ព័ត៌មានអន្ដរជាតិ

មេបក្សប្រឆាំង អ៊ីស្រាអែល អំពាវនាវឲ្យមានការបោះឆ្នោតជ្រើសរើសនាយករដ្ឋមន្ត្រីថ្មី ទោះប្រទេសកំពុងជាប់ដៃធ្វើសង្គ្រាម

បានផុស

៩ ខែ មុន

នៅ

ថ្ងៃចន្ទ ១៨ ធ្នូ ២០២៣

ដោយ

មេដឹកនាំគណបក្សប្រឆាំងរបស់អ៊ីស្រាអែល លោក Yair Lapid កាលពីថ្ងៃអាទិត្យបានអំពាវនាវឲ្យមានការបោះឆ្នោតជ្រើសរើសនាយករដ្ឋមន្ត្រីថ្មីភ្លាមៗ ដោយមិនខ្វល់ថា ប្រទេសកំពុងជាប់ដៃធ្វើសង្គ្រាមជាមួយក្រុមប្រដាប់អាវុធប៉ាឡេស្ទីនហាម៉ាសនៅតំបន់ហ្គាហ្សាស្ទ្រីបនោះឡើយ ។

លោក Lapid បានប្រាប់កាសែត Yedioth Ahronoth ថា “លោក Benjamin Netanyahu មិនអាចបន្តអង្គុយកាន់តំណែងជានាយករដ្ឋមន្ត្រីអ៊ីស្រាអែលបានទៀតនោះទេ ហើយការបោះឆ្នោតក៏អាចធ្វើឡើង ក្នុងអំឡុងពេលប្រទេសមានសង្រ្គាមផងដែរ” ។

នេះជាលើកទីមួយហើយសម្រាប់មេដឹកនាំគណបក្សប្រឆាំងអ៊ីស្រាអែល ដែលអំពាវនាវឲ្យមានការបោះឆ្នោតភ្លាមៗ ទាំងដែលប្រទេសបើកប្រតិបត្តិការសងសឹកនៅក្នុងតំបន់ដែលកំពុងត្រូវបានឡោមព័ទ្ធ ខណៈការអំពាវនាវានេះបានកើតមានឡើង ចំពេលមានការរិះគន់កាន់តែខ្លាំងឡើងលើលោក Netanyahu ជុំវិញការអសមត្ថភាពមិនអាចទប់ស្កាត់ចំពោះការវាយប្រហារឆ្លងព្រំដែនដោយក្រុមហាម៉ាសកាលពីថ្ងៃទី៧ ខែតុលា ។

បើយោងតាមការស្ទង់មតិនាពេលថ្មីៗនេះដែលធ្វើឡើងវិទ្យាស្ថាន Lazar និងចេញផ្សាយដោយកាសែត Maariv របស់អ៊ីស្រាអែលបានឲ្យដឹងថា មានតែ ២៧ ភាគរយប៉ុណ្ណោះនៃប្រជាជនអ៊ីស្រាអែលទុកចិត្តលោក Netanyahu គឺជាមេដឹកនាំត្រឹមត្រូវក្នុងការដឹកនាំរដ្ឋាភិបាល ខណៈ ៤៩ ភាគរយពេញចិត្តលោក Benny Gantz មេដឹកនាំគណបក្សរួបរួមជាតិ គឺជាឥស្សរជនដ៏ល្អបំផុតក្នុងការដឹកនាំរដ្ឋាភិបាលរបស់អ៊ីស្រាអែល ។

ទន្ទឹមនោះ ប្រជាជនអ៊ីស្រាអែលជាច្រើនរំពឹងថា ការស៊ើបអង្កេតក្រោយសង្គ្រាមលើការវាយប្រហាររបស់ក្រុមហាម៉ាស នឹងបញ្ចប់អាជីពនយោបាយរបស់លោក Netanyahu ក្រោយលោកត្រូវបានបោះឆ្នោតជ្រើសរើសជានាយករដ្ឋមន្ត្រីនៅចុងឆ្នាំ ២០២២ ខណៈនាយករដ្ឋមន្ត្រីរូបនេះក៏មិនទាន់ចេញការឆ្លើយតបណាមួយទៅកាន់លោក Lapid ផងដែរ ។

គួរបញ្ជាក់ថា អ៊ីស្រាអែលបានបើកការវាយប្រហារតាមផ្លូវអាកាស និងដីគោកលើតំបន់ហ្គាហ្សាស្ទ្រីប ជាការសងសឹកចំពោះការវាយឆ្មក់របស់ក្រុមហាម៉ាស ដោយបានសម្លាប់ជនជាតិប៉ាឡេស្ទីនយ៉ាងតិច ១៨,៨០០ នាក់ ដែលភាគច្រើនជាកុមារ និងស្ត្រី និង ៥១,០០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាស ៕