ក្រុមហ៊ុនផលិតរថយន្តអគ្គិសនីវៀតណាម VinFast នឹងបើករោងចក្រមួយទៀតនៅប្រទេសឥណ្ឌា

ថ្ងៃសៅរ៍ ទី៦ ខែមករា នេះ ក្រុមហ៊ុនផលិតរថយន្តអគ្គិសនីវៀតណាម (EV) VinFast បានចុះហត្ថលេខាលើកិច្ចព្រមព្រៀងដើម្បីបង្កើតរោងចក្រផលិតរថយន្តដំបូងរបស់ខ្លួននៅក្នុងប្រទេសឥណ្ឌា ខណៈដែលក្រុមហ៊ុនមួយនេះមានមហិច្ឆតាចង់ជ្រៀតចូលទីផ្សាររថយន្តធំទីបីរបស់ពិភពលោក។

VinFast និងរដ្ឋ Tamil Nadu ភាគខាងត្បូងប្រទេសឥណ្ឌា បានព្រមព្រៀងគ្នាឆ្ពោះទៅរកការវិនិយោគមួយរហូតដល់ទំហំទឹកប្រាក់ ២ ពាន់លានដុល្លារអាមេរិក ព្រមទាំងមានការប្តេជ្ញាចិត្តថានៅក្នុង ៥ឆ្នាំដំបូងនៃគម្រោងខាងលើនេះ នឹងបង្កើនទំហំទឹកប្រាក់រហូត ៥០០ លានដុល្លារអាមេរិក ។

យោងតាមសេចក្ដីរាយការណ៍របស់ CNA បានឱ្យដឹងថា គម្រោងសាងសង់រោងចក្រផលិតរថយន្តអគ្គិសនី VinFast រួមទាំងអាគុយរបស់វា នឹងចាប់ផ្តើមនៅឆ្នាំនេះ ហើយនឹងអាចបង្កើតការងារពី ៣,០០០ ទៅ ៣,៥០០ កន្លែងនៅក្នុងស្រុក។

ជាមួយគ្នានេះ Reuters បានរាយការណ៍កាលពីថ្ងៃពុធថា VinFast នឹងបើករោងចក្រផលិតរថយន្តអគ្គិសនីរបស់ខ្លួន នៅប្រទេសឥណ្ឌាជាលើកដំបូងនៅទីក្រុង Thoothukudi ក្នុងរដ្ឋ Tamil Nadu ។

VinFast បានរំពឹងថា គម្រោងសាងសង់រោងចក្រផលិតរថយន្តអគ្គិសនី នៅរដ្ឋ Tamil Nadu នឹងវិវត្តទៅជាមជ្ឈមណ្ឌលផលិតរថយន្ត EV លំដាប់ទីមួយនៅក្នុងតំបន់ ជាមួយនឹងសមត្ថភាពផលិតប្រចាំឆ្នាំរហូតដល់ ១៥០,០០០ គ្រឿង បើធៀបជាមួយរោងចក្រធំរបស់ខ្លួនក្នុងប្រទេសវៀតណាមផលិតបាន ២៥០,០០០ គ្រឿង ៕

ប្រែសម្រួលដោយ៖ កុសល
ប្រភព៖ CNA