ព័ត៌មានអន្ដរជាតិ

ច្បាប់អនុញ្ញាតឲ្យរៀបការភេទដូចគ្នានៅក្រិក នឹងមានឆាប់ៗ រួមទាំងការសុំកូនចិញ្ចឹម

បានផុស

១១ ខែ មុន

នៅ

ថ្ងៃសុក្រ ១២ មករា ២០២៤

ដោយ

លោកនាយករដ្ឋមន្រ្តីក្រិក Kyriakos Mitsotakis បានប្រកាសថា រដ្ឋាភិបាលរបស់លោក នឹងអនុញ្ញាតឲ្យការរៀបការភេទដូចគ្នា ក្លាយជារឿងស្របច្បាប់ឆាប់ៗនេះនៅទឹកដីក្រិក ។ នេះបើយោងតាមការចុះផ្សាយរបស់សារព័ត៌មាន RT ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកប្រភពសារព័ត៌មាន Hindustan Times បានឲ្យដឹងដែរថា រដ្ឋាភិបាលរបស់ក្រិកកំពុងសិក្សាដាក់បញ្ជូនសេចក្តីព្រាងច្បាប់អនុញ្ញាតឲ្យមានការរៀបការភេទដូចគ្នាបាន បើទោះបីជាមានការប្រឆាំងជំទាស់គំនិតនេះ អស់រយៈពេលជាយូរមកហើយពីសំណាក់សាសនា និងអ្នកធ្វើច្បាប់មួយចំនួនក៏ដោយ ។

ទន្ទឹមនោះ នៅក្នុងបទសម្ភាសជាមួយសារព័ត៌មានក្នុងស្រុក ERT លោកនាយករដ្ឋមន្រ្តីក្រិកបានប្រកាសថា “អ្វីដែលពួកយើងកំពុងធ្វើឲ្យស្របទៅតាមច្បាប់នេះគឺសមភាពក្នុងអាពាហ៍ពិពាហ៍”។ យ៉ាងណាមិញ លោកពុំបានបញ្ជាក់កាលបរិច្ឆេទច្បាស់លាស់នោះទេ ប៉ុន្តែលោកប្រកាសនឹងមិនប្រើពេលយូរនោះឡើយ ។

“ពួកយើងនឹងលុបបំបាត់ចេញនូវការរើសអើង ទាក់ទងនឹងបញ្ហាភេទផ្សេងៗនៅក្នុងអាពាហ៍ពិពាហ៍”។ នេះបើតាមសម្តីលោកនាយកមន្ត្រីក្រិកបានបន្ថែម ។ ជាមួយគ្នានេះលោកក៏បានបញ្ជាក់ដែរថា សេចក្តីព្រាងច្បាប់ថ្មីដែលគ្រោងស្នើឲ្យអនុម័តនោះ នឹងអនុញ្ញាតឲ្យមានការស្មុំកូនយកទៅចិញ្ចឹម ពោលគឺសម្រាប់អ្នកដែលរៀបការភេទដូចនេះផងដែរ។

គួររំលឹកថា ប្រទេសក្រិកបានធ្វើសត្យាប័នច្បាប់សម្រាប់គូរៀបការភេទដូចគ្នាក្នុងឆ្នាំ២០១៥ ដោយផ្តល់នូវសិទ្ធិ និងប្រយោជន៍មួយចំនួនមានកំណត់ ក្នុងនោះការស្មុំកូនយកមកចិញ្ចឹមមិនត្រូវបានអនុញ្ញាតឡើយ។ ដោយឡែកការសន្យាឱ្យមានការរៀបការភេទដូចគ្នានេះ គឺជាយុទ្ធនាការនយោបាយមួយដែលលោក Mitsotakis ធ្លាប់សន្យា បន្ទាប់ពីជាប់ឆ្នោត ក្នុងអាណត្តិថ្មីកាលពីឆ្នាំ២០២១ ៕

ប្រែសម្រួល៖ មាន រតនា