រដ្ឋមន្ត្រីការពារជាតិអាមេរិក Lloyd Austin កើតជំងឺមហារីក

តាមប្រភពផ្លូវការបញ្ជាក់ថា រដ្ឋមន្ត្រីការពារជាតិអាមេរិកលោក Lloyd Austin មានជំងឺមហារីកក្រពេញប្រូស្តាត ប៉ុន្តែគាត់ធ្វើទុក្ខក្រោយទទួលការវះកាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Austin បានពិនិត្យឃើញជំងឺនេះកាលពីខែធ្នូឆ្នាំ២០២៣ ហើយក៏ត្រូវបញ្ជូនទៅមន្ទីរពេទ្យ Walter Reed National Military Medical Center នៅខែមករាឆ្នាំ២០២៤ រួចមកក៏បញ្ជូនចូលក្នុងបន្ទប់សង្គ្រោះបន្ទាន់តែម្តង។

ទោះបីជាយ៉ាងណាក៏ដោយ លោកប្រធានាធិបតី ចូ បៃដិន ទើបដឹងរឿងនេះ កាលពីថ្ងៃអង្គារទី៩ខែមករាប៉ុណ្ណោះ ហើយមានការរិះគន់យ៉ាងចាស់ដៃទៅលើមន្ត្រីជាន់ខ្ពស់អាមេរិកថា លោក Austin ចូលពេទ្យ៣ថ្ងៃទៅហើយ ទើបមានអ្នកដឹងរឿង។

តាមការអះអាងពីអ្នកនាំពាក្យមន្ទីរបញ្ចកោណ, លោក Austin កំពុងសម្រាកក្នុងមន្ទីរពេទ្យ ហើយមិនមានការបញ្ជាក់ច្បាស់លាស់ថា គាត់នឹងចេញពីពេទ្យនៅពេលណានោះទេ។

រដ្ឋមន្ត្រីការពារជាតិវ័យ៧០ឆ្នាំរូបនេះ គឺជាបុគ្គលមិនអាចខ្វះបាន នៅក្នុងយោធាអាមេរិក ហើយជាសមាជិកដ៏សំខាន់បំផុតម្នាក់នៃគណៈរដ្ឋមន្ត្រីរបស់ប្រធានាធិបតី។ ភាពយឺតយ៉ាវក្នុងការជូនដំណឹងដល់សេតវិមាន បង្កជាកង្វល់សន្តិសុខជាតិនិងបញ្ហាតម្លាភាពនៅក្នុងរដ្ឋបាលរបស់លោក បៃដិន យ៉ាងខ្លាំង។

សូមបញ្ជាក់ថា លោក Austin បានឡើងកាន់តំណែងជារដ្ឋមន្ត្រីក្រសួងការពារជាតិអាមេរិកនៅថ្ងៃទី២២ខែមករាឆ្នាំ២០២១ ក្រោយទទួលបានការបោះឆ្នោតគាំទ្រដោយព្រឹទ្ធសភា ក្នុងសំឡេង៩៣ ទល់នឹង២។

គាត់គឺជាឧត្តមសេនីយ៍ចូលនិវត្តន៍ ដែលធ្លាប់ត្រួតត្រាកងទ័ពអាមេរិកនៅតំបន់មជ្ឈិមបូព៌ាក្រោមការដឹកនាំរបស់អតីតប្រធានាធិបតី បារ៉ាក់ អូបាម៉ា៕

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិក ចេញបំភ្លឺរឿងបក្សប្រឆាំងឲ្យដកតំណែងរដ្ឋមន្ត្រីការពារជាតិដែល​កំពុងសម្រាកនៅមន្ទីរពេទ្យ