ខួប ២២ ខែ ៖ រុស្ស៊ី បើកការវាយប្រហារតាមអាកាសជាង ៣០ ដងនៅ​ភាគខាងកើត អ៊ុយក្រែន

សង្គ្រាមប្រយុទ្ធគ្នារវាងរុស្ស៊ី និងអ៊ុយក្រែននៅតែបន្តឆេះរោលរាលខ្លាំងឡើងៗ ជាពិសេសនៅតំបន់ភាគខាងកើត និងភាគខាងត្បូងនៃប្រទេសអ៊ុយក្រែន ខណៈគ្រាន់តែក្នុងថ្ងៃអាទិត្យ កងកម្លាំងរដ្ឋាភិបាលទីក្រុងមូស្គូបានបើកការវាយប្រហារតាមអាកាសជាង ៣០ ដងនៅជិតទីក្រុង Avdiivka ដែលជាទីក្រុងយុទ្ធសាស្ត្រមួយនៅក្នុងតំបន់ភាគខាងកើតនៃសាធារណរដ្ឋ Donetsk ។

ក្នុងការវាយប្រហារតាមអាកាសកាលពីថ្ងៃអាទិត្យ ទី២៤ ខែធ្នូ ដែលជាខួប ២២ ខែនៃប្រតិបត្តិការសឹករបស់រុស្ស៊ីលើអ៊ុយក្រែនក៏បណ្ដាលឲ្យជនស៊ីវិលមួយចំនួនរងរបួសផងដែរ បន្ទាប់ពីកងកម្លាំង​រុស្ស៊ី និង​អ៊ុយក្រែនស្ងាត់ការប្រយុទ្ធគ្នាមួយរយៈ ដោយសារតែភាគីទាំងពីរសុទ្ធតែស្ថិតក្នុង​ភាព​ជាប់គាំងដូចគ្នា ក្រោយប្រតិបត្តិការវាយបករបស់កងកម្លាំងទីក្រុងកៀវផ្ទុះឡើងកាលពីដើមខែមិថុនាមក ។

បច្ចុប្បន្នកងកម្លាំងអ៊ុយក្រែនកំពុងតស៊ូទប់ទល់នឹងសមរភូមិប្រយុទ្ធ ជាពិសេសធ្វើយ៉ាងណាដើម្បីរក្សាកម្លាំងទ័ពឲ្យបានគ្រប់គ្រាន់ បន្ទាប់ពីជម្លោះមួយនេះមិនដឹងអូសបន្លាយដល់ពេលណា ។ អ្វីដែលជាការព្រួយបារម្ភ ក៏ដូចជាបញ្ហាចាក់ស្រេះទៀតនោះ គឺកង្វះគ្រាប់រំសេវ ស្របពេលដែលក្ដីរំពឹងលើជំនួយពីសហរដ្ឋអាមេរិកនៅតែមិនប្រាកដប្រជានៅឡើយ ។

ទោះយ៉ាងណា ក្រៅពីខ្នងបង្អែកលើបងធំអាមេរិកហើយ, អ៊ុយក្រែនក៏នៅមានម្ចាស់ជំនួយធំៗផ្សេងទៀតផងដែរ ជាពិសេសសមាជិកអង្គការណាតូ ។ ជាក់ស្ដែងកាលពីពេលថ្មីៗនេះ លោកប្រធានាធិបតី Volodymyr Zelensky បានប្រកាសថា អ៊ុយក្រែនជិតទទួលបានយន្តហោះចម្បាំង F-16 ជាលើកដំបូងពីសំណាក់រដ្ឋាភិបាលហូឡង់ហើយ ។

ហូឡង់រួមជាមួយដាណឺម៉ាក ន័រវែស និងបែលហ្ស៊ិក សុទ្ធតែប្តេជ្ញាផ្តល់យន្តហោះចម្បាំងឲ្យអ៊ុយក្រែននៅប៉ុន្មានឆ្នាំខាងមុខ ស្របពេលដែលលោក Zelensky បានអះអាងកាលពីខែសីហាថា ប្រទេសទាំងនេះបានសន្យាផ្តល់យន្តហោះចំនួន ៤២ គ្រឿងដល់អ៊ុយក្រែនដើម្បីប្រើលើសមរភូមិប្រយុទ្ធជាមួយរុស្ស៊ី ។

គួរបញ្ជាក់ថា រហូតមកដល់ពេលនេះ សង្គ្រាមរវាងរុស្ស៊ី និងអ៊ុយក្រែនដែលផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ នៅតែបន្តអូសបន្លាយពេល និងមិនមានសញ្ញាថមថយណាមួយឡើយ ខណៈសហរដ្ឋអាមេរិក និងសម្ព័ន្ធមិត្តក៏បានផ្ដល់កញ្ចប់ជំនួយយោធាទៅឲ្យរដ្ឋាភិបាលទីក្រុងកៀវក្នុងទំហំទឹកប្រាក់រាប់រយពាន់លានដុល្លារផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ថា មេក្រុមហាម៉ាសកំពុងដេកភ័យបុកពោះ ក្រោយឮសំឡេង ទម្លាក់គ្រាប់បែកពីលើខ្លួន