សង្គ្រាម ហ្គាហ្សា នឹងកាន់តែរីកធំ ក្រោយគ្រាប់រ៉ុកកែតបាញ់រះចេញពីទឹកដី លីបង់ សម្លាប់ទាហាន អ៊ីស្រាអែល

សង្គ្រាមរវាងអ៊ីស្រាអែលជាមួយនឹងក្រុមប្រដាប់អាវុធប៉ាឡេស្ទីនហាម៉ាសនៅតំបន់ហ្គាហ្សាអាចនឹងកាន់តែរីកធំទៅៗ បន្ទាប់ពីមានការបាញ់បោះរ៉ុកកែតជាច្រើនគ្រាប់ចេញពីទឹកដីលីបង់សម្លាប់ទាហានអ៊ីស្រាអែលម្នាក់ និងម្នាក់ទៀតរងរបួសនៅក្នុងតំបន់ព្រំដែននៃប្រទេសទាំងពីរ ។

កងកម្លាំងការពារអ៊ីស្រាអែល (I​DF) បាននិយាយនៅក្នុងសេចក្តីថ្លែងការណ៍មួយថា ទាហានរបស់យើងបានត្រូវគ្រាប់ស្លាប់បាត់បង់ជីវិត និងរងរបួស ក្នុងអំឡុងពេលចេញសកម្មភាពប្រតិបត្តិការជាប្រចាំនៅក្នុងតំបន់ Shtula ភាគខាងជើងនៃប្រទេសអ៊ីស្រាអែល ។

សេចក្តីថ្លែងការណ៍បានបន្ថែមថា “ក្រៅពីគ្រាប់រ៉ុកកែត ក៏មានការបាញ់បោះកាំភ្លើងត្បាល់មួយចំនួនធំផងដែរចេញពីទឹកដីនៃប្រទេសលីបង់ហោះឆ្ពោះទៅកាន់ទីក្រុង Metula នៅជិតតំបន់ព្រំដែនប្រទេសទាំងពីរ ខណៈការបាញ់រះនោះត្រូវបានគេដឹងថាជាស្នាដៃរបស់ក្រុមហេសបូឡារបស់លីបង់ដែលគាំទ្រដោយអ៊ីរ៉ង់” ។

ជាការឆ្លើយតប យន្តហោះចម្បាំងរបស់កងទ័ពអ៊ីស្រាអែលបានបើកការវាយប្រហារលើហេដ្ឋារចនាសម្ព័ន្ធ និងទីតាំងយោធាដែលសុទ្ធសឹងតែមូលដ្ឋានរបស់ក្រុមហេសបូឡា ខណៈក្នុងការវាយប្រហារទម្លាក់គ្រាប់បែកនោះទៀតសោតបានសម្លាប់ក្រុមសកម្មប្រយុទ្ធ ២ នាក់ផងដែរ ។

ចាប់តាំងពីព្រឹត្តិការណ៍ ៧ តុលាមក កងកម្លាំង​​អ៊ីស្រាអែល និង​ក្រុមហេសបូឡារបស់លីបង់ក៏បាន​និង​កំពុងបាញ់បោះតទល់គ្នាឆ្លងព្រំដែនយ៉ាងសកម្មផងដែរ ខណៈការបាញ់រះគ្រាប់រ៉ុកកែតទាំងនោះ គឺដើម្បីជួយទៅដល់ក្រុមហាម៉ាសដែលកំពុងទប់ទល់នឹងការវាយសន្ធាប់របស់អ៊ីស្រាអែល ជាពិសេសដើម្បីកុំឲ្យជម្លោះមួយនេះកាន់តែរីកសាយភាយធំឡើងៗ ។

គួរបញ្ជាក់ថា អ៊ីស្រាអែលបានបើកការវាយប្រហារតាមផ្លូវអាកាស និងដីគោកលើតំបន់ហ្គាហ្សាស្ទ្រីប ជាការសងសឹកចំពោះការវាយឆ្មក់របស់ក្រុមហាម៉ាស ដោយបានសម្លាប់ជនជាតិប៉ាឡេស្ទីនជាង ២ ម៉ឺននាក់ហើយ ដែលភាគច្រើនជាកុមារ និងស្ត្រី និងជាង ៥៤,០០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាស ៕

ប្រែសម្រួលដោយ ៖ ជីវ័ន្ត

ប្រភព ៖ Arab News

ចុចអាន ៖ អ៊ីស្រាអែល ថា មេក្រុមហាម៉ាសកំពុងដេកភ័យបុកពោះ ក្រោយឮសំឡេង ទម្លាក់គ្រាប់បែកពីលើខ្លួន