លោក ពូទីន៖ ជម្លោះអ៊ុយក្រែន លាតត្រដាងការពិតអំពីសព្វាវុធលោកខាងលិច

តាមការបញ្ជាក់ពីប្រធាធិបតីរុស្ស៊ីលោក វ្ល៉ាឌីមៀរ ពូទីន បានឲ្យដឹងថា អ៊ុយក្រែនកំពុងប្រឈមមុខនឹងបរាជ័យនៅសមរភូមិដ៏សំខាន់ ហើយការវាយលុករបស់ទីក្រុងកៀវ មិនអាចបំពេញចិត្តអ្នកគាំទ្ររបស់ពួកគេនៅបរទេសបានទេ ជាពិសេសជម្លោះអ៊ុយក្រែន បានលាតត្រដាងឲ្យឃើញការពិត អំពីសព្វាវុធលោកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំក្រុមប្រឹក្សាក្រសួងការពារជាតិកាលពីថ្ងៃអង្គារ ទី១៩ ខែធ្នូនៅទីក្រុងមូស្គូ លោក ពូទីន បានចង្អុលបង្ហាញថា កងកម្លាំងរបស់ទីក្រុងកៀវ កំពុងមានបញ្ហាទាំងនេះ បើទោះបីជាទទួលបានឧបករណ៍យោធាលោកខាងលិចទំនើបៗក៏ដោយ។

ស្របពេលជាមួយគ្នានោះ រដ្ឋមន្ត្រីការពារជាតិរុស្ស៊ី លោក Sergey Shoigu បាននិយាយក្នុងអំឡុងកិច្ចប្រជុំថា អ៊ុយក្រែន បានបាត់បង់រថក្រោះនិងយានប្រយុទ្ធថ្មើរជើងជាង ១៤០០០ គ្រឿង ចាប់តាំងពីរុស្ស៊ី បើកប្រតិបត្តិការយោធានៅក្នុងប្រទេសនេះ។

ក្នុងជម្លោះអ៊ុយក្រែន ប្រទេសមួយចំនួនដូចជាសហរដ្ឋអាមេរិក អាល្លឺម៉ង់ បារាំង និងចក្រភពអង់គ្លេស បានផ្គត់ផ្គង់គ្រឿងសឹកធុនធ្ងន់ផលិតដោយលោកខាងលិចរាប់រយគ្រឿងដល់ទីក្រុងកៀវ ដូចជារថក្រោះ Leopard 2, Abrams និង Challenger ក៏ដូចជាយានប្រយុទ្ធថ្មើរជើង Bradley និងសព្វាវុធផ្សេងៗទៀតផងដែរ ។

កាលពីដើមខែនេះ ទាហានរុស្ស៊ីក្នុងប្រទេសអ៊ុយក្រែន បានរឹបអូសឧបករណ៍ធុនធ្ងន់ផ្សេងទៀតដែលផលិតដោយសហរដ្ឋអាមេរិក និងអាល្លឺម៉ង់។ ក្នុងវីដេអូមួយដែលត្រូវបានបង្ហោះដោយអ្នកកាសែតរុស្ស៊ី Vladimir Soloviev, កងទ័ពរុស្ស៊ីអាចត្រូវបានគេមើលឃើញ ចូលទៅជិតរថក្រោះ Leopard 2A4 ដែលទាហានអ៊ុយក្រែនបោះបង់ចោលទៀតផង។

ហើយកាលពីខែសីហា ក្រសួងការពារជាតិរុស្ស៊ី ថែមទាំងបានរៀបចំការតាំងពិព័រណ៍អាវុធលោកខាងលិចដែលរឹបអូសបាននៅជិតទីក្រុងមូស្គូផងដែរ ដោយបង្ហាញសព្វាវុធនិងគ្រឿងសឹកច្រើនប្រភេទរាប់ចាប់ពីរថពាសដែកអាមេរិក M-113 និង CV90-40s របស់ស៊ុយអែត រហូតដល់រថក្រោះ AMX-10RCR របស់បារាំង និងរថពាសដែក Bushmaster របស់អូស្ត្រាលី។

សរុបមក ការតាំងពិព័រណ៌នោះ បានបង្ហាញពីសព្វាវុធជាង៨៧០ប្រភេទ ដែលរឹបអូសដោយកងកម្លាំងរុស្ស៊ី រួមទាំងគ្រឿងសឹកផលិតដោយសូវៀត និងអ៊ុយក្រែនផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន ចាត់វិធានការឆ្លើយតបទៅ ហ្វាំងឡង់ ចំពោះការចូលអង្គការណាតូ