រុស្ស៊ី ព្រមានកុំឲ្យជម្លោះ អ៊ីស្រាអែល-ប៉ាឡេស្ទីន ឆេះរាលដាលដល់ប្រទេស​ជាមិត្តរបស់ខ្លួន

ឯកអគ្គរដ្ឋទូតរងរបស់រុស្ស៉ីប្រចាំអង្គការសហប្រជាជាតិ លោក Dmitry Polyansky កាលពិថ្ងៃព្រហស្បតិ៍បានចេញការព្រមានធ្វើយ៉ាងណាកុំឲ្យជម្លោះរវាងអ៊ីស្រាអែលជាមួយនឹងក្រុមប្រដាប់អាវុធប៉ាឡេស្ទីនហាម៉ាស ផ្ទុះឆេះរាលដាលទៅប្រទេសជិតខាងស៊ីរីឲ្យសោះ ។

អ្នកការទូតរូបនេះបាននិយាយនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថា “ការបាញ់បោះមិនធ្លាប់មានពីមុនមកនៅក្នុងតំបន់ជម្លោះ ប៉ាឡេស្ទីន-អ៊ីស្រាអែល ដែលបណ្ដាលឲ្យមានអ្នកស្លាប់ និងរបួសរាប់ម៉ឺននាក់ កំពុងបង្កភាពតានតឹងបន្ថែមទៀតនៅក្នុងប្រទេសជាមិត្តរបស់យើងគឺស៊ីរី ដូច្នេះយើងសូមប្រឆាំងនឹងរឿងរ៉ាវដែលនៅពីក្រោយប្រតិបត្តិការបង្ហូរឈាមរបស់អ៊ីស្រាអែលនៅតំបន់ហ្គាហ្សាស្ទ្រីប ក៏ដូចជាការវាយឆ្មក់ឥតប្រណីដៃនៅតំបន់ West Bank ដើម្បីកុំឲ្យមានភ្លើងឆេះរោលកាន់តែសន្ធោសន្ធៅឡើងអី” ។

លោក Polyansky បញ្ជាក់ទៀតថា “ការវាយឆ្មក់តាមអាកាសរបស់អ៊ីស្រាអែលកាន់តែញាប់ដៃជាងមុនទៅលើទីតាំងរបស់ស៊ីរី ក៏ដូចជាការផ្លាស់ប្ដូរយុទ្ធសាស្ត្រវាយប្រហារកាន់តែខ្លាំងឡើងនៅទូទាំងខ្សែបន្ទាត់ព្រំដែនរវាងប្រទេសលីបង់ និងអ៊ីស្រាអែល គឺសុទ្ធសឹងតែជាការប្រថុយប្រថាន និងអូសទាញស៊ីរីឲ្យធ្លាក់ចូលទៅក្នុងការប្រឈមមុខដាក់គ្នាក្នុងតំបន់ទាំងមូល មិនថាក្នុងរូបភាពណាមួយឡើយ” ។

លោកបានបន្ថែមថា “បច្ចុប្បន្នស្ថានភាពនៅក្នុងប្រទេស៊ីរីកំពុងជួបការរងទុក្ខវេទនារួចទៅហើយ ជាពិសេសសកម្មភាពរបស់ក្រុមភេរវករ ការបាញ់បោះ ក៏ដូចជាការប្រយុទ្ធគ្នារវាងក្រុមឧទ្ទាម Kurds និងក្រុមជីវពលគាំទ្រដោយតួកគី បូករួមជាមួយនឹងស្ថានភាពអស្ថិរភាពនៅភាគខាងត្បូងនៃប្រទេសជាដើម” ។

គួរបញ្ជាក់ថា អ៊ីស្រាអែលបានបើកការវាយប្រហារតាមផ្លូវអាកាស និងដីគោកលើតំបន់ហ្គាហ្សាស្ទ្រីប ជាការសងសឹកចំពោះការវាយឆ្មក់របស់ក្រុមហាម៉ាស ដោយបានសម្លាប់ជនជាតិប៉ាឡេស្ទីនជិត ២ ម៉ឺននាក់ហើយ ដែលភាគច្រើនជាកុមារ និងស្ត្រី និងជាង ៥២,០០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាស ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក Netanyahu ទុក ២ ជម្រើសឲ្យ ក្រុម ហាម៉ាស