ថ្ងៃស្អែកនឹងអភិសេក មកស្គាល់ប្រវត្តិនារីដែលឆក់យកបេះដូងព្រះរាជបុត្រព្រុយណេ Abdul Mateen

ដំណឹងនៃការរៀបអភិសេករបស់ព្រះរាជបុត្រព្រុយណេ Abdul Mateen និងគូដណ្ដឹងទ្រង់ Anisha Isa Kalebic បានសាយភាយពិភពលោក ខណៈដែលពិធីនឹងផ្ដើមប្រព្រឹត្តទៅចាប់ពីថ្ងៃទី០៧ស្អែកនេះ រហូតដល់ថ្ងៃ១៦ ខែមករាឆ្នាំ២០២៤។

ទោះយ៉ាងណាក៏ដោយ ព្រមជាមួយគ្នានោះមនុស្សជាច្រើនហាក់ចង់ដឹងថា តើជីវប្រវត្តិរបស់នារីដែលបានឆក់យកបេះដូងព្រះរាជបុត្រព្រុយណេអង្គនេះបានជានរណា? នាងជាសែរាជវង្សដូចទ្រង់ ឬគ្រាន់តែជារាស្រ្តសាមញ្ញប៉ុណ្ណោះ។

មែនទែនទៅ មនុស្សស្រីដែលបុត្រាទីបួនរបស់ស្តេចស៊ុលតង់ Hassanal Bolkiah សព្វព្រះរាជហរទ័យ នាងមិនមែនជាសែរាជវង្សដូចទ្រង់ទេ ប៉ុន្តែ Anisha Isa Kalebic ក៏មិនមែនជាញាតិឆ្ងាយពីព្រះរាជបុត្រព្រុយណេ Mateen​ ដូចគ្នា។

ចុះតើនាងជានរណា?

Anisha Isa Kalebic ជាក្មេងស្រីដែលមានឫសគល់នៃសញ្ជាតិក្រូអាត​​ នាងជាចៅស្រីរបស់លោក Pehin Dato Isa ដែលជាទីប្រឹក្សាពិសេសនៃស្ដេចស៊ុលតង់ Hassanal Bolkiah ព្រមទាំងធ្លាប់បាន​តែង​តាំង​ជា​អគ្គ​មេធាវី​រង និង​ជា​ឧបនាយករដ្ឋមន្ត្រី​ក្នុង​ឆ្នាំ ១៩៦៨ និង ១៩៧០ ផងដែរ។ យោងតាមគេហទំព័ររដ្ឋាភិបាលព្រុយណេបញ្ជាក់ថា ជីតា Anisha ក៏ជាស្ថាបនិកក្រុមហ៊ុន Royal Brunei Airlines ផងដែរ។ ដូច្នេះ វាមិនមែនជារឿងគួរឲ្យភ្ញាក់ផ្អើលនោះទេ នៅពេលដែលមានរបាយការណ៍ដែលបង្ហាញពីទំនាក់ទំនងដ៏ស៊ីជម្រៅរវាងព្រះអង្គម្ចាស់ Mateen និងក្រុមគ្រួសារដ៏មានឥទ្ធិពលមួយនេះ។

យោងតាមប្រភពមួយពីព្រុយណេបានរាយការណ៍ថា Anisha ជានិស្សិតបញ្ចប់ការសិក្សានៅសាកលវិទ្យាល័យ Bath ក្នុងប្រទេសអង់គ្លេស។ សាកលវិទ្យាល័យល្បីឈ្មោះមួយនេះ ផ្តោតសំខាន់លើវិទ្យាសាស្រ្ត វិស្វកម្ម ការគ្រប់គ្រង និងវិទ្យាសាស្ត្រសង្គម សាកលវិទ្យាល័យមានភាពលេចធ្លោសម្រាប់ការស្រាវជ្រាវដ៏ទំនើបរបស់ខ្លួន និងការប្តេជ្ញាចិត្តក្នុងការជំរុញស្មារតីសហគ្រិនក្នុងចំណោមនិស្សិតរបស់ខ្លួន។

ចំណែកឯស្នេហារបស់ទ្រង់ត្រូវបានសមាជិកគ្រួសារទម្លាយថា Anisha និងព្រះអង្គម្ចាស់ Mateen បានទាក់ទងគ្នាអស់រយៈពេល៥ ឆ្នាំ។ ទ្រង់ស្គាល់គ្នាតាំងពីកុមារភាព ហើយបងប្រុសរបស់នាង Danial Deen Isa-Kalebic ត្រូវបានគេនិយាយថា ជាមិត្តជិតស្និទ្ធនឹងព្រះអង្គម្ចាស់ Mateen ដែលតែងតែមានចំណាប់អារម្មណ៍ និងចំណូលចិត្តស្រដៀងគ្នា ហើយជារឿយៗគេឃើញមានការចូលរួមក្នុងកីឡាបាល់ទាត់ និងប៉ូឡូ។

