អាមេរិក ហាមមិនឲ្យក្រុមហ៊ុន Apple លក់នាឡិកាដៃម៉ាកចុងក្រោយរបស់ខ្លួន

ក្រុមហ៊ុន Apple ត្រូវ​បាន​ហាម​មិន​ឲ្យលក់​នាឡិកា​ដៃម៉ាក​ចុង​ក្រោយ​បំផុត​របស់​ខ្លួន​នៅ​សហរដ្ឋ​អាមេរិក​ បន្ទាប់​ពី​រដ្ឋបាល​លោក Joe Biden បាន​បដិសេធ​មិន​ព្រម​វេតូ​សេចក្តី​សម្រេច​របស់​គណៈកម្មការ​ពាណិជ្ជកម្ម​អន្តរជាតិ (ITC) ។

ការហាមឃាត់ការលក់នាឡិកាដៃម៉ាក Ultra 2 និងនាឡិកាដៃម៉ាក Series 9 គឺជាលទ្ធផលនៃជម្លោះប៉ាតង់រវាងក្រុមហ៊ុន Apple និងក្រុមហ៊ុនបច្ចេកវិទ្យា Masimo ។

គណៈកម្មការពាណិជ្ជកម្មអន្តរជាតិ (ITC) នៅក្នុងខែតុលាបានតម្កល់សេចក្តីសម្រេចរបស់ចៅក្រមក្នុងខែមករា ក្រោយការចោទប្រកាន់ថា Apple បានរំលោភលើសិទ្ធិរបស់ Masimo ក្នុងបច្ចេកវិទ្យាវាស់កម្រិតអុកស៊ីសែនក្នុងឈាម ។

ទោះយ៉ាងណា Masimo ក៏បានប្តឹង Apple វិញផងដែរចំពោះការរំលោភប៉ាតង់នៅ ITC ក្នុងឆ្នាំ ២០២១ ជុំវិញនាឡិកា Apple Watch Series 6 ជាម៉ូដែលដំបូងគេដែលបំពាក់នូវសមត្ថភាពត្រួតពិនិត្យអុកស៊ីសែនក្នុងឈាម ។

ទន្ទឹមនោះ នៅថ្ងៃទី ២៦ ខែតុលា ឆ្នាំ ២០២៣ គណៈកម្មការពាណិជ្ជកម្មអន្តរជាតិរបស់សហរដ្ឋអាមេរិកបានរកឃើញថា Apple, Inc. បានរំលោភលើប៉ាតង់ចំនួនពីរដែលជាកម្មសិទ្ធិរបស់សាជីវកម្ម Masimo និង Cercacor Laboratories, Inc ដែលមានមូលដ្ឋាននៅសហរដ្ឋអាមេរិក ។

តាមរយៈការិយាល័យតំណាងពាណិជ្ជកម្មសហរដ្ឋអាមេរិកបញ្ជាក់ថា​ បន្ទាប់ពីការពិគ្រោះយោបល់ តំណាងពាណិជ្ជកម្មសហរដ្ឋអាមេរិកលោកស្រី Katherine Tai បានសម្រេចចិត្តមិនផ្លាស់ប្តូរការប្តេជ្ញាចិត្តរបស់ ITC នោះឡើយ ។

ដំបូងឡើយ Masimo បានប្តឹង Apple នៅតុលាការសហព័ន្ធក្នុងឆ្នាំ ២០២០ ដោយចោទប្រកាន់ Apple ថា បានលួចបុគ្គលិករបស់ខ្លួន និងលួចអាថ៌កំបាំងពាណិជ្ជកម្មទាក់ទងនឹងបច្ចេកវិទ្យាពន្លឺសម្រាប់វាស់កម្រិតអុកស៊ីសែនក្នុងឈាម ។

ដោយឡែក​ ក្រុមហ៊ុន Apple កាលពីថ្ងៃអង្គារ ក៏បានប្តឹងឧទ្ធរណ៍តបវិញផងដែរ ហើយត្រូវបានគេរាយការណ៍ថា កំពុងរៀបចំដំណើរការដោះស្រាយដើម្បីអាចលក់ផលិតផលនេះបានឡើងវិញ ៕

ប្រែសម្រួល៖ នាង រតនៈ

ប្រភព៖ Anadolu