នាយករដ្ឋមន្ត្រីថៃ លោក សេដ្ឋា ថាវីស៊ីន និងភរិយា ប្រកាសទ្រព្យសម្បត្តិរបស់ខ្លួន

នៅថ្ងៃព្រហស្បតិ៍ទី២៨ខែធ្នូ នាយករដ្ឋមន្ត្រីថៃ លោក សេដ្ឋា ថាវីស៊ីន និងភរិយា បានប្រកាសពីទ្រព្យសម្បត្តិរបស់ខ្លួនមានចំនួន ១.០២ពាន់លានបាត (ជិត៣០លានដុល្លារ) បូករួមទាំងអចលនទ្រព្យតម្លៃ ៣១៤លានបាត (ជាង៩លានដុល្លារ) និងគ្រឿងអលង្ការតម្លៃ១៣១.០៥លានបាត (ជាង៣.៨លានដុល្លារ) ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ធ្វើឡើងបន្ទាប់ពីគណៈកម្មាធិការជាតិប្រឆាំងអំពើពុករលួយ តម្រូវឲ្យលោក សេដ្ឋា ប្រកាសទ្រព្យសម្បត្តិនិងបំណុលទាំងអស់ ពេលចូលកាន់តំណែងជានាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុនៅថ្ងៃទី៥ខែកញ្ញា។

លោក សេដ្ឋា មាន​ទ្រព្យ​សម្បត្តិ ៦៥៩.៣៩ លាន​បាត (ជាង១៩លានដុល្លារ) ចំណែកភរិយាគឺ​បណ្ឌិត Pakpilai មាន​ទ្រព្យ​សម្បត្តិ ៣៦១.០៨ លាន​បាត (ជាង១០.៥លានដុល្លារ)។ អ្នកទាំងពីរ ​ក៏​មានឥណទានវិបារូបន៍​ចំនួន ៩.៧៣ លាន​បាត​ផង​ដែរ​។

អ្នកទាំងពីរ មានប្រាក់សុទ្ធ២.៨លានបាត (ជាង៨ម៉ឺនដុល្លារ), ប្រាក់១១៦.០១លានបាត (ជាង៣លានដុល្លារ) ក្នុងគណនីបញ្ញើចំនួន៨៥, ប្រាក់៥៣.៦៥លានបាត (ជាង១.៥លានដុល្លារ) ក្នុងការវិនិយោគ និងដីមានតម្លៃ ១៥៨.៤លានបាត (ជាង៤.៦លានដុល្លារ) ក្នុងសង្កាត់ Phra Khanong នៃទីក្រុងបាងកក។ អ្នកទាំងពីរក៏បានប្រកាសខុនដូតម្លៃ ១៥៦.៤២លានបាត (ជាង៤.៥លានដុល្លារ) នៅក្នុងស្រុក Hua Hin នៃខេត្ត Prachuap Khiri Khan និងផ្ទះបីជាន់នៅសង្កាត់ Klong Toey នៃទីក្រុងបាងកកផងដែរ។

លើសពីនេះ លោក សេដ្ឋា មាន​រថយន្តម៉ាក Aston Martin DB5 ​ចុះ​បញ្ជី​នៅ​ប្រទេស​អង់គ្លេស​តម្លៃ៥០លាន​បាត ចំណែកភរិយារបស់គាត់ មានរថយន្តចំនួន៣គ្រឿងម៉ាក Toyota Alphard, Fiat និង Tesla Model Y ដែលសរុបចូលគ្នាស្មើនឹងតម្លៃ៧៨លានបាត (ជាង២.២លានដុល្លារ)។

មិនត្រឹមប៉ុណ្ណឹង នាយករដ្ឋមន្ត្រីថៃរូបនេះ បានប្រកាសមាននាឡិកាចំនួន៣៨គ្រឿង តម្លៃសរុប ១២៧.៩៥លានបាត (ជាង៣.៧លានដុល្លារ) ខណៈភរិយាមាននាឡិកា៣១គ្រឿង តម្លៃ ៨៤.៨៧លានបាត (ជាង២.៤លានដុល្លារ)។ លោកស្រី​ក៏​មាន​កាបូប​ចំនួន៤៨ ​តម្លៃសរុប ៣៧.០១ លាន​បាត (ជាង១លានដុល្លារ) ហើយ​លោក សេដ្ឋា ក៏មាន​កាបូប Louis Vuitton X តម្លៃ ៦ លាន​បាតផងដែរ (ជាង១៧ម៉ឺនដុល្លារ)។ ចុងក្រោយ អ្នកទាំងពីរមានទាំង​ត្បូង និង​អលង្ការ ​តម្លៃ​សរុប ១៣១.០៥ លាន​បាត (ជាង៣.៨លានដុល្លារ)។

លោក សេដ្ឋា ប្រាប់ NACC ថា លោករកបានចំណូល ២៥៣.៦៤លានបាត (ជាង៧.៤លានដុល្លារ) ក្នុងមួយឆ្នាំ ហើយមួយឆ្នាំលោកចំណាយទៅវិញប្រហែល ៥១.៦៣លានបាត (ជាង១.៥លានដុល្លារ)។ រីឯភរិយារបស់លោក រកបាន ៣.២១លានបាត (ជាង៩ម៉ឺនដុល្លារ) ក្នុងមួយឆ្នាំ ហើយចំណាយវិញ ២០.៦៧លានបាត (ជាង៦០ម៉ឺនដុល្លារ) ក្នុងមួយឆ្នាំ។

សូមបញ្ជាក់ជាថ្មី លោក សេដ្ឋា មកពីគណបក្សភឿថៃ បានចូលកាន់តំណែងជានាយករដ្ឋមន្ត្រីថៃ បន្ទាប់ពីការជាប់គាំងនយោបាយអស់រយៈពេល៣ខែ។ ការឡើងកាន់តំណែងរបស់លោក គឺបន្ទាប់ពីបេក្ខជនឈ្នះឆ្នោតមកពីគណបក្សចលនាឆ្ពោះទៅមុខលោក ភីថា មិនទទួលបានសំឡេងគាំទ្រគ្រប់គ្រាន់ពីសភា៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ នាយករដ្ឋមន្ត្រីថៃ សេដ្ឋា ថាវីស៊ីន នឹងឈប់សម្រាកពីការងាររយៈពេល ៤ ថ្ងៃ