គណៈកម្មាធិការតំណាងសភាមីយ៉ាន់ម៉ាចាត់វិធានការប្រឆាំងប៉ូលិសបាញ់គ្រាប់ពិតចំក្បាលបាតុករ

គណៈកម្មាធិការតំណាងឲ្យសភា Pyidaungsu Hluttaw (CRPH) នឹងចាត់វិធានការប្រឆាំងមន្រ្តីប៉ូលិសដែលបានបាញ់គ្រាប់ពិត ក្នុងអំឡុងពេលតវ៉ានៅថ្ងៃទី ៩ ខែកុម្ភៈ ដែលបណ្តាលឲ្យយុវតីអាយុ ១៩ ឆ្នាំម្នាក់រងរបួសធ្ងន់ ។

គណៈកម្មាធិការដែលត្រូវបានជ្រើសតាំងដោយប្រជាជនអំឡុងការបោះឆ្នោតទូទៅឆ្នាំ ២០២០ បានចេញសេចក្តីថ្លែងការណ៍មួយនៅថ្ងៃទី ១០ ខែកុម្ភៈដោយថ្កោលទោសយ៉ាងខ្លាំងចំពោះការបង្ក្រាបដោយហិង្សារបស់កងកម្លាំងសន្តិសុខទៅលើក្រុមបាតុករដោយប្រដូចទង្វើនេះទៅនឹងបទឧក្រិដ្ឋ ។

សេចក្តីថ្លែងការណ៍បាននិយាយថានឹងចាត់វិធានការប្រឆាំងមន្រ្តីប៉ូលិសស្របតាមច្បាប់របស់ប្រទេស ។ ពួកគេបានជំរុញឲ្យប្រជាជនដែលមានភ័ស្តុតាងផ្ញើអ៊ីម៉ែលមកអាស័យដ្ឋានអ៊ីម៉ែលផ្លូវការ និងទំព័រប្រព័ន្ធផ្សព្វផ្សាយសង្គមរបស់គណៈកម្មាធិការ ។

សេចក្តីថ្លែងការណ៍បានឲ្យដឹងថា នាង Ma Myat Thet Khine អាយុ ១៩ ឆ្នាំបានរងរបួសយ៉ាងធ្ងន់ធ្ងរ បន្ទាប់ពីត្រូវបានបាញ់ដោយមន្រ្តីប៉ូលិសម្នាក់ដែលបានប្រើកាំភ្លើងបាញ់គ្រាប់ពិត ខណៈបច្ចុប្បន្ននាងកំពុងទទួលការព្យាបាលនៅមន្ទីរពេទ្យក្រុងណៃពិដោ ហើយកំពុងស្ថិតក្នុងស្ថានភាពធ្ងន់ធ្ងរនៅឡើយ ។

នាងចូលរួមជាមួយមនុស្សរាប់ម៉ឺននាក់ផ្សេងទៀតដើម្បីទាមទារឲ្យបញ្ចប់ការធ្វើរដ្ឋប្រហារដឹកនាំដោយយោធាដែលចាប់ផ្តើមកាលពីសប្តាហ៍មុន ។

ការប្រើអាវុធគ្រប់គ្រងកុបកម្មរបស់កងកម្លាំងសន្តិសុខដូចជាកាណុងបាញ់ទឹក និងគ្រាប់កាំភ្លើងជ័រក៏បានបណ្តាលឲ្យមានបាតុករផ្សេងទៀតរងរបួសនៅថ្ងៃនោះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Myanmar Times

ចុចអាន ៖ វីដេអូស្តែងៗ ថតជាប់បាតុករមីយ៉ាន់ម៉ា ត្រូវប៉ូលិសបាញ់គ្រាប់ពិតចំក្បាល

ចុចអាន ៖ មេទ័ពមីយ៉ាន់ម៉ា ថ្លែងជាសាធារណៈលើកដំបូងទាក់ទងនឹងបាតុកម្ម