ព័ត៌មានអន្ដរជាតិ

អ៊ីតាលី អំពាវនាវឲ្យអឺរ៉ុប បង្កើតកងទ័ពរួមមួយ

បានផុស

១ year មុន

នៅ

ថ្ងៃចន្ទ ៨ មករា ២០២៤

ដោយ

កាលពីថ្ងៃអាទិត្យទី៧ខែមករា រដ្ឋមន្ត្រីការបរទេសអ៊ីតាលី លោក Antonio Tajani បានអំពាវនាវដល់មេដឹកនាំសហភាពអឺរ៉ុប ឲ្យបង្កើតកងទ័ពអឺរ៉ុបរួមមួយ ដោយអះអាងថា បើគ្មានយោធារួមគ្នាទេ ប្លុកនេះមិនអាចមានគោលនយោបាយការបរទេសគួរឲ្យទុកចិត្តបានឡើយ។

រដ្ឋមន្ត្រីការបរទេសអ៊ីតាលី លោក Antonio Tajani (រូបថត៖ Aktuale)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Tajani ប្រាប់កាសែត La Stampa របស់ប្រទេសអ៊ីតាលីថា “យើងត្រូវការកងទ័ពអឺរ៉ុបជាចាំបាច់ ប្រសិនបើយើងចង់ក្លាយជាអ្នកកាន់សន្តិភាពនៅក្នុងពិភពលោកមែន។ នេះជាលក្ខខណ្ឌមូលដ្ឋាន សម្រាប់ការមានគោលនយោបាយការបរទេសអឺរ៉ុបប្រកបដោយប្រសិទ្ធភាព។ ពលរដ្ឋអឺរ៉ុប អាចទទួលបានការការពារ ដោយអ្វីដែលមានស្រាប់ប៉ុណ្ណោះ”។

បច្ចុប្បន្ន រដ្ឋចំនួន២២របស់សហភាពអឺរ៉ុបគឺជាសមាជិករបស់អង្គការណាតូ ខណៈកតិកាសញ្ញាដែលដឹកនាំដោយសហរដ្ឋអាមេរិក បានកំណត់ច្បាស់ៗនូវគោលនយោបាយសន្តិសុខលើទ្វីបនេះ ចាប់តាំងពីការផ្ទុះសង្រ្គាមត្រជាក់។ ទោះបីជាយ៉ាងណាក៏ដោយ ក្នុងរយៈពេលប៉ុន្មានឆ្នាំថ្មីៗនេះ មេដឹកនាំសហភាពអឺរ៉ុបមួយចំនួន បានលើកឡើងអំពីគំនិតនៃការបង្កើតយោធារបស់ពួកគេទៅជាកម្លាំងរួមតែមួយ ឈប់ពឹងផ្អែកលើការគ្រប់គ្រងដោយសហរដ្ឋអាមេរិក។

ប្រធានាធិបតីបារាំងលោក Emmanuel Macron និងអតីតអធិការបតីអាល្លឺម៉ង់លោកស្រី Angela Merkel គឺជាអ្នកគាំទ្រខ្លាំងបំផុតចំពោះគំនិតនេះ។ ក្នុងឆ្នាំ២០១៩ លោក Macron បានហៅអង្គការណាតូថាជា “ខួរក្បាលស្លាប់” ហើយជំរុញឲ្យមេដឹកនាំអឺរ៉ុប បន្តគោលនយោបាយ “ស្វ័យភាពជាយុទ្ធសាស្ត្រ” ពីទីក្រុងវ៉ាស៊ីនតោន។

ប្រធានាធិបតីបារាំងលោក Emmanuel Macron (រូបថត៖ BNN)

យ៉ាងណា អគ្គលេខាធិការអង្គការណាតូលោក Jens Stoltenberg បានព្រមានកាលពីឆ្នាំ២០២១ថា ទង្វើនេះនឹងធ្វើឲ្យទំនាក់ទំនងរវាងអាមេរិកខាងជើងនិងអឺរ៉ុបចុះខ្សោយ។

យ៉ាងណាមិញ សមាជិកនៅអឺរ៉ុបខាងកើតរបស់អង្គការណាតូ បានចេញមុខជាអ្នកគាំទ្រដ៏ខ្នះខ្នែងបំផុតឲ្យអាមេរិក ធ្វើជាអ្នកត្រួតពិនិត្យសន្តិសុខនៅអឺរ៉ុប។ បន្ទាប់ពីប្រទេសប៉ូឡូញ បានខ្ចីប្រាក់ចំនួន២ពាន់លានដុល្លារពីទីក្រុងវ៉ាស៊ីនតោន ដើម្បីធ្វើទំនើបកម្មយោធារបស់ខ្លួននិងស្វាគមន៍យោធភូមិភាគអចិន្ត្រៃយ៍ដំបូង នៃកងទ័ពអាមេរិកទៅកាន់មូលដ្ឋាននៅតំបន់ Poznan នោះ, អតីតរដ្ឋមន្ត្រីការពារជាតិ Mariusz Blaszczak បាននិយាយក្នុងខែវិច្ឆិកាថា “ការប្រកួតប្រជែងណាមួយរវាងណាតូនិង EU គឺជារឿងដ៏អាក្រក់បំផុត ហើយទីក្រុងវ៉ាសូវី សូមជ្រើសរើសយកភាពជាដៃគូជិតស្និទ្ធជាមួយសហរដ្ឋអាមេរិកហើយ”។

នៅទីបំផុត សហភាពអឺរ៉ុប បានអនុម័តលើការរៀបចំយុទ្ធសាស្ត្រការពារទូទៅមួយកាលពីឆ្នាំមុន ដែលឈានទៅដល់ការបង្កើតកងកម្លាំងដាក់ពង្រាយយ៉ាងរហ័ស មានកម្លាំងទ័ព៥០០០នាក់៕

ប្រែសម្រួល៖ Vann Vann

ប្រភព៖ RT

ចុចអាន៖ EU៖ ដូចជាមិនមើលឃើញសញ្ញាថា អ៊ុយក្រែន អាចឈ្នះរុស្ស៊ី សោះ