អាមេរិក អនុម័តលក់អាវុធនិងឧបករណ៍តម្លៃ ៣០០លានដុល្លារ ឲ្យ តៃវ៉ាន់

តាមការបញ្ជាក់ពីមន្ទីរបញ្ចកោណកាលពីថ្ងៃសុក្រទី១៥ខែធ្នូ ក្រសួងការបរទេសសហរដ្ឋអាមេរិក បានអនុម័តការលក់អាវុធនិងឧបករណ៍នានាសរុបតម្លៃ ៣០០លានដុល្លារដើម្បីជួយពង្រឹងប្រព័ន្ធព័ត៌មានយុទ្ធសាស្ត្ររបស់តៃវ៉ាន់ ហើយវាក្លាយជាការលក់ចុងក្រោយបំផុត ដែលសហរដ្ឋអាមេរិក អនុម័តសម្រាប់ការពារកោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារកិច្ចសហប្រតិបត្តិការសន្តិសុខការពារជាតិរបស់មន្ទីរបញ្ចកោណ បាននិយាយថា ការលក់នេះគឺសម្រាប់ការគាំទ្រវដ្តជីវិតជាបន្ត ដើម្បីរក្សាសមត្ថភាពបញ្ជាការ ការគ្រប់គ្រង ទំនាក់ទំនង និងយុទ្ធសាស្រ្តរបស់តៃវ៉ាន់។

រដ្ឋាភិបាលអាមេរិក បានជូនដំណឹងនេះដល់សភា ហើយការលក់ក៏កើតឡើងផងដែរ ចំពេលចិន បង្កើនវត្តមានយោធា នៅជុំវិញកោះតៃវ៉ាន់។

ទន្ទឹមនោះ ការិយាល័យប្រធានាធិបតីតៃវ៉ាន់និយាយថា កិច្ចព្រមព្រៀងលក់អាវុធលើកទី១២ដោយរដ្ឋបាលរបស់ប្រធានាធិបតី ចូ បៃដិន ដល់ទីក្រុងតៃប៉ិ គឺបង្ហាញពីសារៈសំខាន់ ដែលរដ្ឋាភិបាលសហរដ្ឋអាមេរិក យកចិត្តទុកដាក់យ៉ាងខ្លាំងចំពោះតម្រូវការការពាររបស់កោះនេះ។

តៃវ៉ាន់ បានត្អូញត្អែរអំពីសកម្មភាពយោធាចិនម្តងហើយម្តងទៀតនៅជិតកោះនេះ ក្នុងរយៈពេល៤ឆ្នាំកន្លងមក ខណៈទីក្រុងប៉េកាំង ព្យាយាមអះអាងការទាមទារអធិបតេយ្យរបស់ខ្លួន។

ក្រសួងការពារជាតិតៃវ៉ាន់ បាននិយាយនៅព្រឹកថ្ងៃសៅរ៍ថា ក្នុងរយៈពេល២៤ម៉ោងមុន ខ្លួនបានរកឃើញយន្តហោះយោធាចិនចំនួន៩គ្រឿង ឆ្លងកាត់ខ្សែបន្ទាត់កណ្តាលដ៏រសើបនៃច្រកសមុទ្រតៃវ៉ាន់។

ខ្សែបន្ទាត់នេះ ធ្លាប់ដើរតួជារបាំងមិនផ្លូវការរវាងកងទ័ពទាំងពីរ ប៉ុន្តែពេលនេះ​ កងទ័ពអាកាសចិនបានបញ្ជូនយន្តហោះរបស់ខ្លួនឆ្លងកាត់វាជាប្រចាំ ទោះបីជាពួកគេមិនបានហោះហើរចូលទៅក្នុងដែនអាកាសរបស់តៃវ៉ាន់ក៏ដោយ៕

ប្រែសម្រួល៖ Vann Vann

ប្រភព៖ TRT

ចុចអាន៖ អាមេរិក សម្រេចផ្ដល់កញ្ចប់ជំនួយយោធា ៨០ លានដុល្លារដល់ តៃវ៉ាន់