ចិន-កូរ៉េខាងជើង ប្រកាសរួមថា ២០២៤ ជាឆ្នាំមិត្តភាពកាន់តែរឹងមាំ

លោកប្រធានាធិបតីចិន Xi Jinping និងថ្នាក់ដឹកនាំកូរ៉េខាងជើង លោក Kim Jong un បានប្រកាសរួមគ្នាថា ឆ្នាំ២០២៤ ជាឆ្នាំមិត្តភាពចិន-កូរ៉េខាងជើង។ ការប្រកាសនេះបានធ្វើឡើងកាលពីថ្ងៃចន្ទម្សិលមិញដើមឆ្នាំថ្មី ក្នុងឱកាសដែលប្រទេសទាំងពីរអបអរខួបលើកទី៧៥ឆ្នាំនៃទំនាក់ទំនងការទូត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពសារព័ត៌មានចិន China Daily ក្នុងឱកាសដែលប្រទេសទាំងពីរអបអរសាទរស្វាគមន៍ឆ្នាំថ្មី លោក Xi បានផ្ញើសារជូនលោក Kim ដែលមានខ្លឹមសារថា ប្រទេសចិន និងសាធារណរដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) គឺជាអ្នកជិតខាងគ្នា ភ្ជាប់គ្នាដោយភ្នំ និងទន្លេ ហើយទំនាក់ទំនងនៃប្រទេសទាំងពីរកើតឡើងដោយមេដឹកនាំប្រទេសតាំងពីជំនាន់មុនៗ ក៏ដូចជាថ្នាក់ដឹកនាំនៃបក្សទាំងពីរ។ ជាពិសេសទៅលើការងារយុទ្ធសាស្រ្តបដិវត្តថ្មី និងការបន្តកិច្ចការនយោបាយសង្គមនិយម។

ប្រភពព័ត៌មានដដែល ក្នុងរយៈពេលប៉ុន្មានឆ្នាំចុងក្រោយនេះ លោក Xi បានឲ្យដឹងថា ប្រទេសទាំងពីរបានរក្សានូវទំនាក់ទំនងយុទ្ធសាស្រ្តយ៉ាងជិតស្និទ្ធ កិច្ចសហប្រតិបត្តិការយ៉ាងស៊ីជម្រៅ ក៏ដូចជាកិច្ចការសហការក្នុងទំនាក់ទំនងអន្តរជាតិ និងការជំរុញបន្ថែមនូវការអភិវឌ្ឍចំណងទ្វេភាគីជាបន្តទៀត ពិសេសភាគីរដ្ឋទាំងពីរដែលបានរក្សានូវផលប្រយោជន៍រួមជាស្ថិរភាព និងសន្តិភាពក្នុងតំបន់។

ដោយឡែក លោក Kim ថ្នាក់ដឹកនាំកូរ៉េខាងជើង ក៏បានបន្ថែមទៅលើសារនៃទំនាក់ទំនងការទូតនេះផងដែរថា ទំនាក់ទំនងចិន-កូរ៉េខាងជើង មិនអាចបំបែកបាននេះគឺបានបង្កើត និងពង្រឹងយុទ្ធសាស្រ្តសម្រាប់នយោបាយសង្គមនិយម ហើយក៏នឹងត្រូវបង្ហាញយ៉ាងពេញលេញនៅក្នុងឆ្នាំថ្មីនេះផងដែរ៕

ប្រែសម្រួល៖ មាន រតនា

ប្រភព៖ China Daily

ចុចអាន៖ វៀតណាម-ចិន ចុះហត្ថលេខាលើកិច្ចព្រមព្រៀងជាមួយគ្នាចំនួន ៣៦