សីតុណ្ហភាពនៅខេត្តភាគខាងជើង វៀតណាម ធ្លាក់ចុះដល់ -២ អង្សាសេ ខណៈតំបន់ខ្លះគ្របដណ្ដប់ដោយទឹកកក

ភ្នំ Mau Son ក្នុង​ខេត្ត Lang Son ភាគខាងជើងរបស់ប្រទេសវៀតណាមបានជួបប្រទះនូវសីតុណ្ហភាពរងាញ័រញាក់ដល់ -២ អង្សាសេ ស្របពេលដែលសីតុណ្ហភាពនៅទីក្រុងហាណូយធ្លាក់ចុះ ១០ អង្សាសេ ខណៈនៅតំបន់ទំនាប សីតុណ្ហភាពពេលថ្ងៃជាមធ្យមគឺទាបជាង ១៥ អង្សាសេ និងក្រោម ១៣ អង្សាសេនៅតំបន់ខ្ពង់រាប ។

យោងតាមមជ្ឈមណ្ឌលជាតិសម្រាប់ការព្យាករណ៍ឧតុនិយមបានឲ្យដឹងនៅថ្ងៃសុក្រនេះថា តំបន់ចំនួន ២៣ ក្នុងចំណោមតំបន់ទាំង ២៥ នៅភាគខាងជើងមានសីតុណ្ហភាពធ្លាក់ចុះក្រោម ១០ អង្សាសេ ខណៈតំបន់ចំនួន ១០ ក្នុងចំណោមតំបន់ចំនួន ២៣ នោះ ជួបប្រទះសីតុណ្ហភាពក្រោម ៥ អង្សាសេ ។

ចំណែកទីភ្នាក់ងារព្យាករណ៍អាកាសធាតុរបស់សហរដ្ឋអាមេរិក AccuWeather ក៏បានឲ្យដឹងនៅថ្ងៃសុក្រនេះដែរថា សីតុណ្ហភាពនៅទីក្រុងហាណូយនឹងមានចន្លោះពី ៩ ទៅ ១៨ អង្សាសេ ខណៈនៅថ្ងៃបុណ្យណូអែលវិញ សីតុណ្ហភាពនឹងចុះត្រជាក់ដល់ ១៣ អង្សាសេ ។

ស្របពេលជាមួយគ្នានេះ តំបន់ភ្នំមួយចំនួនដូចជា Sa Pa, Pha Din ក្នុង​ខេត្ត Dien Bien និងតំបន់ភ្នំ Dong Van នៅខេត្ត Ha Giang មាន​សីតុណ្ហភាព​ប្រហែល ៣ ​អង្សាសេ ខណៈនៅតំបន់ភ្នំ La Pan នៅខេត្ត Yen Bai កំពុងគ្របដណ្ដប់ដោយព្រិល និងទឹកកក ។

គួរបញ្ជាក់ថា ភាគច្រើននៃទឹកកកទាំងនោះគឺមាននៅកម្ពស់ ១,៧០០ ម៉ែត្រពីលើនីវ៉ូទឹកសមុទ្រ ហើយនៅពេលថ្ងៃត្រង់ទឹកកកក៏មិនរលាយនោះដែរ ហើយដោយសារតែឥទ្ធិពលនៃខ្យល់ត្រជាក់ ទើបធ្វើឲ្យតំបន់ទំនាបកណ្តាលដូចជា Thanh Hoa, Nghe An និង Ha Tinh មានសីតុណ្ហភាពធ្លាក់ចុះដល់ ១០ ទៅ ១២ អង្សាសេ ៕

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ មេយោធា អាមេរិក និងចិន និយាយគ្នាតាមវីដេអូខលរឿងសន្តិសុខក្នុងតំបន់ និងលើពិភពលោក