វៀតណាម ចាប់ខ្លួនមេអណ្តើក នាំបវរកញ្ញានិងតារាម៉ូដែល ទៅបម្រើសេវាផ្លូវភេទឲ្យភ្ញៀវ មួយយប់ ២០០០ដុល្លារ

កាលពីចុងសប្តាហ៍ វៀតណាម ចាប់ខ្លួនស្ត្រីពីរនាក់នៅទីក្រុងហូជីមិញ ជាមេអណ្តើកនាំស្រីស្អាតៗដូចជាបវរកញ្ញានិងតារាបង្ហាញម៉ូដទៅបម្រើសេវាផ្លូវភេទដល់ភ្ញៀវ ជាមួយតម្លៃរហូតដល់៥០លានដុង (២០០០ដុល្លារអាមេរិក) ក្នុងមួយយប់។

តាមការចោទប្រកាន់ ប៉ូលិសនិយាយថា ស្រ្តីទាំងពីរឈ្មោះ Ho Thi Hanh និង Dau Thi Lien បានទទួលចំណែក៣០% នៃប្រាក់ដែលភ្ញៀវផ្តល់ឲ្យស្ត្រីរកស៊ីផ្លូវភេទ ដែលពួកគេទាក់ទងបាន។ ប៉ូលិសបានរកឃើញក្រុមផ្សាយពាណិជ្ជកម្មនៃសេវាកម្មរបស់ខ្លួនតាមអ៊ីនធឺណិត ហើយឆ្មក់ចូលសណ្ឋាគារមួយនៅផ្លូវ To Hien Thanh ក្នុងសង្កាត់ទី១០ កាលពីចុងខែធ្នូ ហើយចាប់បានស្ត្រីពីរនាក់ ពីក្រុមនេះ។

ក្នុងចំណោមអ្នកដែលចាប់ខ្លួនបាន គឺមានស្ត្រី​ម្នាក់​អាយុ​២៧​ឆ្នាំ ជាបវរកញ្ញា​វៀតណាម រីឯ​ម្នាក់​ទៀត​អាយុ​២៣​ឆ្នាំ​ជា​តារា​បង្ហាញ​ម៉ូដ​រូប​ថត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ ក្នុងសណ្ឋាគារមួយទៀតនៅផ្លូវ Tran Hung Dao សង្កាត់ទី៥ ប៉ូលិសចាប់បាននារីជានិស្សិតមហាវិទ្យាល័យម្នាក់ និងតារាម៉ូដែលតាមបណ្តាញសង្គមម្នាក់ ដែលបានបម្រើអតិថិជនក្នុងម្នាក់តម្លៃ១៤លានដុង។

ការស៊ើបអង្កេតរកឃើញថា Hanh បានតាំងខ្លួននារីជោគជ័យម្នាក់នៅលើបណ្តាញសង្គម ដោយបង្ហោះរូបថតខ្លួនធ្វើដំណើរទៅកន្លែងល្បីៗ និងការដើរទិញទំនិញមានតម្លៃថ្លៃៗ។ បន្ទាប់មក នាងបានល្បួងស្ត្រីឲ្យចូលក្រុម ដើម្បីរកលុយបានលឿនដូចនាង។

តាមការរកឃើញ Hanh និង Lien កំពុង​គ្រប់​គ្រង​នារី​វ័យ​ក្មេង​ជាង ៣០ នាក់ រួម​ទាំងបវរកញ្ញា និង​តារា​សម្ដែងផងដែរ។ មិនត្រឹមប៉ុណ្ណឹង អ្នកទាំងពីរក៏បានផ្តល់សេវាផ្លូវភេទខ្លួនឯងទៀតផង។

សូមបញ្ជាក់ថា ប៉ូលិសក្រុងហូជីមិញ បានបង្កើនការវាយឆ្មក់ប្រឆាំងសកម្មភាពឧក្រិដ្ឋកម្ម នៅមុនថ្ងៃបុណ្យចូលឆ្នាំថ្មី ដោយបង្រ្កាបបានក្រុមពេស្យាចារជាបន្តបន្ទាប់ រួមទាំងក្រុមមួយដែលគ្រប់គ្រងដោយប្រធានក្រុមអាកាសចរណ៍ និងក្រុមមួយទៀតដែលគ្រប់គ្រងដោយភោជនីយដ្ឋានចិន ផ្តោតលើអតិថិជនបរទេសផងដែរ៕

ប្រែសម្រួល៖ Vann Vann

ប្រភព៖ VN Express

ចុចអាន៖ ប៉ូលិសក្រុងហូជីមិញ បំបែកសម្បុករត់ពន្ធ iPhone ពីកម្ពុជា យកទៅលក់នៅ វៀតណាម