លោក Macron តែងតាំងនាយករដ្ឋមន្ត្រីថ្មី ជាបុរសស្រលាញ់ភេទដូចគ្នា វ័យ ៣៤ ឆ្នាំ

ទូរទស្សន៍ជប៉ុន NHK បានរាយការណ៍ថា ប្រធានាធិបតីបារាំងលោក Emmanuel Macron កាលពីថ្ងៃអង្គារបានតែងតាំងរដ្ឋមន្ត្រីក្រសួងអប់រំវ័យ ៣៤ ឆ្នាំ លោក Gabriel Attal ជានាយករដ្ឋមន្ត្រីថ្មី ជំនួសលោកស្រី Elisabeth Borne ដែលបានសម្រេចចិត្តលាលែងពីតំណែងកាលពីថ្ងៃចន្ទ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ លោក Attal ក៏ជានាយករដ្ឋមន្ត្រីវ័យក្មេងដំបូងគេបង្អស់ផងដែរ ចាប់តាំងពីការកកើតសាធារណរដ្ឋទី ៥ របស់បារាំង ក្រោយត្រូវ​បាន​ជ្រើសតាំង​ជា​សមាជិក​សភា​ពី​គណបក្ស​សង្គមនិយម​របស់​លោក Macron នៅ​ក្នុងវ័យត្រឹម ២៨ ឆ្នាំប៉ុណ្ណោះ ។

ចំណែកកៅអីជារដ្ឋមន្ត្រីក្រសួងអប់រំវិញ លោក Attal ត្រូវបានតែងតាំងកាលពីឆ្នាំ ២០២៣ ខណៈដែលដើមឡើយបុរសរូបសង្ហាដែលសារព័ត៌មានក្នុងស្រុករាយការណ៍ថា ស្រលាញ់ភេទដូចគ្នារូបនេះ ក៏ធ្លាប់ធ្វើជាអ្នកនាំពាក្យរដ្ឋាភិបាលភិបាលផងដែរ ។

ក្នុងអំឡុងសុន្ទរកថាទទួលតំណែងជានាយករដ្ឋមន្ត្រីថ្មីរបស់បារាំងនេះទៀតសោត បុរសវ័យក្មេងដែលត្រូវបានគេចាត់ទុកថាជា ផ្កាយកំពុងរះក្នុងជួរគណៈរដ្ឋមន្ត្រីរបស់លោក Macron បានហៅការសម្រេចចិត្តតែងតាំងនេះជា សញ្ហាបង្ហាញការជឿទុកចិត្តទៅដល់យុវវ័យ ហើយលោកពិតជាចង់បង្ហាញស្នាដៃយ៉ាងឆាប់រហ័សក្នុងរដ្ឋាភិបាលថ្មីមួយនេះណាស់ ។

លោក Macron ដែលកំពុងស្ថិតក្នុងអាណត្តិទី ២ បានជំរុញកំណែទម្រង់សោធននិវត្តន៍ និងគោលនយោបាយផ្សេងទៀតជាមួយលោកស្រី Borne ប៉ុន្តែអំឡុងពេលនោះ ផ្លូវដើររបស់លោកជាមួយនឹងអតីតនាយករដ្ឋមន្ត្រីរូបនេះ ​ប្រឈម​នឹងឧបសគ្គ​ក្នុង​ការ​គ្រប់គ្រង​រដ្ឋបាល ដោយសារ​​ខ្វះ​សំឡេង​ភាគច្រើន​នៅក្នុង​សភា ។

គួរបញ្ជាក់ថា ការសម្រេចតែងតាំងលោក Attal ធ្វើជានាយករដ្ឋមន្ត្រីថ្មីកើតមានឡើង បន្ទាប់ពីលោកប្រធានាធិបតី Emmanuel Macron អាចនឹងប្រកាសរុះរើ និងស្ដារគណៈរដ្ឋមន្ត្រីរបស់លោកសាជាថ្មី នៅមុនការបោះឆ្នោតសភាអឺរ៉ុប និងព្រឹត្តិការណ៍ការប្រកួតកីឡាអូឡាំពិករដូវក្ដៅឆ្នាំនេះដែលទីក្រុងប៉ារីសនឹងធ្វើជាម្ចាស់ផ្ទះ ៕

ប្រែសម្រួលដោយ ៖ ជីវ័ន្ត

ចុចអាន ៖ អាមេរិក ចេញបំភ្លឺរឿងបក្សប្រឆាំងឲ្យដកតំណែងរដ្ឋមន្ត្រីការពារជាតិដែល កំពុងសម្រាកនៅមន្ទីរពេទ្យ