អ៊ីស្រាអែលសង្ស័យប្រជាជនខ្លួនលួចលក់មីស៊ីលទៅប្រទេសក្រៅដោយខុសច្បាប់

ទីភ្នាក់ងារសន្តិសុខអ៊ីស្រាអែល (ISA) បាននិយាយកាលពីថ្ងៃព្រហស្បតិ៍ថា ខ្លួនបានសាកសួរជនជាតិអ៊ីស្រាអែលជាង ២០ នាក់ជុំវិញការសង្ស័យថា ពួកគេបានបង្កើត ផលិត និងលក់អាវុធទៅប្រទេសក្រៅដោយខុសច្បាប់ ។

ទីភ្នាក់ងារបាននិយាយនៅក្នុងសេចក្តីថ្លែងការណ៍មួយថា ជនសង្ស័យរួមទាំងអតីតយុទ្ធជននៃឧស្សាហកម្មសន្តិសុខបានចូលរួមក្នុងការលួចលក់មីស៊ីលដោយខុសច្បាប់ទៅប្រទេសអាស៊ីមួយដោយមិនបានប្រាប់ឈ្មោះប្រទេសណាមួយឡើយ ។

ការស៊ើបអង្កេតក៏បានរកឃើញផងដែរថា ជនសង្ស័យបានទទួលបញ្ជាប្រតិបត្តិការពីប្រជាជនដែលជាប់នឹងប្រទេសក្រៅ ហើយជាថ្នូរពួកគេនឹងទទួលបានប្រាក់ និងអត្ថប្រយោជន៍ផ្សេងទៀត ។

ដោយដកស្រង់សំដីរបស់ ISA កាសែត Times of Israel បានរាយការណ៍ថា “បញ្ហានេះបញ្ជាក់ពីការខូចខាតដែលអាចកើតមានដល់សន្តិសុខរបស់រដ្ឋក្នុងប្រតិបត្តិការខុសច្បាប់ដែលធ្វើឡើងដោយពលរដ្ឋអ៊ីស្រាអែលដែលមានធាតុបរទេស រួមទាំងការព្រួយបារម្ភថា បច្ចេកវិទ្យាបែបនេះអាចឈានដល់បណ្តាប្រទេសដែលជាសត្រូវជាមួយនឹងអ៊ីស្រាអែល” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ីស្រាអែលពេញចិត្តការលក់យន្តហោះ F-35 របស់អាមេរិកទៅឲ្យអារ៉ាប់រួម

ចុចអាន ៖ ប្រជាជនអ៊ីស្រាអែល ២៤០ នាក់តេស្តវិជ្ជមានកូវីដភ្លាមៗ ក្រោយចាក់វ៉ាក់សាំង