នាយករដ្ឋមន្ត្រីថៃ លោក សេដ្ឋា ថាវីស៊ីន សម្រេចចិត្តទៅរស់នៅក្នុងវិមានរដ្ឋាភិបាល ជំនួសផ្ទះរបស់ខ្លួន

មន្ត្រីរដ្ឋាភិបាលថៃម្នាក់ កាលពីថ្ងៃអង្គារ ទី២ ខែមករា បានបង្ហាញទិដ្ឋភាពនៃបន្ទប់ដេករបស់នាយករដ្ឋមន្ត្រី លោក សេដ្ឋា ថាវីស៊ីន នៅអគារថៃឃូហ្វា វិមានរដ្ឋាភិបាល និងបានឱ្យដឹងថា ខណៈពេលនេះវិមានរដ្ឋាភិបាលកំពុងជួសជុល ទុកសម្រាប់នាយករដ្ឋមន្ត្រីថ្មីរូបនេះស្នាក់នៅជំនួសផ្ទះរបស់លោក។

យោងតាមប្រភពពីកាសែតខាវស៊ុតថៃ បានឱ្យដឹងថា តាមគម្រោង លោក សេដ្ឋា ថាវីស៉ីន នឹងចូលទៅរស់នៅក្នុងវិមានរដ្ឋាភិបាល ចាប់ពីថ្ងៃទី៧ ខែមករា ខាងមុខដ៏ខ្លីនេះ ប៉ុន្តែលោកបានពន្យាពេលសិន ព្រោះលោកនៅមានការងាររវល់ច្រើន ។

ប្រភពបានឱ្យដឹងទៀតថា ហេតផលដែលលោក សេដ្ឋា ថាវីស៉ីន បានសម្រេចចិត្តរស់នៅក្នុងវិមានរដ្ឋាភិបាល ដោយសារផ្ទះរបស់លោកស្ថិតនៅចំកណ្ដាលទីក្រុងបាងកក ដែលជាទីក្រុងពោពេញទៅដោយការកកស្ទះចរាចរណ៍ អាចនាំឱ្យលោកធ្វើដំណើរយឺតពេលបំពេញការងារ ។ ការសម្រេចចិត្តនេះ បាននាំឱ្យ លោក សេដ្ឋា ថាវីស៉ីន ក្លាយជាអ្នកដឹកនាំប្រទេសទីពីរបន្ទាប់ពីលោកសេនាប្រមុខ Plaek Phibunsongkhram (កាន់ដំណែងក្នុងឆ្នាំ ១៩៣៨ ដល់ ១៩៤៤ និង ១៩៤៨ ដល់ ១៩៥៧) ដែលរស់នៅក្នុងអគារថៃឃូហ្វា វិមានរដ្ឋាភិបាល នេះ។

គួរឱ្យដឹងផងដែរថា អគារថៃឃូហ្វា មានអាយុកាលជិត ១០០ឆ្នាំមកហើយ ដែលដើមឡើងអគារនេះមានឈ្មោះថា «បាណនរង្សី» ។

នៅឆ្នាំ ១៩២៣ ក្នុងរាជរបស់ព្រះបាទរាមាទី៦ ទ្រង់បានតែងតាំងស្ថាបត្យករជនជាតិអ៊ីតាលីឈ្មោះ Annibale Rigotti ឱ្យរចនាអគារ «បាណនរង្សី» នេះឡើងដើម្បីជាព្រះរាជទានរបស់ព្រះអង្គដល់ឧត្តមសេនីយចៅពញារាមរ៉ាកុប ទុកជាលំនៅឋានរបស់គ្រួសារ ប៉ុន្តែជាអកុសល ស្ថាបត្យករអ៊ីតាលីនោះ បានត្រឡប់ទៅប្រទេសអ៊ីតាលីវិញបន្ទាប់ពីការសោយទីវង្គត់របស់ព្រះបាទរាមាទី៦ នៅឆ្នាំ ១៩២៥ ខណៈដែលការសាងសង់នៅតែមិនពេញលេញផង ។

ក្រោយមកនៅឆ្នាំ ១៩៤១ លោកសេនាប្រមុខ Plaek Phibunsongkhram បានយក អគារ «បាណនរង្សី» ដែលសាងសង់មិនទាន់ហើយនោះ មកធ្វើជាការិយាល័យនាយករដ្ឋមន្ត្រី និងបានបានចាត់តាំងជាងចម្លាក់ និងវិចិត្រករជនជាតិអ៊ីតាលី Corrado Feroci និងស្ថាបត្យករ Ercole Manfredi ដើម្បីបញ្ចប់ការសាងសង់ ។

លោកសេនាប្រមុខ Plaek Phibunsongkhram ជាមេដឹកនាំម្នាក់ដែលកាន់របបផ្ដាច់ការ ដើរតាមគន្លងរបបហ្វាស៊ីស បាន​លើក​ស្ទួយ​ជាតិនិយម​ថៃ និង​ Sinophobia ហើយបាន​ចងសម្ព័ន្ធមិត្ត​ថៃ​ជាមួយ​អធិរាជ​ជប៉ុន​ ក្នុង​សង្រ្គាមលោក​លើក​ទីពីរ។ យ៉ាងណាមិញ Plaek Phibunsongkhram ក៏បានព្យាយាមប្រែក្លាយប្រទេសថៃទៅជាប្រជាធិបតេយ្យ ដំណើរការបោះឆ្នោតចាប់ពីពាក់កណ្តាលទសវត្សរ៍ឆ្នាំ ១៩៥០ ប៉ុន្តែត្រូវបានផ្ដួលរំលំនៅឆ្នាំ ១៩៥៧ ហើយបានទៅនិរទេសខ្លួននៅប្រទេសជប៉ុន ជាកន្លែងដែលគាត់បានស្លាប់នៅឆ្នាំ ១៩៦១ ។ គ្មានអ្នកដឹកនាំជំនាន់ក្រោយណាម្នាក់ ចង់ដើរតាមគន្លងរបស់លោកសេនាប្រមុខPlaek Phibunsongkhram ឡើយ ដូច្នេះហើយចាប់​តាំង​ពី​ពេល​នោះ​មក ក៏គ្មាន​នាយក​រដ្ឋមន្ត្រី​ណា​បាន​ស្នាក់​នៅ​ក្នុង​អគារ​នោះដែរ ទើបតែលោក សេដ្ឋា ថាវីស៉ីន ប៉ុណ្ណោះ ដែលសម្រេចចិត្តស្នាក់ក្រោមហេតុផលងាយស្រួលបំពេញការងារទាន់ពេល ៕

ប្រែសម្រួលដោយ៖ កុសល

ប្រភព៖ khaosodenglish