ព័ត៌មានអន្ដរជាតិ

ភោជនីយដ្ឋាន កូរ៉េខាងជើង បើកនៅ ឡាវ ជាប់សង្ស័យលាងលុយកខ្វក់ និងជម្រកបទល្មើស IT

បានផុស

១ year មុន

នៅ

ថ្ងៃព្រហស្បតិ៍ ៤ មករា ២០២៤

ដោយ

ភោជនីយដ្ឋានកូរ៉េខាងជើងជាច្រើនដែលតាំងនៅរដ្ឋធានីវៀងច័ន្ទប្រទេសឡាវ ស្ថិតក្រោមការសង្ស័យពីអ្នកវិភាគអន្តរជាតិថា “ជាកន្លែងលាងលុយកខ្វក់” បន្ទាប់ពីសង្កេតឃើញថា ហាងអាហារស្ទើរតែគ្មានអតិថិជនសោះ ប៉ុន្តែនៅតែឈរជើងយ៉ាងរឹងមាំមិនមានបញ្ហាថវិកា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មាន Al Jazeera បានលើកបង្ហាញសង្ខេបមួយករណី គឺភោជនីយដ្ឋានឈ្មោះ Paektu Hanna ដែលមានទីតាំងស្ថិតនៅ រដ្ឋធានីវៀងច័ន្ទ ប្រទេសឡាវ ។ ភោជនីយដ្ឋានកូរ៉េខាងជើង ដែលមិនសូវបង្ហាញព័ត៌មានឲ្យគេដឹងមួយនេះ ជាភោជនីយដ្ឋានមួយក្នុងចំណោម ៤ ដែលដំណើរការជុំវិញបណ្តាប្រទេសអាស៊ីអាគ្នេយ៍។

បើទោះជាគ្មានភ្ញៀវចូលអង្គុយទទួលទានម្ហូបអាហារក្នុងរយៈពេលវែង ដែលជាប្រភពខ្ទង់ចំណូលសំខាន់សម្រាប់ទ្រទ្រង់អាជីវកម្មមួយនេះក៏ដោយ ប៉ុន្តែហាងអាហារទាំងនោះនៅតែបន្តដំណើរធម្មតាដដែល ។

ប្រភពព័ត៌មានដដែលបានបង្ហាញថា មានភោជនីយដ្ឋានរបស់រដ្ឋកូរ៉េខាងជើងដែលដំណើរការប្រមាណ ១៣០កន្លែងនៅក្នុងទីក្រុងធំៗនៃតំបន់ប្រទេសអាស៊ីអាគ្នេយ៍ និងអាស៊ីខាងកើត។ ក្នុងនោះរួមមានទាំងទីតាំងនៅ Dubai និង Amsterdam ដែលសុទ្ធតែស្ងាត់គ្មានភ្ញៀវ តែនៅបន្តដំណើរដោយគ្មានប៉ះពាល់រឿងថវិកា ហើយក៏ស្ថិតនៅក្នុងចម្ងល់អ្នកទេសចរជាច្រើនផងដែរ។

គិតមកត្រឹមពេលនេះ មានភោជនីយដ្ឋានកូរ៉េខាងជើងប្រមាណ ១៧ ស្ថិតក្នុងប្រទេសចិន រុស្ស៊ី ឡាវ និងនៅទីក្រុងហាណូយប្រទេសវៀតណាម ដែលនៅបើកដំណើរការជាការបំពានទណ្ឌកម្មរបស់អង្គការសហប្រជាជាតិទៅលើកូរ៉េខាងជើង ដែលបានអនុវត្តចាប់ពីឆ្នាំ២០១៩។

“វាទំនងជាដូចការសង្ស័យរបស់ខ្ញុំ ដែលថាភោជនីយដ្ឋានទាំងនោះគឺបង្កើតឡើងដើម្បីតែលាងលុយកខ្វក់ប៉ុណ្ណោះ។ ហើយអ្វីដែលជាប្រភពលុយចំណូលសំខាន់នោះ គឺបានមកពីអ្នកធ្វើការផ្នែកព័ត៌មានវិទ្យា (IT) ប្រតិបត្តិការក្នុងប្រទេសឡាវនេះ”។ នេះបើតាមការលើកឡើងរបស់លោក Joshua Stanton មេធាវីអាមេរិក ដែលបានចូលរួមក្នុងការងារសរសេរគោលនយោបាយដាក់ទណ្ឌកម្មទៅលើប្រទេសកូរ៉េខាងជើង។

គួររំឭកថា កាលពីថ្ងៃ២២ ខែធ្នូ ឆ្នាំ២០១៧ ក្រុមប្រឹក្សាសន្តិសុខអង្គការសហប្រជាជាតិ (UNSC) បានសម្រេចជាឯកច្ឆន្ទដាក់ទណ្ឌកម្មលើទីក្រុងព្យុងយ៉ាង ដែលឆ្លើយតបទៅនឹងការបាញ់កាំជ្រួចមីស៊ីលអន្តរទ្វីប ដោយក្នុងនោះមានការរឹតត្បិតទៅលើជំនួញពាណិជ្ជកម្មរវាងកូរ៉េខាងជើង និងបណ្តាប្រទេសសមាជិកអង្គការសហប្រជាជាតិផងដែរ។

ប៉ុន្តែទោះជាយ៉ាងណា ការអនុវត្តទណ្ឌកម្មនេះ នៅតែធូររលុងសម្រាប់ប្រទេសសមាជិកអចិន្រ្តៃយ៍របស់អង្គការពិភពលោកមួយនេះ តួយ៉ាង ចិន រុស្ស៊ី ដែលមានជាប់ពាក់ព័ន្ធនឹងការជួលមនុស្សធ្វើការពីកូរ៉េខាងជើងប្រមាណ ១ សែននាក់ក្នុងវិស័យឧស្សាហកម្មផ្សេងៗ ក្នុងនោះមានទាំងប្រតិបត្តិការជួញដូរអាវុធ ដែលមានធនធានកម្មករកូរ៉េខាងជើងប្រមាណ ៣ ទៅ ៤ ពាន់នាក់ ដែលភាគច្រើនជាអ្នកបច្ចេកវិទ្យាព័ត៌មានវិទ្យា និងកម្មករសំណង់ ៕

ប្រែសម្រួល៖ មាន រតនា

ប្រភព៖ Aljazeera