កូរ៉េខាងត្បូង អនុម័តច្បាប់ ចាត់ទុកការសម្លាប់ឬលក់សាច់ឆ្កែ ជាទង្វើខុសច្បាប់

ជាទីបញ្ចប់នៃប្រពៃណីទទួលទានសាច់ឆ្កែរបស់កូរ៉េខាងត្បូង, ប្រទេសនេះបានអនុម័តច្បាប់ថ្មីមួយ ដោយសម្រេចថា ការសម្លាប់ឬលក់សាច់ឆ្កែ នឹងក្លាយជារឿងខុសច្បាប់នៅឆ្នាំ២០២៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ​ថ្ងៃ​អង្គារទី៨ខែមករា រដ្ឋសភា​បាន​អនុម័ត​សេចក្តី​ព្រាង​ច្បាប់​​ដោយ​សំឡេងឯកច្ឆន្ទ ២០៨-០ ហើយច្បាប់​នេះ ​មាន​គោល​បំណង​ចូល​រួម​ចំណែក ​ក្នុង​ការលើកកម្ពស់​តម្លៃ​នៃ​សិទ្ធិ​សត្វ ក៏ដូចជាការគោរព​ជីវិតនិង​ការ​រួម​រស់​ដោយ​សុខដុម​រមនា​រវាង​មនុស្ស​និង​សត្វ។

ក្រោមច្បាប់នេះ ការចិញ្ចឹមឬសម្លាប់សត្វឆ្កែសម្រាប់ការបរិភោគ ក៏ដូចជាការចែកចាយឬលក់សាច់ឆ្កែនឹងត្រូវហាមឃាត់ ហើយអ្នក​ដែលល្មើស នឹង​ត្រូវ​ជាប់ពន្ធនាគារ។

យោងតាមច្បាប់ អ្នកកាប់សម្លាប់សត្វឆ្កែ ត្រូវប្រឈមការជាប់ពន្ធនាគាររហូតដល់៣ឆ្នាំ ឬពិន័យជាប្រាក់៣០លានវ៉ុន (២៣០០០ដុល្លារអាមេរិក) ខណៈអ្នកចិញ្ចឹមឆ្កែសម្រាប់លក់ ឬអ្នកលក់សាច់ឆ្កែអាចជាប់ពន្ធនាគារអតិបរមា២ឆ្នាំ។

ទោះបីជាយ៉ាងណាក៏ដោយ ច្បាប់ថ្មីនេះនឹងចូលជាធរមានក្នុងរយៈពេលបីឆ្នាំខាងមុខ ដើម្បីទុកពេលដល់អ្នកចិញ្ចឹម និងម្ចាស់ភោជនីយដ្ឋាន ឲ្យស្វែងរកប្រភពការងារនិងប្រាក់ចំណូលជំនួសមុខរបរនេះ។

ស្របពេលជាមួយគ្នានោះដែរ រដ្ឋាភិបាលបានសន្យាថានឹងជួយព្រមទាំងផ្តល់សំណង ជាទីគាប់ចិត្តចំពោះអ្នកចិញ្ចឹមឆ្កែ អ្នកកាប់សាច់ និងម្ចាស់ភោជនីយដ្ឋាន ដែលជួបផលប៉ះពាល់ដោយសារច្បាប់នេះ។

ការកាប់សម្លាប់និងទទួលទានសាច់ឆ្កែ ត្រូវបានក្រុមសិទ្ធិសត្វ ថ្កោលទោសជាយូរមកហើយ ហើយបើយោងតាមស្ថិតិរបស់រដ្ឋាភិបាលកូរ៉េខាងត្បូង មានភោជនីយដ្ឋានលក់សាច់ឆ្កែប្រហែល១៦០០កន្លែងនិងកសិដ្ឋានចិញ្ចឹមឆ្កែ១១៥០កន្លែងក្នុងឆ្នាំ២០២៣៕

ប្រែសម្រួល៖ Vann Vann

ប្រភព៖ BBC, CNN, AP

ចុចអាន៖ ឆ្កែ​កាណាដាមួយក្បាលបំបែកកំណត់ត្រា​ពិភពលោក ដោយ​ដោះ​ស្រោមជើង​ជាច្រើនក្នុងរយៈពេលខ្លី