វៀតណាម ដាក់គោលដៅកើបលុយ ៣.៥ ពាន់លានដុល្លារពីការនាំចេញ​ទុរេនក្នុងឆ្នាំ ២០២៤ នេះ

ទីភ្នាក់ងារព័ត៌មាន Xinhua បានរាយការណ៍ដោយដកស្រង់ប្រភពចេញពីមន្ត្រីក្រសួងកសិកម្ម និងអភិវឌ្ឍន៍ជនបទវៀតណាមថា រដ្ឋាភិបាលវៀតណាមបានដាក់គោលដៅទាញចំណូលឲ្យបានចំនួន ៣.៥ ពាន់លានដុល្លារពីការនាំចេញទុរេនក្នុងឆ្នាំ ២០២៤ នេះ ខណៈកាលពីឆ្នាំ ២០២៣ វៀតណាមកើបលុយបានតែ ២ ពាន់លានដុល្លារប៉ុណ្ណោះ ។

លោក Dang Phuc Nguyen អគ្គលេខាធិការនៃសមាគមន៍ផ្លែឈើ និងបន្លែវៀតណាមបាននិយាយថា ការនាំចេញទុរេនអាចឈានដល់ ៣.៥ ពាន់លានដុល្លារនៅក្នុងឆ្នាំនេះ ដោយសារតែទិន្នផលទុរេនកាន់តែហក់ឡើងខ្ពស់ គួបផ្សំនឹងផ្ទៃដីដាំដុះកាន់តែច្រើន ជាពិសេសគឺការដាក់ស្លាកនាំចេញទៅកាន់ប្រទេសចិនតែម្ដង ។

ទន្ទឹមនោះ អនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទ លោក Phung Duc Tien បានប្រាប់សារព័ត៌មាន VN Express ថា ប្រសិនបើកិច្ចសម្របសម្រួលស្ដីពីការនាំចេញទុរេនក្លាសេនៅក្នុងឆ្នាំ ២០២៤ នេះត្រូវបានចុះហត្ថលេខាជាមួយភាគីប្រទេសចិន នោះការដឹកចេញទុរេនរបស់វៀតណាមក៏អាចនឹងកើនឡើងបន្ថែមលើសនេះផងដែរ ។

គួរបញ្ជាក់ថា បច្ចុប្បន្នវៀតណាមបាននាំចេញទុរេនទៅកាន់ទីផ្សារចំនួន ៨ ប្រទេសក្នុងនោះចិនមានចំនួន ៩៧ ភាគរយនៃទំហំនាំចេញសរុប ខណៈកាលពីឆ្នាំ ២០២៣ ប្រាក់ចំណូលពីការនាំចេញទុរេនរបស់វៀតណាមបានធ្លាក់ចុះក្រោមគោលដៅ ២.២ ពាន់លានដុល្លារដែលស្មើនឹងជិត ៤០ ភាគរយនៃការដឹកចេញផ្លែឈើ និងបន្លែសរុបរបស់ប្រទេស ៕

ប្រែសម្រួលដោយ ៖ ជីវ័ន្ត

ចុចអាន ៖ ម៉ាឡេស៊ី បំបែកសម្បុកពេស្យាចារ ឃាត់បាននារីថៃ វៀតណាម និងឥណ្ឌូណេស៊ី ៤៨នាក់