រដ្ឋមួយទៀត កាត់ឈ្មោះលោក ត្រាំ ចេញពីបញ្ជីបេក្ខជនប្រជែងតំណែងប្រធានាធិបតី

លោក ដូណាល់ ត្រាំ បានជួបប្រទះរឿងឈឺក្បាលមួយទៀត បន្ទាប់ពីមន្ត្រីបោះឆ្នោតកំពូលរដ្ឋ Maine សម្រេចថា លោកមិនអាចឈរឈ្មោះបោះឆ្នោតប្រធានាធិបតីឆ្នាំក្រោយនៅក្នុងរដ្ឋនេះបានទេ ដោយសារតែទង្វើខុសឆ្គងទៅនឹងរដ្ឋធម្មនុញ្ញ។

រដ្ឋលេខាធិការរដ្ឋ Maine លោកស្រី Shena Bellows និយាយថា លោក ត្រាំ មិនមានលក្ខណៈគ្រប់គ្រាន់ឡើយ ដោយសារតែសកម្មភាពរបស់គាត់ ឈានទៅបង្កឲ្យមានកុបកម្មនៅវិមានសភាអាមេរិកកាលពីឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឥឡូវ Maine បានក្លាយជារដ្ឋទី២របស់អាមេរិក ដែលដកឈ្មោះលោកត្រាំ ចេញពីបញ្ជីបោះឆ្នោត បន្ទាប់ពីរដ្ឋ Colorado បានធ្វើដូចគ្នានេះ កាលពីសប្តាហ៍មុន។

សេចក្តីសម្រេច៣៤ទំព័រមានខ្លឹមសារថា លោក ត្រាំ ត្រូវតែដកចេញពីសន្លឹកឆ្នោតរដ្ឋ Maine ដោយសារតែវិសោធនកម្មទី១៤នៃរដ្ឋធម្មនុញ្ញរបស់សហរដ្ឋអាមេរិក ដែលហាមឃាត់អ្នកពាក់ព័ន្ធក្នុងការបះបោរ ពីការកាន់តំណែងណាមួយ។

តាមបញ្ជារបស់អ្នកស្រី Bellows, លោក ត្រាំ បានប្រតិដ្ឋរឿងអំពីការក្លែងបន្លំសន្លឹកឆ្នោត ដើម្បីបញ្ឆេះកំហឹងដល់អ្នកគាំទ្ររបស់គាត់ និងជំរុញឲ្យពួកគេសម្រុកចូលទៅវិមានកាពីតូល។

កាលពីថ្ងៃអង្គារ ទី១៩ ខែធ្នូ តុលាការកំពូលនៃរដ្ឋ Colorado ក៏បានដកឈ្មោះលោក ដូណាល់ ត្រាំ ចេញពីការបោះឆ្នោតបឋមប្រធានាធិបតីឆ្នាំ២០២៤ដែរ ដោយសារតែករណីដូចគ្នានេះ។

កាលនោះ តុលាការបាន​សម្រេច​ក្នុង​សំឡេង ៤ ទល់នឹង ៣ ថា ​លោក ត្រាំ មិន​មែន​ជា​បេក្ខជន​មាន​សិទ្ធិ​ទៀតទេ ហើយពេលនោះ គឺជាលើកទីមួយ ដែលមាត្រា ៣ នៃវិសោធនកម្មរដ្ឋធម្មនុញ្ញទី ១៤ របស់អាមេរិក ត្រូវបានប្រើដើម្បីដកសិទ្ធិបេក្ខជនប្រធានាធិបតី។ ទោះបីជាយ៉ាងណាក៏ដោយ សេចក្តីសម្រេចនោះ នឹងត្រូវដាក់ឲ្យរង់ចាំការតវ៉ារហូតដល់ខែក្រោយ។

សូមបញ្ជាក់ជាថ្មី វិសោធនកម្មទី ១៤ ត្រូវបានផ្តល់សច្ចាប័នបន្ទាប់ពីសង្គ្រាមស៊ីវិលអាមេរិក ហើយមាត្រា ៣ របស់ច្បាប់នេះ មានបំណងរារាំងក្រុមអបគមន៍ពីការវិលត្រលប់ទៅកាន់តួនាទីរបស់រដ្ឋាភិបាលមុនៗ ពេលដែលរដ្ឋភាគខាងត្បូង ចូលជាសមាជិកសហភាពឡើងវិញ ខណៈវិសោធនកម្មនេះក៏ធ្លាប់ត្រូវបានប្រើប្រឆាំងនឹងប្រធានសហព័ន្ធលោក Jefferson Davis និងអនុប្រធានរបស់គាត់ឈ្មោះ Alexander Stephens ផងដែរ ហើយចាប់តាំងពីពេលនោះមក វាកម្រត្រូវបានគេយកមកប្រើណាស់៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក ត្រាំ ជួបឧបសគ្គធំ ក្រោយត្រូវតុលាការកំពូលរដ្ឋ Colorado ដកឈ្មោះចេញពីការបោះឆ្នោត