មុនតៃវ៉ាន់បោះឆ្នោត, ចិន ចង្អុលចំឈ្មោះបេក្ខជនម្នាក់ ជាមនុស្សគ្រោះថ្នាក់

ស្របពេលដែលការបោះឆ្នោតតៃវ៉ាន់ កាន់តែកៀកមែនទែនហើយនោះ ស្រាប់តែពេលនេះ ប្រទេសចិន បានចេញមកព្រមានខ្លាំងៗដល់ប្រជាជនតៃវ៉ាន់ ឲ្យជ្រើសរើសបេក្ខជនប្រធានាធិបតីឲ្យត្រូវ ហើយត្រូវគិតគូរឲ្យមែនទែនកុំភ្លាត់ឲ្យសោះ ព្រោះមានបុគ្គលម្នាក់ជាមនុស្សគ្រោះថ្នាក់ អាចធ្វើឲ្យទំនាក់ទំនាងរវាងទីក្រុងប៉េកាំងនិងតៃប៉ិ ជួបហានិភ័យ។ នេះបើតាមការចេញផ្សាយរបស់ រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យកិច្ចការតៃវ៉ាន់របស់ចិន បានចេញសេចក្តីថ្លែងការណ៍កាលពីថ្ងៃព្រហស្បតិ៍ទី១១ខែមករាថា បើលោក William Lai មកពីគណបក្សវឌ្ឍនភាពប្រជាធិបតេយ្យដែលកំពុងកាន់អំណាច ពិតជាឈ្នះការបោះឆ្នោតនៅថ្ងៃសោរ៍ទី១៣ខែមករានេះមែននោះ, ច្បាស់ណាស់ទំនាក់ទំនងរវាងភាគីទាំង២ នឹងជួបគ្រោះថ្នាក់ជាក់ជាមិនខាន។

ការិយាល័យខាងលើបន្តថា “លោក William Lai នឹងបន្តដើរតាមមាគ៌ាអាក្រក់ នៃការញុះញង់ឯករាជ្យរួចនាំតៃវ៉ាន់ ចាកឆ្ងាយពីសន្តិភាពនិងវិបុលភាព ហើយកាន់តែខិតទៅជិតសង្រ្គាម និងការដួលរលំ”។

លោក William Lai ត្រូវបានគេមើលឃើញថា ជាបុគ្គលដែលប្តេជ្ញាមោះមុតនាំឯករាជភាពមកឲ្យកោះតៃវ៉ាន់ ហើយក្នុងការស្ទង់មតិកាលពីដើមខែនេះ លោកគឺជាបេក្ខជននាំមុខ មានសង្ឃឹមឈ្នះតំណែងជាប្រធានាធិបតី។

លោក Lai ដែលមានឈ្មោះពិត Lai Ching-te កើតនៅឆ្នាំ១៩៥៩ ក្នុងគ្រួសារអ្នកជីករ៉ែធ្យូងថ្មនៅក្នុងភូមិជនបទមួយនៃស្រុក Wanli ខាងក្រៅទីក្រុងតៃប៉ិ។ លោករៀបការជាមួយលោកស្រី Wu Mei-ju ក្នុងឆ្នាំ១៩៨៦ ហើយមានកូន២នាក់ជាចំណងដៃ។

លោករៀនចប់អនុបណ្ឌិតផ្នែកសុខភាពសាធារណៈពីសាកលវិទ្យាល័យ Harvard ប៉ុន្តែលោកបានប្តូរពីជីវិតជាវេជ្ជបណ្ឌិត មកធ្វើនយោបាយបន្ទាប់ពីវិបត្តិច្រកសមុទ្រតៃវ៉ាន់ទីបី ដែលពេលនោះ ប្រទេសចិនបានបាញ់មីស៊ីលចូលទៅក្នុងសមុទ្រជុំវិញកោះនេះក្នុងឆ្នាំ១៩៩៥ និង១៩៩៦ ជាហេតុជំរុញឲ្យលោក កើតចិត្តជួយតៃវ៉ាន់។

មុនពេលចូលកាន់តួនាទីបច្ចុប្បន្នជាអនុប្រធានាធិបតី លោក Lai បានបម្រើការជាសមាជិកសភា, អភិបាលក្រុង Tainan ក៏ដូចជានាយករដ្ឋមន្ត្រីផងដែរ៕

អត្ថបទ៖ សុខ សុវណ្ណ

ចុចអាន៖ ចិន ធ្វើឲ្យតៃវ៉ាន់ ផ្អើលឆោឡោ មុនការបោះឆ្នោត