ព័ត៌មានអន្ដរជាតិ

ចិនចាប់បានអត្តសញ្ញាណចារកិច្ចម្នាក់ ប្រមូលព័ត៌មានសម្ងាត់ឲ្យអង់គ្លេស

បានផុស

១ year មុន

នៅ

ថ្ងៃអង្គារ ៩ មករា ២០២៤

ដោយ

ប្រទេសចិនបានប្រកាសកាលពីពេលថ្មីៗនេះថា ខ្លួនចាប់បានអត្តសញ្ញាណចារជនអង់គ្លេសម្នាក់ដែលត្រូវចោទប្រកាន់ពីបទប្រមូលព័ត៌មានសម្ងាត់របស់រដ្ឋចិន និងបញ្ជូនទៅឲ្យអង់គ្លេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសន្តិសុខជាតិចិនបានរកឃើញថា ប្រធានក្រុមហ៊ុនបរទេសផ្នែកប្រឹក្សាយោបល់មួយរូប បានយកការណ៍ពីប្រទេសចិន ទៅឲ្យស្ថាប័នចារកិច្ចរបស់អង់គ្លេស MI6 ហើយនេះ ក៏ជាការដាក់ការចោទប្រកាន់ទៅកាន់ភាគីអង់គ្លេស ក្រោយពីមានដំណាក់កាលចោទសង្ស័យជាបន្តបន្ទាប់។

ទីភ្នាក់ងារចារកម្មចិន បានប្រកាសចាប់បាននូវសកម្មភាពចារកិច្ចនៅលើបណ្តាញសង្គម WeChat ដោយបញ្ជាក់ថា MI6 បានប្រើជនបរទេសមួយរូបឈ្មោះ Huang Moumou ដើម្បីប្រមូលរាល់ព័ត៌មានសម្ងាត់ និងទិន្នន័យពីក្នុងប្រទេស។

ប្រភពព័ត៌មានពីទីភ្នាក់ងារមួយនេះបានឲ្យដឹងទៀតថា MI6 បានបណ្តុះបណ្តាល Huang និងបំពាក់ឧបករណ៍ធ្វើចារកម្មប្រមូលទិន្នន័យជាប្រព័ន្ធ រួចណែនាំ Huang ឲ្យចេញចូលទឹកដីចិនជាច្រើនលើកច្រើនសារ ដោយប្រើអត្តសញ្ញាណជាប្រធានក្រុមហ៊ុនសាធារណៈដើម្បីស៊ើបយកការណ៍ ។ បន្ថែមពីនេះ ចារកិច្ចឈ្មោះ Huang បានបញ្ជូនទិន្នន័យហោចណាស់ចំនួន ១៧ ករណី រួមទាំងព័ត៌មានសម្ងាត់របស់រដ្ឋចិនទៅកាន់ MI6 មុនពេលដែលគេកំណត់ចាប់បាន ។

យ៉ាងណាមិញ ទីភ្នាក់ងារចារកិច្ចចិនខាងលើក៏នៅមិនបានបង្ហាញអត្តសញ្ញាណអំពីស្ថានភាពលម្អិតបន្ថែមអំពី ចារជនឈ្មោះ Huang នោះឡើយ។ ប៉ុន្តែប្រទេសមហាអំណាចអាស៊ីមួយនេះ នៅតែតាមរកនិងបង្ហាញពីអត្តសញ្ញាណចារជនរបស់អង់គ្លេសជាបន្តបន្ទាប់ក្នុងរយៈពេលប៉ុន្មានខែចុងក្រោយនេះ។

ដោយឡែក ទាំងភាគីចិន និងអង់គ្លេស ក្នុងរយៈពេលដើមឆ្នាំ២០២៤នេះ នៅតែដាក់ការចោទប្រកាន់គ្នាទៅវិញទៅមកលើករណីធ្វើចារកម្ម ដែលក្នុងនោះមានទាំងការចោទប្រកាន់លើអ្នកនយោបាយ និងពាណិជ្ជករផងដែរ៕

ប្រែសម្រួល៖ មាន រតនា

ប្រភព៖ Aljazeera