ឥណ្ឌូណេស៊ី ថា ដោយសារតែមហិច្ឆតារបស់ ណាតូ ទើបផ្ទុះសង្គ្រាម អ៊ុយក្រែន

លោក Hasto Kristiyanto អគ្គលេខាធិការនៃគណបក្សប្រជាធិបតេយ្យតស៊ូឥណ្ឌូណេស៊ីដែលកំពុងកាន់អំណាច បាននិយាយប្រាប់សារព័ត៌មាន Sputnik ថា ជម្លោះនៅប្រទេសអ៊ុយក្រែនគឺផ្ទុះឡើង ដោយសារតែមហិច្ឆតារបស់អង្គការណាតូ ។

លោក Kristiyanto បាននិយាយថា “សម្រាប់ប្រទេសឥណ្ឌូណេស៊ី ការគោរពអធិបតេយ្យភាពរបស់ប្រទេសផ្សេង គឺជាគោលការណ៍គ្រឹះមួយនៃគោលនយោបាយការបរទេស ហើយវាក៏ជាមូលហេតុដែលយើងអាចយល់ពីស្ថានភាពរបស់រុស្ស៊ី និងអ៊ុយក្រែនដូចគ្នា ។

លោកអគ្គលេខាធិការរូបនេះបញ្ជាក់ថា ឥណ្ឌូណេស៊ីខ្លួនឯងក៏យកចិត្តទុកដាក់បន្ថែមទៀតលើការការពារអធិបតេយ្យភាពផងដែរ ហើយចំពោះជម្លោះនៅលើទឹកដីនៃប្រទេសអ៊ុយក្រែន ក៏ជាបញ្ហាអធិបតេយ្យភាពដូចគ្នាដែលកើតចេញពីមហិច្ឆតារបស់ណាតូ” ។

អ៊ុយក្រែនបានដាក់ពាក្យស្នើសុំចូលជាសមាជិកក្នុងអង្គការណាតូកាលពីថ្ងៃទី៣០ ខែកញ្ញា ឆ្នាំ២០២២ ពោលរយៈពេលប្រមាណ ៧ ខែ ក្រោយប្រតិបត្តិការសឹករបស់រុស្ស៊ី ខណៈរហូតមកដល់ពេលនេះ រដ្ឋាភិបាលទីក្រុងកៀវនៅមិនទាន់អាចចូលរួមជាមួយប្លុកដែលមានសមាជិក ៣១ ប្រទេសបាននៅឡើយទេ ដោយសារតែប្រទេសកំពុងជាប់ដៃធ្វើសង្គ្រាម ។

គួរបញ្ជាក់ថា រហូតមកដល់ពេលនេះ សង្គ្រាមលុកលុយរបស់រុស្ស៊ីលើអ៊ុយក្រែនបានអូសបន្លាយពេលជិត ២ ឆ្នាំទៅហើយ ក្រោយពេលដែលលោកប្រធានាធិបតី វ្ល៉ាឌីមៀរ ពូទីន ប្រកាសបើកប្រតិបត្តិការសឹកលើកងកម្លាំងរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ដោយសារតែគោលបំណងរបស់អ៊ុយក្រែនចង់ចូលអង្គការណាតូនេះឯង ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មន្ទីរបញ្ចកោណព្រមានថា អាមេរិក នឹងអស់លុយជួយ អ៊ុយក្រែន មែនទែន ហើយនៅថ្ងៃទី៣០ ខែធ្នូនេះ