្រទេសអ៊ុយក្រែនក្នុងខែកុម្ភៈឆ្នាំ២០២២។

កាលពីខែមុន សេវាសន្តិសុខ SBU របស់អ៊ុយក្រែន បានចេញឯកសារមួយ ដែលនិយាយថា ព្រះសង្ឃ Kirill បានរំលោភលើអធិបតេយ្យអ៊ុយក្រែន ដោយសារតែភាពជិតស្និទ្ធជាមួយដឹកនាំយោធា និងនយោបាយរបស់រុស្ស៊ី។

ក្រោយមក កងកម្លាំងសន្តិសុខ បានបើកសំណុំរឿងព្រហ្មទណ្ឌរាប់សិបករណី រួមទាំងការចោទប្រកាន់ពីបទក្បត់ជាតិផងដែរប្រឆាំងនឹងបព្វជិត និងមន្ត្រីដែលមានទំនាក់ទំនងជាមួយសាខានៃព្រះវិហារដែលជាប់ទាក់ទងនឹងទីក្រុងមូស្គូ៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក ពូទីន៖ អ៊ុយក្រែន កំពុងបញ្ជូនទាហានទៅស្លាប់