ព្រះអង្គម្ចាស់ Mateen ធ្លាប់មានបន្ទូលថា Anisha ជាក្មេងស្រីដ៏អស្ចារ្យ​ មិនត្រឹមតែដោយសារតែនាងជារបស់ទ្រង់ទេ ប៉ុន្តែដោយសារតែនាងល្អនិងសាមញ្ញ ក្នុងពេលដែលសមាជិកនៃគ្រួសារ Kalebic និយាយថា ព្រះអង្គម្ចាស់ក៏ដូចគ្នាដែរ នៅពេលដែលបានជួប ទ្រង់ឱបនិងថើបមនុស្សនៅទីនេះដោយមិនប្រកាន់ឋានៈ។

យ៉ាងណាក៏ដោយ ក្រៅ​ពី​មាន​រូប​សម្រស់​ស្រស់​ស្អាត Anisha ជា​មនុស្ស​ស្រី​ឆ្លាត​បំផុតដែលមនុស្សប្រុសគ្រប់គ្នាប្រាថ្នាចង់បាន។ ថ្វីបើនាងកើតនៅទីក្រុងឡុងដ៍ ប៉ុន្តែនារីម្នាក់នេះនៅតែមិនចោលភាសាកំណើត ដោយនាងអាចនិយាយភាសាក្រូអាតបានច្រើនបំផុតលើសពីភាសាផ្សេងៗ។

មិនត្រឹមប៉ុណ្ណឹងទេ Anisha ត្រូវបានគេរាយការណ៍ថា ​ជាម្ចាស់យីហោម៉ូដមួយ ដែលមានឈ្មោះថា Silk Collective និងបើកក្រុមហ៊ុនទេសចរណ៍មួយដែលមានឈ្មោះថា Authentirary ជាមួយមិត្តម្នាក់។ Authentirary គឺជាក្រុមហ៊ុនដែលផ្តល់សេវាកម្មដល់ភ្ញៀវទេសចរដោយផ្តល់ឲ្យពួកគេនូវបទពិសោធន៍ និងអារម្មណ៍នៃវប្បធម៌នៅក្នុងទីក្រុងផ្សេងៗគ្នា។​ នាងមានគណនី Instagram ពិសេសមួយដែលបង្ហាញពីចំណង់ចំណូលចិត្តធ្វើម្ហូបរបស់នាងដែលមានឈ្មោះថា anishakitchen ជាពិសេសដែលនាងតែងតែចែករំលែករូបថត និងវីដេអូអំពីមុខម្ហូប និងមុខម្ហូបដែលនាងរៀបចំ។ វេទិកានេះបម្រើជាវិចិត្រសាលនិម្មិតដែល Anisha បង្ហាញពីសមត្ថភាព និងចំណង់ចំណូលចិត្តរបស់នាងនៅក្នុងវិស័យចម្អិនអាហារ។

យ៉ាងណាមិញ ពិធីរៀបអភិសេកដែលគ្រោងនឹងធ្វើឡើងរយៈពេល១០ថ្ងៃ មនុស្សទូទាំងពិភពលោកក៏កំពុងតែរង់ចាំមើលថា តើសែរាជវង្សប្រទេសណាខ្លះ និងឥស្សរជនសាធារណៈសំខាន់ៗដទៃទៀត ព្រមទាំងអ្នកនយោបាយរូបណា នឹងបង្ហាញវត្តមានក្នុងព្រះរាជពិធីដ៏ឧឡារិកនេះ។

ស្របពេលដែលគេប្រព័ន្ធផ្សព្វផ្សាយពិភពលោកកំពុងប៉ាន់ស្មានថា​ ព្រះអង្គម្ចាស់ William និងព្រះនាង Kate Middleton អាច​នឹង​យាងចូលរួម​ក្នុង​ពិធី​អភិសេករបស់ព្រះរាជបុត្រា Mateen បន្ទាប់ពី​ស្តេចស៊ុលតង់បានក្លាយជា​ភ្ញៀវដ៏សំខាន់​ក្នុង​ពិធី​អភិសេក​របស់​គូស្នេហ៍​រាជវង្ស​អង់គ្លេស​ក្នុង​ឆ្នាំ ២០១១។​ លើសពីនេះ ព្រះអង្គម្ចាស់ Mateen ទ្រង់គង់នៅឯការលាចុងក្រោយរបស់ម្ចាស់ក្សត្រី Elizabeth II។ កាលពីឆ្នាំមុនក្នុងខែកញ្ញាថែមទៀត៕

អត្ថបទ៖ សាង​ ស្រីល័ក្ខ

ចុចអាន៖ព្រះរាជបុត្រ Abdul Mateen បង្ហោះរូបភាពដំបូងរបស់គូដណ្តឹង និងចិញ្ចៀនភ្ជាប់ពាក្យដ៏ធំលើដៃ