Breaking News! យន្តហោះរបស់ក្រុមហ៊ុនអាកាសចរណ៍ ជប៉ុន បុកជាមួយ​យន្តហោះឆ្មាំសមុទ្រ ផ្ទុះឆេះយ៉ាងសន្ធោសន្ធៅ

យោងតាមក្រុមហ៊ុន Japan Airlines បានឲ្យដឹងថា ជើងហោះហើរលេខ ៥១៦ ដែលធ្វើដំណើរពីអាកាសយានដ្ឋាន New Chitose បានបុកជាមួយយន្តហោះរបស់ឆ្មាំសមុទ្រជប៉ុន បន្ទាប់ពីចុះចតនៅអាកាសយានដ្ឋាន Haneda បណ្ដាលឲ្យយន្តហោះរបស់ក្រុមហ៊ុនមួយនេះកំពុងឆេះយ៉ាងសន្ធោសន្ធៅ ខណៈអ្នកដំណើរប្រមាណ ៣៦៧ នាក់ក៏ត្រូវបានជម្លៀសចេញផងដែរ ។

វីដេអូពីកាមេរ៉ាដែលដំឡើងដោយទូរទស្សន៍ NHK នៅអាកាសយានដ្ឋាន Haneda បង្ហាញពីអណ្តាតភ្លើងឆេះយ៉ាងសន្ធោសន្ធៅចេញពីបង្អួចរបស់យន្តហោះរបស់ក្រុមហ៊ុន Japan Airlines នៅម៉ោង ៦ ល្ងាចថ្ងៃទី២ ខែមករានេះ ខណៈក្រុមការងារពន្លត់អគ្គីភ័យក៏កំពុងញាប់ដៃញាប់ជើងបាញ់ទឹកពន្លត់ភ្លើងផងដែរ ។

យោងតាមក្រុមហ៊ុន Japan Airlines បានឲ្យដឹងថា យន្តហោះដែលកំពុងឆេះនេះ គឺចាកចេញពីព្រលានយន្តហោះ New Chitose នៅម៉ោង ៤ រសៀល និងចុះចតនៅអាកាសយានដ្ឋាន Haneda នៅវេលាម៉ោង ៥ និង ៤០ នាទីល្ងាចថ្ងៃទី២ ខែមករានេះ ខណៈខាងក្រុមហ៊ុនកំពុងវាយតម្លៃការខូចខាត ។

គួរបញ្ជាក់ថា ក្រៅពីជួបហេតុការណ៍ដ៏សោកនាដកម្មនេះហើយ ជប៉ុនក៏កំពុងរងទុក្ខពីគ្រោះរញ្ជួយដីកម្រិត ៧.៦ រ៉ិចទ័រនៅខេត្ត Ishikawa កាលពីព្រឹកថ្ងៃទី១ ខែមករា ដោយរហូតមកដល់ពេលនេះបានសម្លាប់មនុស្សដល់ ៣០ នាក់ហើយ ខណៈគ្រោះធម្មជាតិមួយនេះក៏បំផ្លាញសំណង់អគារ កាត់ផ្តាច់អគ្គិសនីចំពោះមនុស្សរាប់ម៉ឺននាក់ និងជំរុញឲ្យប្រជាពលរដ្ឋ រត់ចេញពីតំបន់ឆ្នេរទៅរកទីទួលសុវត្ថិភាពផងដែរ ៕

ប្រែសម្រួលដោយ ៖ ជីវ័ន្ត

ចុចអាន ៖ រកឃើញមនុស្សស្លាប់ច្រើនឡើងៗ ក្នុងគ្រោះរញ្ជួយដីនៅ ជប៉ុន