ចូលឆ្នាំ២០២៤បានប៉ុន្មានថ្ងៃ ជប៉ុន រងទុក្ខផ្ទួន ស្លាប់មនុស្ស ៦០នាក់

២០២៤មិនមែនជាឆ្នាំល្អឡើយសម្រាប់ជប៉ុន ព្រោះថាគ្រាន់តែបើកទំព័រដំបូងភ្លាមប្រទេសនេះ បានជួបទុក្ខផ្ទួនៗទៅហើយ មួយគឺគ្រោះរញ្ជួយដីកម្រិតធ្ងន់ និងមួយទៀតគឺការឆេះយន្តហោះនៅអាកាសយានដ្ឋានទីក្រុងតូក្យូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃចន្ទទី១ខែមករា គ្រោះរញ្ជួយដីកម្រិត៧.៦រ៉ិចទ័រ បានវាយប្រហារខេត្ត អ៊ីស៊ីកាវ៉ា បណ្តាលឲ្យមានការព្រមានពីរលកយក្សស៊ូណាមិ ហើយគិតត្រឹមថ្ងៃពុធទី៣ មានមនុស្សចំនួន៥៥នាក់ ត្រូវបានគេរាយការណ៍ថា បាត់បង់ជីវិត ធ្វើឲ្យវាក្លាយជាគ្រោះរញ្ជួយដីសម្លាប់មនុស្សច្រើនបំផុតក្នុងប្រទេសជប៉ុន គិតចាប់តាំងពីឆ្នាំ២០១៦មក។

ក្រៅពីអ្នកស្លាប់ មនុស្សជាច្រើននាក់ទៀតក៏កំពុងបាត់ខ្លួននិងជាប់នៅក្រោមអគារបាក់បែកផងដែរ នៅក្នុងខេត្ត Niigata, Toyama, Fukui និង Gifu។ លើសពីនេះ រញ្ជួយដីបានបំផ្លាញសំណង់អគារ កាត់ផ្តាច់អគ្គិសនីចំពោះមនុស្សរាប់ម៉ឺននាក់ និងជំរុញឲ្យប្រជាពលរដ្ឋ រត់ចេញពីតំបន់ឆ្នេរទៅរកទីទួលសុវត្ថិភាព។

លោកនាយករដ្ឋមន្ត្រី Fumio Kishida និយាយថា បុគ្គលិកជួយសង្គ្រោះជាង៣០០០នាក់ត្រូវបានដាក់ពង្រាយ ប៉ុន្តែកំពុងធ្វើការក្នុងស្ថានភាពដ៏លំបាកព្រោះថា អាកាសធាតុត្រជាក់ខ្លាំង ហើយតំបន់ខ្លះពិបាកទៅដល់ទៀតព្រោះផ្លូវត្រូវកាត់ផ្តាច់។

លើសពីនេះ សេវាផ្លូវដែកនិងជើងហោះហើរជាច្រើនចូលទៅក្នុងតំបន់រញ្ជួយ ត្រូវបានផ្អាកជាបណ្តោះអាសន្ន ហើយមនុស្សជាង៥០០នាក់ ត្រូវជាប់គាំងនៅអាកាសយានដ្ឋាន Noto បន្ទាប់ពីការបិទ ដោយសារតែមានស្នាមប្រេះនៅលើផ្លូវយន្តហោះ។

គ្រោះរញ្ជួយដីមិនទាន់ធធូរស្បើយផង ស្រាប់តែជប៉ុន ជួបហេតុការណ៍មួយទៀត នោះគឺយន្តហោះរបស់ក្រុមហ៊ុន Japan Airlines ប្រភេទ Airbus A350 មួយគ្រឿង បានផ្ទុះឆេះនៅលើផ្លូវរត់នៅឯអាកាសយានដ្ឋាន Haneda នៃទីក្រុងតូក្យូ បន្ទាប់ពីបុកជាមួយយន្តហោះឆ្មាំសមុទ្រ។

ទោះបីជាយ៉ាងណាក៏ដោយ អ្នកដំណើរសរុប៣៦៧នាក់ និងសមាជិកអាកាសយានិក១២នាក់នៅលើយន្តហោះ ត្រូវបានជម្លៀសចេញដោយសុវត្ថិភាពតាមរយៈច្រកសង្គ្រោះបន្ទាន់ ប៉ុន្តែមនុស្ស ៥នាក់ក្នុងចំណោម ៦នាក់ នៅលើយន្តហោះឆ្មាំសមុទ្រត្រូវបាត់បង់ជីវិត៕

ប្រែសម្រួល៖ Vann Vann

ប្រភព៖ CNA

ចុចអាន៖ យន្តហោះរបស់ក្រុមហ៊ុនអាកាសចរណ៍ ជប៉ុន បុកជាមួយ​យន្តហោះឆ្មាំសមុទ្រ ផ្ទុះឆេះយ៉ាងសន្ធោសន្ធៅ