បារាំងកែប្រែច្បាប់មួយបន្ទាប់ពីអ្នកពន្លត់អគ្គិភ័យ២០នាក់ រំលោភក្មេងស្រីសិស្សសាលាអាយុ១៣ឆ្នាំម្នាក់

បារាំងនឹងកំណត់អាយុយល់ព្រមរួមភេទ ឡើងដល់ទៅ១៥ឆ្នាំបន្ទាប់ពីកំហឹងបានផ្ទុះឡើងពាក់ព័ន្ធករណីរំលោភក្មេងស្រីសិស្សសាលាម្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្លាស់ប្តូរច្បាប់នេះបានកើតឡើងនៅពេលអ្នកពន្លត់អគ្គិភ័យចំនួន២០នាក់ដែលបានរំលោភក្មេងស្រីអាយុ១៣ឆ្នាំម្នាក់បានគេចវេសពីការចោទប្រកាន់ ដែលជាហេតុបង្កឲ្យមានការតវ៉ានៅទូទាំងប្រទេសបារាំង។

បច្ចុប្បន្ន មិនមានអាយុយល់ព្រមរួមភេទណាមួយនៅក្នុងប្រទេសបារាំងទេ ខុសពីបណ្តាប្រទេសសហគមន៍អ៊ឺរ៉ុបដទៃទៀត។

ខណៈពេលដែលច្បាប់ចែងថា ការរួមភេទជាមួយអ្នកដែលមានអាយុក្រោម១៨ឆ្នាំគឺជាបទល្មើសនោះ វាចាំបាច់ត្រូវមានភស្តុតាងថាវាមិនមែនជាការព្រមព្រៀងដើម្បីទទួលបានការផ្តន្ទាទោសពីបទរំលោភសេពសន្ថវៈ។

ប្រសិនបើគ្មានភស្តុតាងបង្ហាញពីការរំលោភសេពសន្ថវៈទេនោះ ជនជាប់ចោទអាចត្រូវបានចោទប្រកាន់ពីបទរំលោភផ្លូវភេទនិងត្រូវផ្តន្ទាទោសឲ្យជាប់ពន្ធនាគាររយៈពេលអតិបរមា៧ឆ្នាំ។

ការផ្លាស់ប្តូរច្បាប់នេះមានន័យថា ជនល្មើសនឹងប្រឈមមុខនឹងការផ្តន្ទាទោសកាន់តែតឹងរ៉ឹងចាប់ពីពេលនេះតទៅ ព្រោះការរួមភេទជាមួយអ្នកដែលមានអាយុក្រោម១៥ឆ្នាំនឹងត្រូវបានចាត់ទុកថាជាការរំលោភសេពសន្ថវៈ។

ច្បាប់នេះត្រូវបានប្រកាសដោយរដ្ឋមន្ត្រីក្រសួងយុត្តិធម៌លោក Eric Dupond-Moretti ដែលនិយាយថា រដ្ឋាភិបាលបានប្តេជ្ញាចិត្តចាត់វិធានការយ៉ាងឆាប់រហ័សដើម្បីអនុវត្តការផ្លាស់ប្តូរនេះ។

លោកនិយាយកាលពីថ្ងៃអង្គារនៅលើកញ្ចក់ទូរទស្សន៍បារាំងប៉ុស្តិ៍លេខ២ថា “អំពើរំលោភបំពានផ្លូវភេទដោយមនុស្សពេញវ័យលើអនីតិជនអាយុក្រោម១៥ឆ្នាំ នឹងត្រូវចាត់ទុកថាជាការរំលោភសេពសន្ថវៈ”។

លោកបានបន្ថែមថា ការលើកលែងនឹងត្រូវធ្វើឡើងសម្រាប់ក្មេងជំទង់ដែលការរួមភេទមានការព្រមព្រៀងគ្នា។

ជំហានដំបូងឆ្ពោះទៅការកំណត់អាយុយល់ព្រមរួមភេទរបស់បារាំងបានកើតឡើងក្នុងឆ្នាំ២០១៨ នៅពេលការផ្លាស់ប្តូរច្បាប់ត្រូវបានស្នើឡើងតាមរយៈការតវ៉ាលើករណីបុរសម្នាក់ក្នុងវ័យ២០ឆ្នាំដែលបានរួមភេទជាមួយក្មេងអាយុ១១ឆ្នាំ។

ទោះបីជាយ៉ាងណាក៏ដោយ ច្បាប់នេះមិនត្រូវបានអនុម័តទេបន្ទាប់ពីរបាយការណ៍របស់រដ្ឋាភិបាលថា ការផ្លាស់ប្តូរបែបនេះនឹងនាំឲ្យមានការសន្មតថាមានកំហុស៕

ប្រែសម្រួលដោយ៖ Vann Vann

ប្រភព៖ The Sun